•  Hamatamaia Herevadia 2

•  Baibel Ena Hereva Badadia 3-5

  •  Tok Ta 3

  •  Hakaua Hereva Namodia 4

  •  Baibel Duahiduahi 5

•  Emu Haroro Dalana 6-11

  •  Haroro Herevadia Edia Vidio 7

  •  Vadivadi Ginigunana 8

  •  Lou Henia 9

  •  Baibel Stadi 10

  •  Tok Ta 11

•  Keristani Taudia Edia Mauri Dalana 12-13

  •  Kongrigeisen Baibel Stadi 13

•  Hereva Dokona 14

•  Duahiduahi Bona Hadibaia Karana Hanamoa 15

•  Hanamoa Hereva Bona Sisiba 16

•  Nega 17

•  Sekit Naria Tauna Ena Vadivadi 18

•  Sekit Eiava Rijinol Hebouhebou Ena Wiki 19

•  Memorial Ena Wiki 20

•  Haroro Bona Mauri Dalana Hebou Naria Tauna 21

•  Haroro Bona Mauri Dalana Hebou Seamani 22

•  Elda Oreana Ena Kodineita 23

•  Sisiba Henia Tauna Iharuana 24

•  Sikuli Iharuana 25

•  Vidio 26

1. Haroro Bona Mauri Dalana Hebou be Haroro Bona Mauri Dalana​—Hebou Pepana ai idia herevalaia dalana hegeregerena do idia karaia, bona henunai idia noho hakaua hereva do idia badinaia danu. Pablisa taudia ibounai hagoadaia, idia noho hegaegae stiuden ena kahana ta idia karaia totona. Kongrigeisen idia bamoa taudia ma haida be kahana ta idia karaia diba bema Baibel ena hadibaia herevadia idia abia dae bona edia mauri be Keristani hakaua herevadia hegeregerena.​—be p. 282.

 2. Miniti 1. Wiki ta ta ai, ane bona guriguri murinai, Haroro Bona Mauri Dalana Hebou ena seamani ese program dekenai helai taudia edia ura do ia habadaia. Ia ese kongrigeisen do ia durua bada gaudia ia gwauraia be namo.

  3. Tok Ta: Miniti 10. Unai tok ena sinado bona point badadia rua eiava toi be Haroro Bona Mauri Dalana Hebou Pepana lalonai idia noho. Inai tok be elda tauna eiava manada hesiai tauna ta  ese do ia karaia. Wiki ta ta ena Baibel duahiduahi lalonai Baibel buka matamatana idia duahia neganai, vidio ta do idia hahedinaraia unai buka gwauraia hedinarai totona. Bona unai tok ia henia tauna ese unai vidio bona ena tok ena sinado ida ia hegeregere hereva haida ia gwauraia diba. To, hebou pepana lalonai idia noho point badadia ia herevalaia be namo. Danu, bema nega ia hegeregere, namona be ia ese hebou pepa dekenai idia noho laulau ia gaukaralaia, unai gaudia ese tok henia tauna do ia durua point ia gwauraia hedinarai namonamo totona. Referens haida ia gaukaralaia diba, to namona be unai referens ese hebou pepana ai idia noho point badadia ida idia hegeregere.

 4. Hakaua Hereva Namodia: Miniti 10. Inai kahana be henanadai bona haere, hamatamaia bona dokona herevana be lasi. Inai kahana be elda ta eiava ia manada hesiai tauna ta ese do ia karaia. Tok henia tauna ese henanadai rua be helai taudia dekenai do ia nanadaia. Danu, abia hidi ia karaia diba bema idia noho siridia do idia duahia eiava lasi. Bona haere do idia henia taudia ese sekeni 30 bamona lalonai edia haere idia henia be namo.

  5. Baibel Duahiduahi: Miniti 4. Inai stiuden asainmen be tadikaka ta ese do ia karaia. Stiuden ese Baibel do ia duahia sibona to hereva hamatamaia bona hadokoa herevana do ia gwauraia lasi. Namona be hebou ena seamani ese stiuden ia durudia idia duahia gauna idia lalopararalaia, idia gwauraia namonamo, mai anina herevadia idia hahedinaraia maoro, gado regena idia haidaua, laga-ani dalana maorona idia badinaia, bona sibona edia hereva dalanai idia duahiduahi. Baibel duahiduahi asainmen haida be kwadogi bona haida be lata, unai dainai Haroro Bona Mauri Dalana Hebou naria tauna ese stiuden ena diba o aonega ia laloa be namo inai asainmen ia karaia neganai.

 6. Miniti 15. Inai hebou ena kahana idia karaia ena badina be ta ta ia durua haroro gaukara idia hegaegaelaia totona bona edia haroro bona hadibaia dalana idia hanamoa totona. Bema tok karaia dalana be hebou pepana amo idia gwauraia lasi, pablisa ese abia hidi ia karaia diba bema iseda Hadibaia Gaukara Ena Tulu Idauidau amo pablikeisen eiava vidio do ia hahedinaraia eiava lasi. Heduru ta haroro gaukara totona, Iseda Haroro Bona Mauri Dalana Hebou Pepana ena haroro herevadia kahana dekenai inai “Hadibaia Gaukara Ena Tulu Idauidau ai Inai Siri Oi Tahua” idia atoa danu. Stiuden taudia ese abia hidi idia karaia diba bema edia asainmen dekenai inai kahana do idia gaukaralaia eiava lasi. Hebou pepana ese ia hahedinaraia stiuden edia asainmen ta ta be miniti hida lalonai do idia karaia bona, nega haida instraksen haida idia noho. To namo lasi stiuden tauna ese ena taim ibounai ia ura hagugurua dainai, ia be ena kahana dekenai infomeisen ma haida do ia atoa kau. Idia hegaegae namonamo kahadia haida idia haorea diba ena be miniti ta o rua ia do noho. Bema ia hegeregere, elda taudia ese stiuden asainmen idia abia diba. Nega ta ta ai sediual lalonai, ma vidio ta do idia hahedinaraia bona herevalaia, unai be haroro herevadia ena vidio ta lasi. Unai kahana be elda tauna o ia manada hesiai tauna ta ese do ia karaia.

 7. Haroro Herevadia Edia Vidio: Nega ta ta ai, haroro herevadia ena vidio do idia gadaralaia bona herevalaia. Unai vidio ese vadivadi ginigunana bona lou henia ta do ia hahedinaraia. Inai kahana be Haroro Bona Mauri Dalana Hebou ena seamani ese do ia karaia.

 8. Vadivadi Ginigunana: Inai stiuden asainmen be tadikaka eiava taihu ta ese ia karaia diba. Bema tadikaka ta ese inai kahana ia karaia, namona be ena durua tauna be tadikaka ta, bema taihu be taihu ta eiava edia durua tauna be edia ruma bese tauna ta. Stiuden bona ena durua tauna be idia helai eiava gini diba. Stiuden ese ena gabu ai ia maoro hanamoa herevana ia gaukaralaia be namo. Namona be Haroro Bona Mauri Dalana Hebou Pepana ai ia noho haroro hereva ena haheitalai idia gaukaralaia inai kahana dekenai.

 9. Lou Henia: Inai stiuden asainmen be tadikaka eiava taihu ta ese ia karaia diba. Bema tadikaka ta ese inai kahana ia karaia, namona be ena durua tauna be tadikaka ta bona bema taihu ta  ese inai kahana ia karaia, ena durua tauna be taihu ta danu. (km 5/97 rau 2) Stiuden bona ena durua tauna be idia helai eiava gini diba. Stiuden tauna ese do ia hahedinaraia dahaka do ia gwauraia kamonai tauna ia vadivadi lou neganai. Namona be Haroro Bona Mauri Dalana Hebou Pepana ai ia noho haroro hereva ena haheitalai idia gaukaralaia inai kahana dekenai.

 10. Baibel Stadi: Inai stiuden asainmen be tadikaka eiava taihu ta ese ia karaia diba. Bema tadikaka ta ese inai kahana ia karaia, namona be ena durua tauna be tadikaka ta bona bema taihu ta ese inai kahana ia karaia, ena durua tauna be taihu ta danu. (km 5/97 rau 2) Stiuden bona ena durua tauna be idia helai eiava gini diba. Inai kahana be idia karaia noho Baibel stadi ena kahana ta do idia hahedinaraia. Hamatamaia eiava dokona herevana be lasi, to bema stiuden be unai sisiba kahana dekenai sikuli naria tauna ese do ia itaia, stiuden ese hamatamaia eiava dokona herevana ia gwauraia diba. Ena kahana dekenai idia noho paragraf ibounai idia duahia badabada be anina lasi, to inai idia taravatua lasi. Hadibaia namona daladia ia hahedinaraia be namo.

 11. Tok Ta: Inai stiuden asainmen be tadikaka ta ese do ia karaia bona tok amo kahana do ia henia kongrigeisen dekenai.

 12. Hebou kehoa anena murinai, inai miniti 15 kahana be mai ena kahana ta eiava rua, unai ese helai taudia do ia durua Dirava ena Hereva be edia mauri lalonai idia badinaia totona. Inai kahana be elda taudia eiava idia manada hesiai taudia ese idia henia diba, to kongrigeisen durua herevana be elda taudia sibona ese do idia henia.

  13. Kongrigeisen Baibel Stadi: Miniti 30. Inai kahana be ia manada elda tauna ta ese ia karaia be namo. (Bema kongrigeisen edia elda be momo lasi, idia manada hesiai taudia idia gaukaralaia diba.) Elda oreana ese do idia itaia daika be ia hegeregere Kongrigeisen Baibel Stadi ia naria totona. Namona be idia abia hidi taudia be mai anina bada dalanai, stadi naria gaukarana idia karaia diba unai amo stadi do idia haorea nega maorona dekenai bona siri badadia idia hahedinaraia goevagoeva bona ta ta idia durua idia stadilaia gaudia idia laloa bada bona badinaia totona. Heduru idia abia totona namona be Orea ese ia henia hakaua herevadia Gima Kohorona stadi naria gaukarana karaia namonamo totona idia riviulaia. Stadi idia halataia lasi be namo, inai wiki ena stadi kahana ibounai idia herevalaia vadaeni murinai. Bema ia hegeregere, stadi naria tauna idauidau bona duahiduahi tauna idauidau be wiki ta ta ai idia gaukaralaia diba. Bema Haroro Bona Mauri Dalana Hebou ena seamani ia gwau stadi do idia hakwadogia, vadaeni stadi naria tauna ese abia hidi do ia karaia edena dala ai stadi ia hakwadogia diba. Reana paragraf haida idia duahia lasi be namo.

  14. Miniti 3. Haroro Bona Mauri Dalana Hebou ena seamani ese hebou amo idia dibaia heduru herevadia do ia riviulaia. Danu, murina wiki ena hebou ai do idia karaia gaudia ia herevalaia. Bema nega ia noho, ia ese murina wiki ai kahana do idia henia stiuden edia ladadia do ia gwauraia. Seamani ena hereva dokonai, kongrigeisen dekenai hadibaia hereva ia gwauraia diba bona revareva ia duahia diba. Infomeisen ma haida, hegeregere haroro gaukara ena sediual bona Kingdom Hall hagoevaia ena sediual be platfom amo do idia duahia lasi, to notisbod dekenai idia atoa diba. Bema nega dainai seamani ese ena hereva ena dokonai revareva eiava hadibaia herevadia ia duahia diba lasi, namona be Keristani Taudia Edia Mauri Dalana ena kahana do idia karaia tadikaka ia noidia edia kahadia idia hakwadogia totona. ( Paragraf 13 bona  17 itaia.) Hebou be ane bona guriguri amo do idia hadokoa.

 15. Stiuden ta ta ese Haroro Bona Mauri Dalana Hebou dekenai Hadibaia buklet idia mailaia be namo, idia printaia gauna eiava elektronik. Haroro Bona Mauri Dalana Hebou ena seamani ese Hadibaia buklet do ia gaukaralaia hanamoa hereva bona sisiba ia gwauraia totona. Stiuden ta  ta be Haroro Bona Mauri Dalana Hebou Pepana ai asainmen badinai parentheses lalonai ia noho stadi point idia badinaia be namo. Buklet ena “Emu Stadi Namba Ena Rekodi”kahana idia karaia stiuden totona bona seamani ese ia makaia lasi be namo.

  16. Stiuden taudia ese edia tok idia henia murinai, Haroro Bona Mauri Dalana Hebou ena seamani be miniti tamona lalonai Hadibaia buklet amo hanamoa bona sisiba herevadia do ia gwauraia. Seamani ese stiuden ena tok ia gwauraia neganai, ia ese unai stiuden ena sisiba do ia gwauraia lasi. To, stiuden ena asainmen ia haorea bona seamani ese hanamoa herevadia haida ia henia murinai, ia ese stiuden ena sisiba do ia herevalaia bona tok ia karaia namonamo ena badina ia hahedinaraia eiava mai hemataurai ida stiuden ese unai sisiba ia laloa bada ena namo ia herevalaia. Seamani ese danu kahana haida ia herevalaia bema ia laloa inai ese stiuden tauna eiava helai taudia ia durua diba. Bema seamani ia laloa stiuden be kahana haida ia hanamoa be namo, vadaeni hebou murinai o nega ma ta ai, Hadibaia buklet eiava Haroro Sikuli bukana amo, stiuden dekenai sisiba ma haida ia henia diba, ena stadi namba eiava stadi namba ma haida ia herevalaia diba.​—Hereva haida Haroro Bona Mauri Dalana naria tauna bona sisiba henia tauna iharuana tauna totona,  paragraf 17,  22 bona  24 itaia.

     17. Namo lasi stiuden eiava Haroro Bona Mauri Dalana Hebou ena seamani ese nega idia hanaia. Ena be tok ta ta ai nega idia atoa, to bema ta ese ena kahana ena point namodia ibounai ia hahedinaraia vadaeni namona be tok ia halataia lasi ena be miniti haida idia do noho. Stiuden edia tok ena nega ia hanaia neganai, hemataurai dalanai ia hadibaia tok ia hadokoa totona. Bema hebou ena kahana haida ese nega idia hanaia, sisiba henia tauna iharuana ese unai kahana idia naria tadikaka ia hereva henia be namo. ( Paragraf 24 itaia.) Hebou ibounai, ane bona guriguri danu, be hora tamona bona miniti 45 lalonai idia karaia be namo.

 18. Sekit naria tauna ese kongrigeisen ia vadivadi henia neganai, program be Haroro Bona Mauri Dalana Hebou Pepana ese ia hahedinaraia hegeregerena do idia karaia, to inai gaudia haida idia karaia be namo: Keristani Taudia Edia Mauri Dalana ena kahana ai, Kongrigeisen Baibel Stadi ena gabu ai sekit naria tauna ese ena miniti 30 hesiai tok do ia henia. To hesiai tok do lasi neganai, Haroro Bona Mauri Dalana Hebou ena seamani ese program do ia riviulaia, murina wiki ena program do ia herevalaia, hadibaia hereva do ia gwauraia, revareva do ia duahia, bena unai murinai sekit naria tauna do ia boiria. Sekit naria tauna ena hesiai tok murinai, ia ese ia abia hidi anena ta amo hebou do ia hadokoa. Tadikaka ma ta ia boiria diba guriguri dokona ia karaia totona. Sekit naria tauna ena vadivadi negana ai, sikuli iharuana do idia karaia lasi. To idau gado grup be edia hebou idia karaia diba ena be sekit naria tauna ese unai grup ia naria kongrigeisen dekenai ia vadivadi. To namona be unai grup ese sekit ena hesiai tok negana ai kongrigeisen do idia bamoa hesiai tok idia kamonaia totona.

 19. Sekit eiava rijinol hebouhebou ena wiki ai, kongrigeisen heboudia do idia abia lasi. Unai wiki edia hebou gaudia be ta ese sibona ia itaia eiava ruma bese ida idia itaia hebou diba.

 20. Memorial dinana be wiki lalonai idia karaia neganai, Haroro Bona Mauri Dalana hebou do idia abia lasi. To, Memorial dinana dekenai haroro heboudia idia karaia diba.

 21. Elda oreana idia abia hidi elda tauna ta ese Haroro Bona Mauri Dalana Hebou do ia naria. Iena maduna be inai, do ia itaia hebou ena kahana ibounai idia hegaegaelaia vadaeni bona hadibaia  hereva hegeregerena idia karaia. Namona be ia bona sisiba henia tauna iharuana huanai herevahereva namonamo karana ia noho. Haroro Bona Mauri Dalana Hebou Pepana idia ginidae neganai, namona be unai hebou ia naria tadikaka ese maoromaoro unai hua rua totona stiuden edia asainmen do ia hegaegaelaia. ( Paragraf 5-11 itaia.) Namona be stiuden ta ta ese edia tok pepana be wiki toi gunanai idia abia be namo, unai be Iseda Haroro Bona Mauri Dalana Hebou Asainmen Pepana (S-89) dekenai do idia torea.

  22. Wiki ta ta ai, elda ta be Haroro Bona Mauri Dalana Hebou do ia naria. (Bema elda taudia be momo lasi, ia manada hesiai tauna idia gaukaralaia diba.) Iena maduna be ia ese hamatamaia hereva bona hadokoa herevadia do ia hegaegaelaia bona haroro herevadia ena vidio do ia herevalaia. Danu, ia ese hebou ena kahana ibounai totona hamatamaia hereva do ia gwauraia, bona bema kongrigeisen ena elda be momo lasi, ia ese hebou ena kahana haida do ia henia danu. Ena hereva tok ta ta murinai ia halataia lasi be namo. Elda oreana ese abia hidi do idia karaia edena elda taudia be idia hegeregere unai maduna idia huaia totona. Idia manada elda taudia be vaia nega ta ta ai seamani gaukara do idia karaia. Kongrigeisen ta ta edia noho hegeregerena, Haroro Bona Mauri Dalana Hebou ia naria tauna be reana idia manada elda taudia ma haida amo, ia ese nega momo seamani gaukara do ia karaia. Bema elda ta ia hegeregere Kongrigeisen Ena Baibel Stadi ia karaia totona, toana be ia ese hebou ena seamani kahadia do ia karaia diba danu. To mani inai umui laloatao, seamani ena kahana ia karaia tauna ese stiuden ia sisiba henidia neganai, gau badana be mai lalokau ida heduru herevadia ia gwauraia. Bona seamani ena maduna ma ta be, ia itaia hebou be nega maorona ai ia doko. ( Paragraf 14 bona  17 itaia.) Bema seamani ia ura bona speis be hegeregere, platfom ai ia gini maikrofon ta do idia atoa diba, unai amo tok do ia henia tadikaka be platfom ai maikrofon vairanai ia gini noho lalonai, seamani ese iena tok do ia gwauraia hedinarai. Ma danu, bema seamani ia ura, stiuden ese Baibel Duahiduahi ia karaia lalonai bona Emu Haroro Dalana kahana umui abia lalonai, ia be idia atoa teibolo ena sea ai ia helai diba. Unai amo nega do ia halusia lasi.

 23. Elda oreana ena kodineita ese hebou kahadia ibounai totona asainmen ia karaia, to stiuden tok totona asainmen ia karaia lasi. Danu, ia ese wiki ta ta ena hebou idia naria seamani edia asainmen ia henia danu, unai seamani be elda oreana ese idia abia hidi taudia. Elda oreana ena kodineita be Haroro Bona Mauri Dalana Hebou ia naria tauna ida ia gaukara hebou bona hebou kahadia ibounai edia sediual ena kopi be notisbod dekenai ia atoa be namo.

   24. Bema hegeregere, tok henia dalana ia diba namonamo elda ta ese inai maduna ia huaia be namo. Anina be, ia ese hebou murinai o ma nega ta ai elda o hesiai tauna do ia sisiba henia bema ia itaia tadikaka ese Haroro Bona Mauri Dalana Hebou, pablik tok, Gima Kohorona Stadi eiava Kongrigeisen Baibel Stadi naria o duahia karana ia hanamoa diba. ( Paragraf 17 itaia.) Bema tok henia dalana idia diba namonamo o hadibaia gaukara idia diba elda taudia be momo, vadaeni lagani ta ta ai idia ta ta ese inai maduna idia huaia be namo. To namo lasi ia ese tok ta ta murinai elda o hesiai taudia ia sisiba henia kava.

 25. Stiuden edia namba hegeregerena, kongrigeisen ese sikuli iharuana idia karaia diba, stiuden ese tok idia henia totona. Sikuli iharuana lalonai sisiba henia tauna ia noho be namo, namona be elda tauna ese unai do ia karaia. To bema hegeregere, ia manada hesiai tauna ese unai maduna ia huaia diba. Elda oreana ese abia hidi do idia karaia daika ia hegeregere unai gaukara ia karaia totona bona unai asainmen be idia ibounai do idia karaia eiava lasi. Sisiba henia tauna ese  paragraf 16 ai ia noho herevana ia badinaia be namo. Bema sikuli iharuana umui karaia, namona be Hakaua Hereva Namodia ena kahana murinai, stiuden taudia umui noidia sikuli  iharuana dekenai idia lao totona. Bona Emu Haroro Dalana ena kahana murinai, kongrigeisen ena hebou badana dekenai idia giroa lou diba. Haroro herevadia ena vidio ta umui abia neganai, bema ia hegeregere, namona be sikuli iharuana dekenai idia noho taudia be unai sikuli gabuna amo vidio do idia itaia eiava kamonai, vidio idia herevalaia neganai. Bema unai ia hegeregere lasi, sisiba henia tauna ese mobael fon amo vidio do ia hahedinaraia bona do ia herevalaia.

 26. Idia abia hidi vidio be unai hebou ai do idia hahedinaraia. Unai vidio wiki huanai hebouna totona be JW Library® app idia noho bona elektronik gaudia idauidau amo unai idia daonloud diba. Nega haida, haroro herevadia edia vidio be Haroro Bona Mauri Dalana Hebou ai idia hahedinaraia murinai, unai vidio be haroro heboudia ai idia hahedinaraia diba.