Iehova ena Witnes Taudia ese Baibel pablikeisen bona vidio momo be elektronik dalanai idia abia. To, tano momo ai iseda tadikaka bona taihu be idia hegeregere lasi intanet ena davana idia karaia totona. Ma haida be idia noho gabudiai Intanet idia abia diba lasi, Intanet be ia slow, eiava Intanet be lasi momokani.

 To iseda tadikaka bona taihu momo be hari elektronik pablikeisen idauidau idia daonloud diba ena be Intanet lasi! Edena dala ai unai idia karaia?

 JW Box be maua maragina, intanet ia gaukara namonamo lasi kongrigeisen dekenai idia siaia. JW Box be router device bona Computer Depatmen ese unai idia hegaegaelaia. Unai tulu amo jw.org dekenai idia noho elektronik pablikeisen bona vidio oi daonloud diba. JW Box ta ta ena davana be K263 ($75 U.S.D).

 Kingdom Hall ai, tadikaka bona taihu be JW Box dekenai edia fon idia connect diba bona pablikeisen bona vidio idia daonloud. Ena be haida edia fon be fon gunana eiava davana bada lasi gauna, to JW Box dekenai ia connect diba. To bema kongrigeisen ta be intanet dekenai ia vareai diba lasi, edena bamona JW Box dekenai pablikeisen matamatadia idia atoa diba? Brens be hua ta ta ai, USB key idia siaia idia ta ta edia davana be K14 bamona ($4 USD) bona pablikeisen bona vidio matamatadia idia daonloud bena JW Box dekenai idia atoa diba.

 Edena dala ai JW Box ese iseda tadikaka ia durua? Democratic Republic of Congo dekenai, tama ta ladana, Nathan Adruandra ia gwau: “Nega momo, lau hekwarahi inai drama rua “Iehova E, . . . Oi Lau Abidadama Henia Noho” bona Lota Ena Adavana Laloatao lau daonload. To unai vidio rua lau daonloud diba lasi dainai lau lalohisihisi. Hari egu fon amo unai vidio lau daonloud diba bona unai ese ai tama sina ia durua emai natudia ai hadibaia namonamo totona.”

 Nigeria ai, kongrigeisen ia durua, JW Box ia atoa tadikaka ia gwau: “Tadikaka bona taihu idia mamia JW Box be Iehova amo ia mai spesel harihari gauna. Idia moale badina hari, Hadibaia Gaukara Ena Tulu Idauidau lalonai idia noho pablikeisen bona vidio idia daonloud diba.”

 JW BOX ibounai 1,700 idia siaia lao iseda tadikaka bona taihu Africa, Oceania, bona South America dekenai bona palani idia karaia noho kongrigeisen momo dekenai idia siaia totona. Edena dala ai unai gaudia edia davana idia karaia? Tanobada ibounai gaukara durua totona donate.pr418.com ai idia siaia kontribiusen amo unai idia karaia. Tanikiu bada emui hariharibada karana dainai.