Lagani ta ta ai taunimanima tausen momo be bapatiso idia abia dainai, Iehova tomadiho henia totona bildin momo idia haginia be namo. Unai dainai, lagani 2020 ena hesiai laganina ai, Local Design/Konstraksen Dipatmen, tanobada ibounai ai, be palani idia karaia tomadiho gabudia 2,700 idia hanamoa bona haginia totona. a

 COVID-19 gorerena ese unai palani ia hadikaia. Iseda tadikaka taihu gimaia bona gavamani ena taravatu idia badinaia totona, Hakaua Oreana Edia Publishing Committee ese tanobada ibounai ai konstraksen gaukara be nega sisina lalonai idia koua. To, lagani 2020 ai, covid gorere ia do vara lasi neganai, tomadiho gabudia 1,700 mai kahana idia haginia bona hanamodia. Danu, betele ena projek sibona lasi, to RTO, sikuli rumadia bona projek ma haida idia hagugurua. Konstraksen projek rua ese iseda tadikaka bona taihu ia durua daladia oi itaia.

 Cameroon brens. Douala ai ia noho brens be ia maragi dainai, palani idia karaia idia habadaia totona. Bona Publishing Comittee be unai brens do idia hanamoa dalana idia laloa, to brens hanamoa totona moni momo do idia negea. Danu tahua gaukara idia karaia bona idia laloa, gabu matamata ai brens idia haginia eiava ia noho vadaeni bildin do idia hanamoa, to unai palani rua ia guguru lasi.

 Ena be unai ia vara, tadikaka idia kamonai Douala ena not kahana ai, iseda Assembly Hall ta badinai gavamani be palani ia karaia dala do ia karaia totona. Unai ese iseda gaukara do ia durua bada badina do ia auka lasi brens dekenai paua, telecom services, ranu bona ma gau haida idia abia lao diba. Unai ese Brens ia durua bada. Unai dainai Hakaua Oreana ese gwau-maoro ia henia Assembly Hall ena tano kahana do idia gaukaralaia brens idia haginia totona.

 Witnes taudia bona idia abia hidi contractor ma haida be unai projek ai idia gaukara hebou​—⁠unai dala amo nega bona moni bada idia halusia lasi. Bona unai projek totona K7,040,000 (two million U.S. dollar) mai kahana idia gaukaralaia, to moni bada idia seiv! Betele Famili be betele matamata dekenai idia vareai murinai, COVID-19 gorere ia bada.

 Cameroon ai idia noho Betele taudia be noho gabuna bona gaukara gabuna namona idia abia dainai, idia moale bona idia abia dae brens matamata be Iehova ena harihari gauna. Headava tau bona hahine ta idia gwau, “Ai ura ai gaukara goada bona inai harihari gauna ai laloa bada.”

 Tojolabal Remote Trensleisen Ofesi (RTO), Mexico. Lagani momo lalonai, Tojolabal trensleisen team be Mexico ena Siti badinai ia noho hanua, Central America ena brens dekenai idia gaukara. To, Tojolabal gado be inai hanua Altamirano bona Las Margaritas dekenai idia gaukaralaia momo​—⁠unai hanua be brens amo kilomita 1,000 bamona! Unai dainai trensleita taudia idia hekwarahi dina ta ta ai gado idia hananaia badina gado ia idau ia lao. Tojolabal gado ena trensleisen bona odio recording durua totona, brens ia hekwarahi bada unai gado idia diba tadikaka bona taihu ia abia hidi totona.

 Unai dainai, Hakaua Oreana ena Toretore Komiti ia ura Tojolabal gado idia herevalaia gabuna ai trensleisen team ia noho be namo. Unai ia vara totona, brens ese dala ia karaia bildin ta idia hoia bona hanamoa. Unai idia karaia dainai, moni momo idia negea lasi.

 Trensleita ta ese unai ena namo ia gwauraia, ia gwau: “Brens ai lagani 10 lau gaukara neganai, egu gado ia herevalaia ruma bese ta lau hedavari henia lasi. Hari emai trensleisen ofesi be Tojolabal gado idia herevalaia gabuna ai ia noho. Dina ta ta, Tojolabal gado idia herevalaia taudia ida lau herevahereva diba. Unai ese lau ia durua hereva matamadia lau dibaia bona egu gaukara ia durua bada.”

 Lagani 2021 ena hesiai laganina ai, palani idia karaia bema dala ia kehoa, RTO 75 bona Baibel sikuli ena rumadia do idia haginia. Brens projek badadia eit totona gaukara do idia hamatamaia lou, hegeregere, Ramapo, New York, Argentina bona Italy ena brens. Danu, Kingdom Hall matamatadia 1,000 mai kahana do idia haginia, hebou gabudia 6,000 mai kahana do idia haidaua bona Kingdom Hall 4,000 do idia hanamoa.

 Edena dala ai unai konstraksen bona hanamoa gaukara edia davana idia karaia? Central America ena Brens Komiti ta, Tadikaka Lázaro González ese Tojolabal Remote Trensleisen Ofesi ena projek ia herevalaia neganai, unai henanadai ia haerelaia. Ia gwau: “Emai brens teritori ai gau haida dekenai ai hegeregere lasi. Unai dainai tadikaka oreana ena heduru amo iseda tadikaka bona taihu totona trensleisen bildin ai haginia diba. Tanobada ibounai ai, tadikaka taihu ese idia henia kontribiusen ese dala ia kehoa Trensleisen ofesi idia haginia bona unai dala amo trensleita taudia be unai gado idia gaukaralaia. Tanobada ibounai ai iseda tadikaka bona taihu edia hariharibada karana dainai idia ai tanikiu henia.” Oibe, tanobada ibounai gaukarana durua totona, umui henia kontribiusen ese unai konstraksen projek ia durua, unai kontribiusen momo be donate.jw.org dekenai umui siaia, unai dainai umui ai tanikiu henia.