Iseda rijinol hebouhebou ai, vidio momo ese iseda kudouna ia hamarerea bona danu ita ia durua Baibel ena hadibaia herevadia ita lalopararalaia namonamo totona. Lagani 2020 “Nega Ibounai Umui Moale”! Rijinol Hebouhebou ai vidio 114 idia hahedinaraia, bona danu tok 43 be Hakaua Oreana tadikaka bona edia durua tadikaka ese idia henia. Reana oi laloa, unai vidio karaia totona hora bona moni hida idia gaukaralaia?

 Tanobada ibounai amo tadikaka bona taihu 900 bamona be edia nega, goada bona diba idia gaukaralaia unai program idia hegaegaelaia totona. Unai projek be lagani rua lalonai idia hegaegaelaia bona hora 100,000 bamona idia halusia. Hora ena kahana 70,000 idia gaukaralaia Nehemia ena drama 76 miniti gauna,“Iehova Dainai Ita Moale Neganai Goada Ita abia” idia karaia totona.

 Mani oi laloa, unai gaukara hagugurua totona, volantia taudia edia noho gabuna, do idia gaukaralaia teknikol tulu idauidau bona do idia haginia rumadia totona moni bada do idia gaukaralaia.

 Audio/Video Services ida ia gaukara tadikaka, Jared Gossman ia gwau: “Hakaua Oreana ena Hadibaia Komiti ia ura vidio lalonai bese idauidau taudia do idia hedinarai bona gabu idauidau ai do idia karaia. Badina ita be tadikaka oreana tanobada ibounai lalonai bona vidio ese unai do ia hahedinaraia. Unai gaukara hagugurua totona, tano 11 amo team ibounai 24 idia abia hidi , do idia gaukara hebou unai projek karaia totona. Tanobada ibounai amo tadikaka idia gaukara totona, moni bada do idia gaukaralaia, idia palani namonamo bona gaukara idia hagugurua diba.”

 Iseda vidio momo idia karaia totona, tulu maorodia bona vidio karaia gabudia idia haginidia be namo. Hegeregere, Nehemia ena drama “Iehova Dainai Ita Moale Neganai Goada Ita abia” vidio totona, Patterson, New York, U.S.A. ai Mt. Ebo ena studio dekenai vidio karaia gabuna idia haginia. Tadikaka be inai mai anina bada histori momokani hahedinaraia totona kontribiusen moni idia gaukaralaia namonamo, studio lalonai Ierusalema ena magu metau lasi gauna idia haginia. Haba ta ta edia lata be mita 6 (20 ft) bona foam amo idia karaia nadi amo au frame idia koua bona ena toana be nadi amo idia karaia haba bamona. Vidio ena kahana ma haida idia karaia totona unai “haba” idia kokia diba bona drama ena kahana ma haida idia karaia. Unai dainai, K350.000 bamona ($100,000 U.S.D) idia gaukaralaia drama karaia gabuna haginia totona. a

 Unai sivarai ese ita ia durua hari lagani ena rijinol hebouhebou progma ita laloa bada totona. Ai diba momokani, tanobada ibounai lalonai unai progma totona umui karaia gaukara ese Iehova do ia hanamoa. Umui ai tanikiu henia, moale ida umui henia kontribiusen dainai, donate.pr418.com amo eiava dala ma haida ai umui henia heduru ese tanobada ibounai ena gaukara ia durua.