Iehova Ena Witnes taudia be edia tadikaka bona taihu idia laloa bada. (1 Petero 2:17) Ita momo eda hemami be Kenya taihu ladana Tannis hegeregerena. Ia gwau: “Lau ura bada tanobada ibounai ai egu tadikaka taihu dekenai idia vara gaudia lau diba.” Edena dala ai Tannis bona Witnes taudia milioni be unai do idia diba? Lagani 2013 amo, iseda jw.org websait ena kahana ta ladana Niusrum amo unai ita dibaia.

 Niusrum ai Iehova Ena Witnes taudia edia ripoti korikoridia idia noho, hegeregere Baibel idia halasia, disasta gabudia idia durua, konstraksen projek, bona ripoti ma haida. Danu, iseda tadikaka bona taihu edia abidadama dainai dibura ruma ai idia atodia ena sivarai ita duahia. Niusrum ai, haroro gaukara ena kempein bona memorial hebou amo ita abia ekspiriens namodia idia noho danu. Daidia ese inai nius atikol ena tahua gaukara idia karaia bona idia hegaegaelaia?

 Niusrum be Office of Public Information (OPI) ese ia naria. Inai dipatmen be hedikwota dekenai ia noho bona Hakaua Oreana Ena Kodineita Edia Komiti ena henunai ia gaukara. OPI dipatmen lalonai, tadikaka bona taihu 100 mai kahana idia gaukara​—⁠idia momo be remote volantia taudia​—⁠idia be toretore taudia, tahua gaukara idia karaia taudia, laulau torea bona penia taudia bona trensleita taudia. Ma haida be gavamani taudia, profesa, tisa taudia, bona nius oreadia idia hereva henia taudia. OPI be Public Information Desks (PID) 80 mai kahana bamona ida ia gaukara, PID be brens ofesi ta ta tanobada ibounai dekenai ia noho.

 Nius ta halasia totona, OPI be PID ida ia gaukara. Iseda tadikaka be sivarai ta idia abia neganai, tahua gaukara idia karaia bona infomeisen maorodia idia atoa hebou. Anina be intaviu bona diba bada taudia do idia hereva henia. Hamomokania gaudia idia haboua murinai, nius atikol idia torea, edit, proofread, laulau idia atoa, bona Kodineita Edia Komiti dekenai idia siaia gwaumaoro abia totona.

 Niusrum dainai iseda tadikaka taihu be dahaka idia laloa? Philippines ai, taihu ladana Cheryl ia gwau: “Lau ura bada egu dina ena gaukara be Iehova ena orea bona iena taunimanima edia nius duahia karana amo lau hamatamaia.”

 Duahiduahi taudia momo ese jw.org Niusrum bona nius oreadia ma haida edia idau idia herevalaia. Kazakhstan ai, Tatiana ia gwau: “Lau moale badina jw.org ena nius lau abia dae diba, badina ia be nius korikorina.” Mexico ai, taihu ladana Alma ia gwau: “Nius oreadia momo be sivarai dikadia sibona idia gwauraia, to Niusrum be ita ia hagoadaia.”

 Niusrum ai sivarai korikoridia idia noho bona iseda abidadama idia hagoadaia. Kenya ai, Bernard ia gwau: “Niusrum dainai, lau mamia tanobada ibounai dekenai idia noho tadikaka taihu be egu famili, herevana edeseni idia noho. Egu guriguri ai edia ladadia bona hekwakwanai lau gwauraia diba.” Kenya ai, taihu ladana Bybron ia gwau: “Lau itaia Baibel be gado ma ta ai idia halasia neganai, lau moale! Unai atikol idauidau ese idia hahedinaraia Iehova be taunimanima edia toana ia laloa lasi.”

 Dagedage idia davaria tadikaka edia nius ese ita ia hagoadaia danu. Kenya ai, Jackline ia gwau: “Tadikaka edia gini goada karana lau laloa neganai, egu abidadama ia goada. Nega momo lau ura diba dahaka ese idia ia durua idia haheauka totona. Lau davaria iseda tadikaka idia hagoadaia gaudia be guriguri, Baibel duahiduahi, bona ane abia karana.”

 Costa Rica ai, taihu ladana Beatriz be disasta idia vara gabudia edia nius ia ura henia. Ia gwau: “Niusrum amo lau itaia edena bamona iseda orea be mai lalokau ida iseda tadikaka idia durudia haraga. Unai dainai lau abia dae momokani inai be Iehova ena orea.”

 Ita moale badina nega korikori ai iseda tanobada hegegemadai tadikaka oreana ena nius ita abia! Tanobada ibounai gaukarana durua totona umui henia kontribiusen ese unai ia durua bada, momo be donate.pr418.com amo kontribusen idia henia. Mai ura ida umui henia kontribiusen dainai umui ai tanikiu henia.