Lagani 2022 ai, tanobada gavamani ese (U.S.) dola trilioni rua mai kahana be tuari kohu totona idia negea. Unai ia vara badina Russia ese Ukraine ia tuari henia. April 2023 ai, Stockholm International Peace Research Institute (SIPRI) ena ripoti ese inai ia hahedinaraia. Lagani 2022 lalonai:

•   Europe tanodia ai, gavamani ese tuari totona idia negea moni be 13 pesen amo ia bada daekau. Lagani 1991 amo ema bona hari, inai be lagani ta ta lalonai idia negea moni ena bada ia hanaia momokani.”

•   Russia ese . . . tuari kohudia totona ia negea moni ena bada be 9.2 pesen amo ia bada daekau. Tanobada ibounai lalonai, ia be gabu ihatoina ai ia noho, tuari kohudia hoia karana dekenai.

•   Lista ai, United States be gabu ginigunana ai ia noho tuari kohudia hoia karana dekenai. Badina “tanobada ibounai lalonai tuari totona idia negea moni amo, ia be 39 pesen ia negea.”

 Dr. Nan Tian (SIPRI ena ripoti torea tauna ta) ia gwau, “gavamani ese tuari totona moni bada idia negea karana ese ia hahedinaraia, ita be maino lasi tanobadana ai ita noho.”

 Baibel ia peroveta, tanobada ai siahu bada gavamanidia huanai heiriheiri do ia bada ia lao bona ia hahedinaraia dahaka ese maino korikori do ia mailaia.

•   Baibel ese ita noholaia negana ia gwauraia “nega dokona.”—Daniela 8:19.

•   Daniela bukana ia peroveta nega dokona ai, tanobada ena siahu gavamanidia idia heiriheiri. Idia ta ta be do idia “doria lao mai” eiava siahu abia totona do idia hekwarahi. Anina be tuari totona “dava bada kohudia” eiava moni momo idia negea.​—Daniela 11:40, 42, 43.

 Inai Baibel ena peroveta hereva oi dibaia totona, inai vidio Peroveta Herevadia Idia Guguru—Daniela Karoa 11 itaia.

•   Baibel ia gwau Dirava ese tanobada ena gavamani do ia kokia. Ia ese “basileia ta do ia haginia, ta ese do ia hadikaia lasi. Bona unai basileia be taunimanima ma haida dekenai do idia henia hanai lasi. Unai basileia ese basileia ibounai do ia hamakohia bona haorea momokani, bona ia sibona do ia gini ela bona hanaihanai.”​—Daniela 2:44.

•   Iehova a Dirava be taunimanima ese idia karaia diba lasi gauna do ia karaia—maino korikorina do ia mailaia. Edena dala ai? Iena guba Basileia ese tuari kohudia ibounai bona dagedage karadia ibounai do ia haorea.​—Salamo 46:8, 9.

 Dirava ena Basileia ese do ia havaraia gaudia oi dibaia totona, inai atikol “Dirava Ena Basileia Huanai ‘Maino Do Ia Bada Herea’” duahia.