Hari nius ai inai heheni hereva, taravatu utua karadia bona bese dagedage henia karana, bona tuari ena sivarai momo idia gwauraia.

•   Israel bona Gaza huanai idia vara tuari dainai, bona dagedage bona inai heheni karadia idia havaraia taudia dainai, social media ai inai heheni herevadia edia sivarai momo idia gwauraia noho.​—The New York Times, November 15, 2023.

•   “October 7 amo taunimanima idia itaia inai heheni herevadia bona dagedage karana be karaharaga ia bada ia lao noho.”​—Dennis Francis, president of the United Nations General Assembly, November 3, 2023.

 Inai heheni hereva gwauraia karana, dagedage bona tuari be gau matamata lasi. Badina Baibel ia gwau, idaunegai haida “edia hadikaia herevadia be peva ena diba bamona” bona idia ese tuari bona dagedage karadia idia havaraia. (Salamo 64:3; 120:7; 140:1) To danu Baibel ia gwau, hari ita itaia inai heheni karana ese mai anina bada toa ta ia hahedinaraia.

 Inai heheni karana ia bada ena badina rua be Baibel ese ia herevalaia.

1.  1. Baibel ese “taunimanima momo edia lalokau be do ia keru”negana ia perovetalaia. (Mataio 24:12) Taunimanima be lalokau do idia hahedinaraia lasi to inai heheni karana idia habadaia.​—2 Timoteo 3:1-5.

2.  2. Inai heheni karana ia bada daekau noho ena badina be Satani Diabolo ese inai heheni hereva bona kara dika ia havaraia. Baibel ia gwau “tanobada ibounai be Dika Tauna ena siahu lalonai ia noho.”​—1 Ioane 5:19; Apokalupo 12:9, 12.

 To Baibel ia gwau danu, kahirakahira inai heheni karana ia havaraia noho ena badina korikorina be Dirava ese do ia haorea. Inai heheni karana ese ia havaraia hisihisi do ia hanamoa. Baibel ia gwauhamata:

•   Dirava ese “mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore. Gau gunadia be idia ore vadaeni.”​—Apokalupo 21:4.