United Nations ena ripoti ia gwau:

•   October 7 amo ia lao October 23, 2023 ai, Gaza-Israel tuarina dainai taunimanima 6,400 mai kahana be idia mase bona 15,200 be bero idia abia, idia momo be ami lalonai idia vareai lasi taudia eiava civilian taudia.

•   Russia bona Ukraine huanai tuari ia vara nega amo ema bona September 24, 2023 ai, Ukraine dekenai civilian taudia 9,701 be tuari dainai idia mase bona 17,748 be bero idia abia.

 Tuari dainai idia hisihisi taudia dekenai Baibel be dahaka helaro ia gwauraia?

 Baibel ia peroveta Dirava ese ’tanobada ibounai lalonai tuari do ia haorea.’ (Salamo 46:9) Ia ese guba gavamani o basileia do ia gaukaralaia amo taunimanima edia gavamani ibounai ena gabu do ia abia. (Daniela 2:44) Dirava ena Basileia ese taunimanima dekenai namo do ia havaraia.

 Iesu Keriso, Dirava ena Basileia ena King ese do ia karaia gaudia be inai:

•   ”Ia ese heduru totona idia noinoi ogogami taudia do ia hamauria, ladana maragi taudia bona heduru idia abia lasi taudia do ia hamauria danu. Ia ese ladana maragi taudia bona ogogami taudia do ia hebogahisi henia, bona ogogami taudia do ia hamauria. Ia ese hisihisi bona dagedage karadia amo idia do ia hamauria.”​—Salamo 72:12-14.

 Dirava ese iena Basileia amo tuari bona dagedage dainai idia vara dika bona hisihisi do ia haorea.

•   ”Ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore. Gau gunadia be idia ore vadaeni.”​—Apokalupo 21:4.

 Kahirakahira Dirava ena Basileia ese tanobada dekenai senisi do ia karaia. Hari ita itaia bona kamonai noho tuari bona tuari ena sivarai be Baibel ese ia perovetalaia. (Mataio 24:6) Hari idia vara noho gaudia ese ia hahedinaraia ita be taunimanima edia lohia negana ena ”dina gabedia ai” ita noho.​—2 Timoteo 3:1.