Tanobada ibounai dekenai gavamani taudia edia korapsen karana ese dika bada ia havaraia. a Hegeregere, COVID-19 gorerena ia vara negana ai, tano momo lalonai gavamani ida idia gaukara taudia ese taunimanima durua totona idia abia monina amo idia taga. Unai dainai taunimanima be hospital ai heduru namona idia abia diba lasi, bona momo idia hisihisi bona idia mase.

 Gavamani ena korapsen karadia ese dika bada ia havaraia noho. United Kingdom ena praiminista gunana, David Cameron, ia gwau: “Korapsen be spaida web badana ta bamona, unai ese tano idauidau ibounai ia kwatua.”

 To namona be ita diba, kahirakahira korapsen gavamani ibounai do idia ore. Dahaka dainai? Baibel ese Dirava do ia karaia gauna ia herevalaia.

 Dirava ena hereva ia gwau: “Lau, Iehova, be kota maoromaoro lau ura henia, henaohenao bona koikoi karadia lau inai henia.” b (Isaia 61:8) Haida edia kara gageva dainai taunimanima idia hisihisi neganai, Dirava be unai ia diba. (Aonega Herevadia 14:31) Ia gwauhamata: “Haida ese idia hahisia taudia . . . dainai, lau ese kara ta do lau karaia.”​—Salamo 12:5.

 Dahaka do ia karaia? Hari ia noho gavamani do ia hanamoa lasi, to unai gavamani ena gabu be iena guba gavamani, idia gwauraia, “Dirava ena Basileia” ese do ia abia. (Mareko 1:14, 15; Mataio 6:10) Baibel ia gwau: “Guba Diravana ese basileia ta do ia haginia, . . . unai basileia ese basileia ibounai do ia hamakohia bona haorea momokani, bona ia sibona do ia gini ela bona hanaihanai.” (Daniela 2:44) Dirava ese unai dala ai korapsen do ia haorea.

 Edena dala ai ita diba Dirava ena guba Basileia ena gavamani be korapsen lasi? Badina haida be inai.

1.  1. Siahu. Basileia ese Siahu Ibounai Diravana amo iena siahu ia abia.​—Apokalupo 11:15.

    Mai ena badina: Taunimanima edia gavamani be edia sitisen amo moni idia abia, unai amo idia gaukara diba. Unai dainai nega momo, idia kara koikoi, henaohenao, taunimanima idia doria edia lalohadai badinaia totona. To inai Basileia be, Siahu Ibounai Diravana ese ia durua dainai, hanaihanai ena taunimanima edia ura gaudia ibounai ia henia diba.​—Salamo 145:16.

2.  2. Lohiaia Tauna. Dirava ese Iesu Keriso ia abia hidi unai Basileia ia Lohiaia totona.​—Daniela 7:13, 14.

    Mai ena badina: Ena be taunimanima edia lohia tauna namona be ta ese ia hakaua kerere diba. (Hadibaia Tauna 7:20) To Iesu be idau, ta ese ia hakaua kerere o koia diba lasi. (Mataio 4:8-11) Danu, ena taunimanima ia lalokau henia hanaihanai dainai edia namo ia laloa.​—Salamo 72:12-14.

3.  3. Taravatudia. Dirava ena Basileia ena taravatu be goevadae bona unai taravatu idia badinaia taudia ia hamoalea.​—Salamo 19:7, 8.

    Mai ena badina: Taunimanima edia taravatu be nega momo lalopararalaia be auka, metau, bona siahu lasi, danu korapsen ia havaraia. To Dirava ena taravatu be unai bamona lasi, badinaia be hekwarahi lasi bona mai ena namo. (Isaia 48:17, 18) Danu, inai taravatu badinaia karana sibona ia herevalaia lasi, to ita karaia ena badina ia hahedinaraia danu. (Mataio 22:37, 39) Oibe, Dirava be iseda kudouna ia itaia diba, bona iena taravatu be hebogahisi dalanai ia henia.​—Ieremia 17:10.

 Oi ai invait Baibel ena gwauhamata, korapsen lasi gavamani vaira negai oi dibaia totona.

•   Dirava ena Basileia lalonai korapsen be do ia vara diba lasi ena badina toi dibaia totona, inai atikol duahia “Dirava Ena Basileia—Korapsen Ia Dadaraia Gavamanina.”

•   Inai vidio, Dirava Ena Basileia be Dahaka? itaia, Dirava ena gavamani bona tanobada totona dahaka do ia karaia oi diba totona.

•   Inai davana lasi Baibel stadi kosi amo Baibel ena gwauhamata oi dibaia.