Sibona Noho Ena Hemami Hanaia Totona Haida Oi Bamoa—Baibel ese Ia Durua Dalana
Lagani 2023 ai, helt ena diba bada taudia idia laloa sibona noho ena hemami ese taunimanima momo ia hadikaia. Unai dainai gau ta idia karaia be namo. Do idia kwalimu, a?
U.S. surgeon general Dr. Vivek Murthy ia gwau: “Sibona ita noho ena hemami ita abia bona ita ura lasi ma haida ida ita noho karana ese iseda helt bona noho dalana ia hadikaia diba.” To ia gwau: “Gau ta ita karaia diba.” Edena dala ai? “Dina ta ta ai gau maragidia ita karaia iseda hetura karana ma haida ida ita hagoadaia totona.” a
Unai be sibona noho dainai ia vara hemami ta sibona lasi. Haida be hutuma huanai idia noho to sibona noho ena hemami idia abia. Herevana dahaka badina dainai sibona noho ena hemami ita abia, to Baibel ese ita ia durua diba. Baibel ai sisiba namodia idia noho ma haida tura henia karana ita hagoadaia totona, unai amo sibona noho ena hemami ita hanaia diba.
Ita ia durua diba Baibel ena hakaua herevadia
Herevahereva namonamo tauna ai ita lao. Emu hemami oi herevalaia sibona lasi to ma haida edia hereva oi kamonai henia namonamo danu. Ma haida edia namo oi laloa bada neganai, emu hetura karana ia hagoadaia.
Baibel ena hakaua hereva: “Sibona emui namo do umui laloa lasi, to ma haida edia namo do umui laloa danu.”—Filipi 2:4.
Taunimanima idauidau oi tura henia. Mauri lagani bada o maragidia eiava mauri dala idauidau o bese idauidau taudia oi tura henia.
Baibel ena hakaua hereva: “Emui lalokau umui habadaia.”—2 Korinto 6:13.
Ma haida ida hetura karana hagoadaia dalana diba totona inai atikol ladana, “Satisfying Our Hunger for Friendship” duahia.
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
Reana Inai Danu Oi Ura
TOPIK MA HAIDA
Sibona Oi Noho Ena Hemami Hanaia Dalana
Sibona oi noho ena hemami oi abia neganai, toana be helaro, moale, bona lalomaino oi abia be auka—to dala ia noho.
