Gaukara oi haboioa neganai, moni abia dalana bona famili ena noho dalana be do ia auka, unai sibona lasi, to do oi laloa momo diba. Inai dala siks be Baibel ena hakaua herevadia amo, unai ese oi ia durua diba daladia ia herevalaia.

•   Emu hemami oi gwauraia hedinarai.

   Baibel be dahaka ia gwau: “Tura korikori be nega ibounai lalokau ia hahedinaraia.”—Aonega Herevadia 17:17.

   Emu moni gaukara oi haboioa neganai, reana do oi lalohisihisi, badu, eiava oi diba lasi dahaka do oi karaia, bona do oi laloa oi be anina lasi. To emu hemami be famili bona turadia dekenai oi gwauraia hedinarai neganai, oi do idia durua. Danu, oi dekenai idia herevalaia dala haida ese oi do ia durua moni gaukara matamata oi davaria totona.

•   Laloa momo karana oi dadaraia.

   Baibel be dahaka ia gwau: “Kerukeru totona umui lalohekwarahi lasi, badina kerukeru danu be mai ena lalohekwarahi gaudia. Hari dina sibona ena lalohekwarahi gaudia umui laloa.”—Mataio 6:34.

   Baibel ese ita ia hagoadaia palani ita karaia totona. (Aonega Herevadia 21:5) To danu Baibel ena sisiba be, vaira nega totona ita lalohekwarahi momo lasi. Nega momo ita ese do idia vara lasi gaudia totona ita lalohekwarahi kava. Namona be dina ta lalonai do ita karaia diba gaudia sibona ita laloa.

   Baibel ena hakaua herevadia momo ese aonega ia henia, hari negai ita lalohekwarahilaia gaudia ita hanaia totona. Diba ma haida oi abia totona, inai atikol duahia, “Oi Lalohekwarahi Neganai Dahaka Oi Karaia Diba?”

•   Emu moni oi gaukaralaia namonamo.

   Baibel be dahaka ia gwau: “Noho daladia ibounai lalonai lau dibaia gauna be inai, . . . lau dekenai gau momo idia noho eiava lau dabu, to egu lalona be ia hegeregere.”—Filipi 4:12.

   Emu noho dalana dainai lalohadai maorona abia. Anina be oi dekenai ia noho moni sisina oi gaukaralaia namonamo. Bona namo lasi abitorehai momo oi karaia.—Aonega Herevadia 22:7.

   Hari oi dekenai ia noho moni sisina gaukaralaia dalana namodia totona inai atikol, “How to Live on Less” oi itaia.

•   Mai aonega ida emu nega gaukaralaia.

   Baibel be dahaka ia gwau: “Namona be aonega dalana ai . . . , emui nega umui gaukaralaia namonamo.”—Kolose 4:5.

   Ena be oi moni gaukara lasi dainai sediual ta oi badinaia lasi, to nega oi gaukaralaia namonamo be mai anina bada. Unai ese emu mauri do ia hanamoa, oi dekenai laloa goada do ia henia danu.

•   Gaukara Idauidau Karaia.

   Baibel be dahaka ia gwau: “Mai emu goada ida gaukara idauidau oi karaia be mai ena namo.”—Aonega Herevadia 14:23.

   Hari oi karaia gaukara be guna oi karaia gaukara amo ia idau, to mai moale ida unai gaukara oi karaia be namo. Namona be taunimanima ese idia laloa maragi moni gaukara oi laloa, ena be unai gaukara be guna oi abia pei ida ia hegeregere lasi.

•   Oi gaukara goada.

   Baibel be dahaka ia gwau: “Daba ai emu uhe oi hadoa bona emu imana do ia laga-ani lasi ela bona adorahi, badina oi diba lasi edena do ia tubu namonamo.”—Hadibaia Tauna 11:6.

   Gaukara oi tahua noho. Ma haida hadibaia oi be gaukara oi tahua. Emu varavara, turadia, moni gaukara tura gunadia, bona neiba taudia. Moni gaukara ena advertisement o noutis, bona websait ai kampani ese gaukara matamata idia atodia oi sekea. Moni gaukara ena intaviu momo oi karaia totona oi hegaegae bona aplikeisen momo oi atodia murinai moni gaukara ta do davaria.