February 24, 2022 ena daba kahana ai, Russia ena ami ese Ukraine idia tuari henia matamaia, ena be tanobada ena bese idau idau edia lohia taudia idia hereva goada tuari idia hamatamaia lasi totona. Edena bamona hari ia vara tuari ese tanobada ibounai ia hamarerea diba? United Nations ena sekreteri-general, António Guterres, ia gwau: “Inai tuari do ia havaraia gaudia ita laloa be metau, taunimanima do ia hahisia, Europe taudia bona tanobada ena maino do ia hadikaia, unai be dika momokani.”

•   Iesu Keriso ese “bese ta do ia toreisi bese ta do ia tuari henia, bona basileia ta ese basileia ta do ia tuari henia” ena nega ia perovetalaia. (Mataio 24:7) Baibel ese ia hahedinaraia hari idia vara tuari be Iesu ena peroveta hereva ia hamomokania. Unai oi itaia totona inai atikol “‘Dina Dokona’ eiava ‘Nega Dokona’ ena toana be Dahaka?” oi duahia.

•   Baibel ena buka Apokalupo ese tuari ia herevalaia, ia gwau, “Hosi ma ta ia mai, ia be kakakaka” bona ia latanai ia helai tauna ese “tanobada amo maino ia kokia.” (Apokalupo 6:4) Hari iseda nega ai idia vara tuari idauidau ena peroveta Hereva oi diba totona inai atikol “Hosi Guia Taudia Foa​—⁠Idia be Daidia?” oi duahia.

•   Daniela ena buka be “not kahana ena king” bona “saut kahana ena king” ia perovetalaia. (Daniela 11:25-45) Dahaka dainai Russia bona ena durua besedia be not kahana ena king? Unai oi diba totona inai vidio Peroveta Herevadia Idia Guguru​—⁠Daniela Karoa 11 oi itaia. a

•   Apokalupo ese “Siahu Ibounai Diravana ena dina badana ena tuari” ia herevalaia. (Apokalupo 16:14, 16) To, unai tuari be idau, ia be hari ita itaia bese huanai edia tuari bamona lasi. Do idia vara gaudia ena infomeisen ma haida oi diba totona inai atikol “Aramagedono Tuarina be Dahaka?” oi duahia.

•   Baibel ia gwau Dirava ese ‘tanobada ibounai lalonai tuari do ia haorea.’ (Salamo 46:9) Dirava ena gwauhamata idauidau vaira negana totona oi diba totona inai atikol “Helaro Korikorina Vaira Negana Totona” oi duahia.

•   Iesu ese ena hahediba taudia ia hadibaia Dirava ena Basileia ia mai totona idia guriguri. (Mataio 6:9, 10) Basileia be guba gavamanina ta bona tanobada dekenai Dirava ena ura do ia hagugurua, bona Dirava ese tanobada ibounai lalonai maino do ia havaraia. Edena dala ai Basileia ese oi do ia durua? Unai oi diba totona inai vidio Dirava Ena Basileia be Dahaka? oi itaia.

 Ukraine lalonai be Iehova ena Witnes taudia 129,000 bamona idia noho. Tanobada ibounai lalonai, tano ta ta ai Witnes taudia be Iesu ena haheitalai idia tohotohoa, idia be politikol bona tuari ai idia vareai lasi. (Ioane 18:36) Tanobada ibounai dekenai, Iehova ena Witnes taudia be “Basileia ena sivarai namona” idia harorolaia, ia ese taunimanima edia hekwakwanai ibounai, tuari danu do ia hanamoa. (Mataio 24:14) Baibel bona ia herevalaia helarona oi dibaia namonamo totona oi ai hagoadaia ai oi kontek be namo.