Lagani ta ta ai, tano mareremarere tausen momo idia vara. Haida be maragi, to tano mareremarere badadia ese gabu ia hadikaia, hisihisi bona mase ia havaraia diba. Nega haida, unai ese tsunami ia havaraia dainai kone gabudia ia hadikaia, bona momo idia mase. Unai tano mareremarere badadia be Baibel ese ia perovetalaia, a?

Inai atikol lalonai:

•  Baibel ese tano mareremarere ia perovetalaia, a?

•  Hari idia vara tano mareremarere ese Baibel ena peroveta hereva ia hagugurua, a?

•  Baibel ia perovetalaia tano mareremarere ese ita dekenai dahaka ia hadibaia?

•  Baibel ena peroveta hereva bona tano mareremarere totona idia abia lalohadai kereredia

 Iesu ia perovetalaia tano mareremarere be Baibel ese ia herevalaia. Baibel bukadia toi lalonai iena hereva idia noho:

 “Bese ta do ia toreisi bese ta do ia tuari henia, bona basileia ta ese basileia ta do ia tuari henia, bona gabu momo ai hitolo bada bona tano mareremarere do idia vara.”​—Mataio 24:7.

 “Bese ta do ia toreisi bese ta do ia tuari henia, bona basileia ta ese basileia ta do ia tuari henia. Gabu momo ai tano mareremarere bona hitolo bada danu do idia vara.”​—Mareko 13:8.

 “Tano mareremarere badadia do idia vara, gabu idauidau ai hitolo bada bona gorere dikadia do idia vara.”​—Luka 21:11.

 Iesu ia peroveta “gabu momo ai,” “tano mareremarere badadia,” tuari, hitolo bona gorere dikadia do idia vara. Unai gaudia be nega tamona ai idia vara karana ese ia hahedinaraia, hari ita be “inai nega oromana ena dokona” o “dina gabedia ai” ita noho. (Mataio 24:3; 2 Timoteo 3:1) Baibel ese ia herevalaia negadia ita stadilaia neganai, do ita laloparara “dina gabedia” be lagani 1914 ai ia matamaia bona ia do doko lasi.

 Oibe. Iesu ese ia perovetalaia tano mareremarere be hari iseda nega ai idia vara noho. Lagani 1914 amo, tano mareremarere badadia 1,950 mai kahana idia vara, unai ese taunimanima 2 milioni mai kahana ia hamasea. a Inai lagani ta ta ese unai ia hahedinaraia.

 Lagani 2004—Indian Ocean. Tano mareremarere ena goada 9.1 ese tsunami ia havaraia bona unai ese gabu momo ia hadikaia bona taunimanima 225,000 bamona idia mase.

 Lagani 2008—China. Tano mareremarere ena goada 7.9 ese hanua bona taoni ia hadikaia, bona taunimanima 90,000 bamona idia mase, bona 375,000 bamona be bero idia abia bona milioni momo be edia ruma idia haboioa.

 Lagani 2010—Haiti. Tano mareremarere ena goada 7.0 ia vara bona unai murinai idia vara tano mareremarere maragidia ese taunimanima 300,000 mai kahana ia hamasea bona milioni ma haida be edia ruma idia haboioa.

 Lagani 2011—Japan. Tano mareremarere ena goada 9.0 ia vara. Unai ese tsunami ia havaraia bona taunimanima 18,500 bamona idia mase. Bona taunimanima handred tausen mai kahana be edia noho gabudia idia rakatania. Fukushima paoa plant o paoa steisen ia hadikaia danu, bona dika bada ia havaraia. Lagani 10 murinai, ia auka taunimanima 40,000 bamona be guna idia noho gabuna paoa plant kahirakahira idia giroa lou totona, badina radiation ese unai gabu ia hadikaia.

 Baibel ia perovetalaia tano mareremarere ese ita dekenai vaira negai do idia vara gaudia ia hadibaia. Iesu ia gwau: “Unai gaudia idia vara umui itaia neganai, umui diba Dirava ena Basileia be ia kahirakahira.”​—Luka 21:31.

 Baibel ia gwau, Dirava ena Basileia be guba ai ia noho gavamani korikorina, bona Iesu Keriso be unai Basileia ena King. Iesu ese iena murinai idia raka taudia ia hadibaia unai Basileia sibona totona do idia guriguri.​—Mataio 6:10.

 Dirava ena Basileia ese tanobada ia lohiaia neganai, Dirava ese disasta idauidau hegeregere, tano mareremarere do ia hadokoa, unai amo taunimanima dekenai dika do ia havaraia lasi. (Isaia 32:18) Danu, taunimanima dekenai tauanina bona hemami dalanai ia havaraia hisihisi do ia haorea. (Isaia 65:17; Apokalupo 21:3, 4) Diba ma haida totona, inai atikol “What Will God’s Kingdom Accomplish?” oi duahia.