“Taunimanima ese idia karaia gaudia momo be tanobada ia hadikaia noho. Siti badadia idia diho ranu henunai. Dina ena siahu ia bada momokani guna bamona lasi. Lai badadia. Gabu momo dekenai ranu be lasi. Tubutubu gaudia bona animal milioni idia mase. Inai be hereva o sivarai ta sibona lasi. Saiens ese ita ia hadibaia bema hari gavamani ese energy gaukaralaia ena taravatu idia senisia lasi, unai bamona dika do idia vara.”​—António Guterres, United Nations ena secretary-general, be Intergovernmental Panel on Climate Change ese April 4, 2022 ai idia halasia ripoti totona, unai hereva ia gwauraia.

 “Vaira laganidia ai, dika bada do ia vara dainai, saiens taudia be hadibaia hereva idia henia noho, bona [United States lalonai] national park ibounai kahirakahira 423 be weda ia idau karana (climate change) ese ia hadikadia diba. Unai be Baibel ai ita duahia sivaraidia bamona: lahi bona abata, aisi idia veve, davara ia bada daekau bona dina ia siahu momokani.”​—“Flooding Chaos in Yellowstone, a Sign of Crises to Come,” The New York Times, June 15, 2022.

 Tanobada hadikaia karana do ia ore, a? Bema oibe, daika ese unai do ia karaia? Mani Baibel ena haere oi itaia.

 Dirava ese ‘tanobada idia hadikaia taudia do ia hadikaia ore.’ (Apokalupo 11:18) Unai Baibel siri ese ita dekenai gau toi ia hadibaia:

1.  1. Taunimanima ese idia karaia gaudia be tanobada do ia hadikaia.

2.  2. Tanobada hadikaia karana be do ia ore.

3.  3. Taunimanima lasi, to Dirava ese unai hekwakwanai do ia hamaoromaoroa.

 Baibel ia gwau “tanobada be ia noho hanaihanai.” (Hadibaia Tauna 1:4) Tanobada be do idia noholaia hanaihanai.

•   “Kara maoromaoro taudia be tanobada do idia abia, bona tanobada ai do idia noho ela bona hanaihanai.”​—Salamo 37:29.

 Iseda planeti ena toana be do ia namo lou.

•   “Taunimanima lasi gabuna bona ranu lasi tanona do idia moale, bona tano kaukau palakana do ia moale bona flaoaflaoa amo do ia honu.”​—⁠Isaia 35:1.