Tanobada Hegegemadai ai Ranu Ena Hekwakwanai Dekenai Baibel be Dahaka Ia Gwau?

PLAY

Ita mauri totona ranu namona ita ura abia. UN Secretary-General António Guterres ia gwau, “tanobada hegegemadai ai ranu idia ura taudia edia namba be ia bada ia daekau noho, unai ese taunimanima dekenai ranu ena hekwakwanai do ia habadaia.” Tanobada ena gabu ibounai dekenai taunimanima bilioni momo be ranu namona idia abia be auka.

Strdel/AFP via Getty Images

Ibounai ese ranu namona idia abia totona dala ia noho, a? Eiava ranu ena hekwakwanai be hanaihanai do ia vara, a? Baibel be dahaka ia gwau?

Baibel ena gwauhamata ranu totona

Baibel ia gwau nega ta ranu ena hekwakwanai be do ia ore. Oibe, ibounai totona ranu namona do idia noho.

“Taunimanima lasi gabuna ai ranu momo do ia aru, bona tano kaukau palakana dekenai sinavai do idia noho. Tano kakoro be ranu gabuna ai do ia lao, bona ranu lasi tanona ai ranu do ia lohilohi.”—Isaia 35:6, 7.

Dahaka dainai ita abia dae Baibel ena gwauhamata be momokani? Inai tanobada ena ranu ena heau dalana be Baibel ese ia herevalaia oi duahia.

Baibel ese tanobada bona ranu ena heau dalana ia herevalaia

“[Dirava ese tanobada] ia karaia kava lasi, to taunimanima ese idia noholaia totona ia karaia.”—Isaia 45:18.

Dirava ese tanobada ia karaia mauri ia durua totona dainai, tanobada be sibona ranu namona ia havaraia diba dalana ia karaia danu.

“[Dirava] ese tano amo ranu ia veria daekau. Bona ori lalonai medu ranu ia haboua. Bena ori amo medu ia diho, bona taunimanima latanai ia diho.”—Iobu 36:27, 28.

Unai siri ese ia hahedinaraia, tano bona davara amo ranu ia daekau guba dekenai, bena ori ese ia dogoatao, bona medu bamona ia diho, unai amo taunimanima bona animal be hanaihanai ranu namona idia abia. Dirava ese unai dala amo ranu ita abia dalana ia karaia.—Hadibaia Tauna 1:7; Amosa 5:8.

“Lau ese nega korikori ai umui dekenai medu do lau siaia, bona tano ese ena anina do ia havaraia, bona au ese huahua do idia havaraia.”—Levitiko 26:4.

Dirava ese idaunegai Israela taudia dekenai ia gwauhamata edia uma aniani totona hanaihanai idia dekenai ranu do ia henia. Ia diba idia be uma gabu karaia taudia dainai aniani idia tubu namonamo totona, nega korikorina ai medu ia diho be namo.

Dirava ese idaunegai Israela taudia dekenai ia karaia hegeregerena, kahirakahira ia ese tanobada ibounai dekenai unai do ia karaia. (Isaia 30:23) Hari, tano momo dekenai ranu lasi ena hekwakwanai ia bada ia lao noho, ena badina ta be medu ia diho lasi. Baibel ese ranu ena hekwakwanai do ia ore dalana ma ta ia herevalaia.

Ranu ena hekwakwanai do ia ore dalana

Baibel ia gwau Dirava be ena Basileia amo tanobada dekenai idia vara hekwakwanai idauidau, hari ia vara noho ranu ena hekwakwanai danu do ia haorea. (Mataio 6:9, 10) Dirava ena Basileia be guba gavamanina bona tanobada ibounai do ia lohiaia. (Daniela 2:44; Apokalupo 11:15) Dirava ena Basileia be taunimanima edia gavamani ese ia karaia diba lasi gauna do ia karaia diba—ranu ena hekwakwanai ena badina do ia haorea.

Hekwakwanai: Weda ia senisi noho karana ese ranu ena heau dalana ia haidaua. Unai dainai medu ia diho lasi eiava medu bada ese abata badadia ia havaraia bona davara ia daekau noho.

Hamaoromaoroa dalana: Dirava ena Basileia ese tanobada ena enviroment do ia hanamoa. Dirava ia gwauhamata: “Lau ese gau ibounai lau hamatamataia noho.” (Apokalupo 21:5) Tano kaukaudia dekenai ranu namona do ia heau, mauri do ia hanamoa, taunimanima idia noho lasi gabudia dekenai danu. (Isaia 41:17-20) Iesu Keriso ese Dirava ena Basileia amo weda idauidau do ia biagua.

Iesu be tanobada ai ia noho neganai, lai gubana ia hadokoa, unai amo Dirava ese ia dekenai ia henia siahu ia hahedinaraia. (Mareko 4:39, 41) Keriso be Dirava ena Basileia ena King, bona ena lohia henunai weda dikadia idauidau do idia vara lasi. Taunimanima ese maino bona noho namona do idia moalelaia, idia be disasta idauidau dainai do idia gari lasi.

Hekwakwanai: Taunimanima bona mataganigani bisinesi taudia ese sinavai, gohu, bona tano henunai ia noho ranu hadikaia karana idia laloa lasi. Unai dainai ranu namona be lasi.

Hamaoromaoroa dalana: Dirava ese tanobada do ia hagoevaia bona sinavai, gohu, davara bona tano do ia hanamoa lou. Tanobada be paradaiso ai do ia lao. Baibel ia gwau: “Taunimanima lasi gabuna bona ranu lasi tanona do idia moale, bona tano kaukau palakana do ia moale bona flaoaflaoa amo do ia honu.”—Isaia 35:1.

Tanobada bona taunimanima edia namo idia laloa lasi taudia dekenai dahaka do ia vara? Dirava ia gwauhamata ia ese ‘tanobada idia hadikaia taudia do ia hadikaia ore.’—Apokalupo 11:18; Aonega Herevadia 2:21, 22.

Hekwakwanai: Tano ese ia havaraia ranu ena kahana badana be taunimanima ese idia gaukaralaia namonamo lasi dainai ranu ia ore.

Hamaoromaoroa dalana: Dirava ena Basileia ese ena ura tanobada dekenai do ia havaraia. (Mataio 6:9, 10) Dirava be ena Basileia henunai do idia noho taudia dekenai edukeisen namona do ia henia. Isaia 11:9 ia gwau: “Tanobada be Iehova dibaia karana dekenai do ia honu.” a Taunimanima ese unai diba hereadaena idia abia bona Dirava bona ena havaraia gaudia idia lalokau henia bada dainai, idia ese tanobada hairaina do idia naria namonamo.

Dirava ena Basileia ese do ia karaia gaudia ma haida oi diba totona, inai atikol “Dirava Ena Basileia ese Dahaka Do Ia Hagugurua?” itaia.
Baibel ai Isaia karoa 35 ese tanobada be paradaiso ai do ia lao dalana ia herevalaia, oi duahia diba.
Dirava ena ura taunimanima bona tanobada totona be inai vidio Dahaka Dainai Dirava ese Tanobada Ia Karaia? ai oi itaia.