Tanobada ai dagedage karadia be ia bada, unai kara idia havaraia ena badina be taunimanima idia ura hagaria bona politik, tomadiho dalanai o taunimanima edia mauri dalana dekenai senisi havaraia totona. Terorist karana ta ia vara neganai, vaia inai bamona henanadai reana do oi laloa: ‘Dirava be taunimanima ia laloa, a? Dahaka dainai inai karadia idia vara noho? Terorist a karana do ia ore, a? Edena bamona inai gari hemami ida do lau noho?’ Baibel ai unai henanadai edia haere maorodia idia noho.

 Dirava ese dagedage bona terorist karana ia inai henia. (Salamo 11:5; Aonega Herevadia 6:16, 17) Bona Dirava ena gwaukau tauna, Iesu be ena hahediba taudia ia gwau henia badina dagedage karana idia karaia. (Mataio 26:50-52) Haida be Dirava ena ladana ai dagedage karadia idia havaraia, to unai karadia ia abia dae lasi. Momokani, edia guriguri danu do ia kamonai lasi.​—Isaia 1:15.

 Dirava ese hisihisi idia abia taudia, bona terorist karana dainai dika idia davaria taudia danu ia lalodia bada. (Salamo 31:7; 1 Petero 5:7) Baibel ese ia hahedinaraia Dirava be kara ta do ia karaia dagedage karadia ia haorea totona.​—Isaia 60:18.

 Baibel ese terorist ia vara ena badina ia herevalaia: “Taunimanima ese ta ta idia biagua bona idia hahisia.” (Hadibaia Tauna 8:9) Idaunega amo ema bona hari taunimanima ese edia siahu idia gaukaralaia terorist karana amo haida idia hahisia totona. Unai dainai ma haida be terorist karana lalonai idia vareai danu.​—Hadibaia Tauna 7:7.

 Dirava ia gwau, gari bona dagedage karana do ia haorea bona tanobada ai maino do ia havaraia. (Isaia 32:18; Mika 4:3, 4) Ia ese:

•   Terorist karana ia vara ena badina do ia kokia. Dirava ese taunimanima edia gavamani do ia kokia bona tanobada ibounai dekenai gavamani ma ta do ia haginia. Unai gavamani ena Lohia Tauna, Iesu Keriso ese maka tamona ai taunimanima ibounai do ia kara henia bona, hisihisi bona dagedage do ia haorea. (Salamo 72:2, 14) Unai nega ai taunimanima ese terorist karana amo hekwakwanai hamaoromaoroa lalohadaina do idia abia lasi. Taunimanima be “do idia moale bada, badina gabu ibounai dekenai maino do ia noho.”​—Salamo 37:10, 11.

•   Terorist karana ese ia havaraia dika ibounai do idia ore. Terorist karana dainai taunimanima dekenai idia vara dika bona hisihisi, tauanina bona hemami dalanai be Dirava ese do ia hanamoa. (Isaia 65:17; Apokalupo 21:3, 4) Danu ia gwauhamata, mase taudia do ia hatoreaisi lou, maino tanobadana ai do idia mauri.​—Ioane 5:28, 29.

 Ita abia dae Dirava be kara ta do ia karaia bona Baibel ese ita dekenai unai ena badina ia herevalaia. To reana do oi laloa, ‘Dahaka dainai Dirava ese terorist karana ia haorea haraga lasi?’ Haere oi diba totona vidio ladana Dahaka Dainai Dirava ese Hisihisi Ia Koua Lasi? oi itaia.