Dahaka dainai Iehova idia lalokau henia taudia ita bamoa be namo? Badina ita bamoa taudia, iseda turadia eiava famili taudia, ese ita idia durua diba kara maorodia ita karaia eiava ita idia hakaua kerere diba kara dikana ta ita karaia totona. (Ao 13:20) Hegeregere, King Ioasa ese Hahelaga Tauna Badana Iehoiada ia bamoa neganai, Iehova vairanai “kara maoromaoro” ia karaia. (2Si 24:2) Iehoiada ia mase murinai, Ioasa be hebamo dikadia dainai Iehova ia rakatania.​—2Si 24:17-19.

Aposetolo edia negai, aposetolo Paulo ia gwau Keristani kongrigeisen be “ruma badana ta” bamona, bona kongrigeisen lalonai idia noho taudia ta ta be ‘uro’ o ruma lalonai idia gaukaralaia kohudia bamona. Bema ita ura “mai anina bada gaukaradia totona idia gaukaralaia urona” bamona ita noho, namona be Iehova ese ia moalelaia lasi karadia idia karaia taudia ita bamoa lasi, herevana ia be iseda famili ta eiava kongrigeisen tauna ta. (2Ti 2:20, 21) Unai dainai, namona be ita tura henia taudia be Iehova idia lalokau henia bona ita idia hagoadaia Ia ita hesiai henia totona.

VIDIO LADANA, HEBAMO DIKADIA DADARAIA DALANA DIBAIA ITAIA, BENA INAI HENANADAI HAERELAIA:

• Edena dala ai ta be hebamo dikana ai ia vareai diba?

• Inai vidio ai, Keristani taudia toi be dahaka ese idia ia durua hebamo dikadia idia dadaraia totona?

• Edena Baibel ena hakaua herevadia ese oi ia durua diba tura namodia oi abia hidi totona?