DAHAKA DAINAI MAI ANINA BADA: Horoa taudia bona mamoe ma haida be taunimanima idauidau idia boiria davana lasi “mauri ranu” idia inua totona.” (Apo 22:17) Unai mauri ranuna be Iehova ese kamonai taudia be kara dika bona mase amo ia ruhaia dalana ia laulaulaia. Taunimanima edia kastom bona tomadiho be idauidau dainai, namona be edia lalona do ia veria dalanai “noho hanaihanai sivarai namona” ita harorolaia.​—Apo 14:6.

KARAIA DALANA:

• Emu teritori ai idia noho taudia edia kudouna do ia hamarerea topik bona siri ta oi abia hidi. Reana haroro herevadia ena kahana ta eiava nega momo oi gaukaralaia dalana ta oi abia hidi. Nega momo ruma taudia ese edena bamona topik bona siri idia ura kamonai? Taunimanima ese nius dekenai idia kamonai bona idia herevalaia gauna ta be dahaka? Tau ta eiava hahine ta ese do ia ura kamonai gauna be dahaka?

• Haroro gaukara ai emu gabu dekenai idia noho taudia ese idia gwauraia hanamoa herevadia oi gaukaralaia.​—2Ko 6:3, 4

• Iseda Hadibaia Gaukara Ena Tulu Idauidau ai idia noho pablikeisen bona vidio ita diba namonamo, unai amo kamonai taudia dekenai ita hahedinaraia diba

• Emu teritori ai idia noho taudia edia gado ai idia hahanaia buka bona magasin haida oi daonloud

• Emu topik oi haidaua diba bema ruma tauna ia ura gau ma ta ia herevalaia. (1Ko 9:19-23) Hegeregere, dahaka do oi gwau, bema oi davaria ruma tauna ena lalokau tauna ta be vanegai sibona ia mase?

VIDIO ITAIA, BENA INAI HENANADAI HAERELAIA:

• Matamanai pablisa be ruma tauna dekenai edena topik ia herevalaia?

• Ruma tauna ena mauri lalonai dahaka ia vara?

• Unai nega ai edena Baibel siri ia gaukaralaia be maoro, bona dahaka dainai?

• Edena dala ai emu haroro herevana oi haidaua diba, emu teritori ai idia noho taudia oi durua totona?