Iehova ena hesiai gaukara lalonai tahua gaudia ita atoa neganai, iseda goada ita gaukaralaia namonamo. (1Ko 9:26) Inai nega dokona ai nega be lasi, unai dainai tahua gaudia atoa karana ese ita do ia durua iseda nega ita gaukaralaia namonamo totona. (Ef 5:15, 16) Emu ruma bese tomadiho lalonai hesiai lagani matamata totona tahua gaudia oi atoa diba, a? Oi durua totona, inai hebou pepana lalonai heduru dala haida idia noho bona mai guriguri ida oi atoa diba tahua gaudia ia herevalaia.​—Ia 1:5.

Hegeregere, ruma bese taudia ibounai idia gaukara hebou diba ta idia durua regula painia gaukara ia karaia totona, a? Bema oi daradara emu painia hora do oi hagugurua eiava lasi, namona be emu noho dalana ida ia hegeregere painia taudia oi hereva henia. (Ao 15:22) Reana emui ruma bese tomadiho lalonai painia ta oi intaviu henia diba. Bena oi hagugurua diba sediual oi torea. Bema guna painia gaukara oi karaia, emu noho dalana oi laloa bema oi hegeregere hari painia gaukara oi karaia lou totona.

Emu ruma bese lalonai haida be hua ta eiava momo lalonai heduru painia idia karaia diba, a? Bema emu goada be hegeregere lasi, reana heduru painia oi karaia diba unai amo dina ta ta ai miniti haida lalonai haroro gaukara oi karaia diba. Bema moni gaukara oi karaia eiava oi sikuli, bona wiki lalonai oi haroro diba lasi, reana mai ena holidei hua ta eiava wiken faiv oi abia hidi diba. Hesiai lagani ta ta ai, unai be September 1 ia lao August 31 ena kalenda hegeregerena, be nega namona tahua gaudia oi atoa totona. Emu ruma bese tomadiho ai hesiai lagani matamatana totona tahua gauna oi atoa. Emu kalenda ai, heduru painia do oi karaia negana oi makaia bona emu sediual oi torea.​—Ao 21:5.

VIDIO LADANA UMUI GOADA NOHO . . . PAINIA TAUDIA ITAIA, BENA INAI HENANADAI HAERELAIA:

• Iehova be edena dala ai Taihu Aamand ia durua? Taihu ena ekspiriens amo dahaka ita dibaia?