Lalokau be glue bamona famili ia hatamonaia. Bema lalokau be lasi, famili do ia hekwarahi idia lalotamona bona gaukara hebou totona. Edena dala ai headava tatau, hahine bona tama sina ese famili lalonai lalokau idia hahedinaraia diba?

Lalokau tauna ese ena hahine ena ura gaudia, lalohadai bona hemami do ia laloa bada. (Ef 5:28, 29) Ia ese tauanina dalanai ena famili edia ura gaudia do ia henia bona idia do ia durua Iehova kahirakahira idia lao totona, danu hanaihanai ruma bese tomadiho ia karaia be namo (1Ti 5:8) Lalokau hahine be ena tau henunai do ia noho bona ia do ia “matauraia bada.” (Ef 5:22, 33; 1Pe 3:1-6) Namona be tau bona hahine be mai ura ida ta ta edia dika idia gwauatao. (Ef 4:32) Lalokau tama sina be edia natudia ta ta edia namo idia laloa bada bona idia hadibaia Iehova idia lalokau henia totona. (De 6:6, 7; Ef 6:4) Natudia be sikuli dekenai dahaka hahetoho idia davaria? Edia turadia edia laloani herevadia be edena bamona idia haheaukalaia noho? Bema famili lalonai lalokau ia noho do idia noho namonamo.

VIDIO LADANA EMU FAMILI LALONAI LALOKAU HAHEDINARAIA ITAIA, BENA INAI HENANADAI HAERELAIA:

• Edena dala ai lalokau tauna ia hahedinaraia ena hahine ia naria bona laloa bada?

• Edena dala ai lalokau hahinena ese ena tau ia matauraia?

• Edena dala ai lalokau tama sina ese edia natudia dekenai Dirava ena hereva idia hadibaia?