Kahirakahira Iehova ena haheauka karana inai kara dika tanobadana totona be do ia ore. Bona tomadiho koikoi do ia haorea, idia haboua tanobada besedia ese Dirava ena taunimanima do idia tuari henia, bona Iehova ese Aramagedono ai kara dika taudia ibounai do ia alaia ore. Keristani taudia be inai mai anina bada negana idia naria noho.

Oibe, hisihisi badana lalonai do idia vara gaudia ibounai ita diba lasi. Hegeregere, ita diba momokani lasi edena negai do ia vara. Ita diba lasi politikol siahu taudia be dahaka badina do idia gaukaralaia tomadiho idia tuari henia totona. Tanobada besedia ese Dirava ena taunimanima do idia hahisia ena daudau o dahaka do ia vara be ita diba lasi. Danu, ita diba lasi Iehova be dahaka do ia gaukaralaia Aramagedono ai kara dika taudia ia hadikaia ore totona.

To Baibel siridia ese ita dekenai do idia vara gaudia ibounai ia hadibaia, unai amo mai abidadama bona gari lasi ida vaira nega ita naria noho diba. Hegeregere, ita diba ita be nega dokona ena “dina gabedia ai” ita noho. (2Ti 3:1) Ita diba tomadiho ibounai idia dagedage henia negana do ia “hakwadogia,” unai amo tomadiho momokani do idia hadikaia lasi. (Mt 24:22) Ita diba Iehova be ena taunimanima do ia hamauria. (2Pe 2:9) Bona ita diba Iehova ese kara maoromaoro bona mai ena siahu Tauna ia abia hidi, Aramagedono ai kara dika taudia do ia hadikaia ore bona hutuma bada taudia do ia hamauria.​—Apo 19:11, 15, 16.

Vaira negai do idia vara gaudia dainai taunimanima be do idia “gari dikadika bona do idia moru.” To, Iehova ese idaunegai ena taunimanima ia hamauria sivaraidia bona vaira nega totona ia gwauraia gaudia ita duahia bona laloa dobu neganai, do ita “gini maoromaoro bona [iseda] kwarana [ita] abia isi,” badina ita abia dae iseda hahemauri negana be kahirakahira.​—Lu 21:26, 28.