LAU be lagani 1926 ai, Crooksville, Ohio, United States dekenai lau vara. Egu tama sina be dubu idia lao lasi, to ai ibounai 8 idia hagoadaia dubu do ai lao. Lau be Metodis Dubu dekenai lau lao. Egu mauri lagani be 14 neganai, pasto ese lau dekenai harihari gauna ta ia henia, badina lagani ta lalonai Sunday ena hebou ta lau reaia lasi.

Unai nega ai, emai dekena hahinena, Margaret Walker, be Iehova ena witnes hahinena. Ia ese egu sinana ia vadivadi henia bona ia ida Baibel ia herevalaia. Dina ta idia ida lau helai, to egu sinana ia laloa ena stadi do lau hadikaia dainai, lau ia hamaoroa ruma do lau rakatania. To, lau ura edia hereva lau kamonai. Dina haida murinai, Margaret ese lau ia nanadaia: “Dirava ena ladana oi diba?” Lau gwau: “Taunimanima ibounai be ena ladana idia diba—unai be Dirava.” Margaret ia gwau: “Emu Baibel oi abia bona Salamo 83:18 oi duahia.” Unai lau karaia, bona lau davaria Dirava ena ladana be Iehova. Egu turadia dekenai lau heau lao bona lau gwau: “Emui ruma dekenai umui giroa lou neganai, Baibel ai Salamo 83:18 umui duahia bona Dirava  ena ladana do umui diba.” Reana unai be egu haroro ginigunana.

Baibel lau stadilaia bona lagani 1941 ai lau bapatiso. Daudau lasi murinai, lau idia abia hidi kongrigeisen buka stadi lau naria totona. Egu ruma bese lau hagoadaia buka stadi do idia mai bona idia mai. To egu tamana be ia ura lasi.

Kongrigeisen ai, maduna momo lau abia, bona tiokratik laiberi ta lau karaia. Dina ta, tamagu be egu buka ia poinia bona ia gwau: “Unai buka oi itadia? Lau ura inai ruma amo oi kokia, bona oi danu oi lao.” Ruma lau rakatania bona Zanesville, Ohio kahirakahira, daiutu ta lau abia, to egu ruma bese lau hagoadadia noho.

Egu tamana ese sinana ia koua hebou do ia lao lasi. Nega haida hebou ia lao neganai, egu tamana be ia murinai ia lao bona ruma lalonai ia veria giroa. To sinana be ruma ena iduara ma ta amo ia heau raka-lasi bona hebou dekenai ia lao. Egu sinana lau hamaoroa: “Oi laloa lasi. Unai bamona do ia karaia ela bona nega ta do ia hesiku.” Gabeai, egu tamana be sinana ia koua lou lasi.

Lagani 1943 ai, Tiokratik Haroro Sikuli ai karaia matamaia, bona tok lau henia danu. Egu tok murinai lau abia sisibana ese lau ia durua egu herevahereva dalana lau hanamoa totona.

Unai nega ai, Tanobada Tuarina Iharuana be ia vara noho. Lagani 1944 ai, lau idia boiria ami do lau vareai. Unai dainai ami taudia edia gabu, Fort Hayes, Columbus, Ohio, dekenai lau lao, unuseni lau idia sekea bona pepa haida lau hahonua. To, gaukara taudia lau hamaoroa lau be ami tauna ai do lau lao lasi. Vadaeni lau idia siaia. Dina haida murinai, tuari biaguna ta ia mai bona lau ia hamaoroa: “Corwin Robison e, oi do ai hadiburaia.”

Wiki rua murinai, kota rumana ai, diadi tauna be lau dekenai ia gwau: “Bema lau ese disisen lau karaia, oi do lau hadiburaia, bona unuseni do oi noho ela bona oi mase. Oi ura hereva ta oi gwauraia, a?” Lau haere: “Diadi e, lau be haroro tauna ta. * Taunimanima edia ruma ta ta dekenai lau haroro, bona idia momo dekenai Basileia ena sivarai namona lau gwauraia.” Diadi be hahemaoro karaia oreana dekenai ia gwau: “Hahemaoro umui karaia neganai, namo lasi inai tau matamata ena hereva umui laloa. To inai umui laloa, ia be ami gaukara totona pepa haida ia hahonua eiava lasi.” Miniti haida murinai, hahemaoro karaia oreana idia giroa lou bona idia gwau lau be lau kerere bona lau do idia hadiburaia. Bena diadi ese lau ia siaia Ashland, Kentucky, ena dibura ruma dekenai lagani 5 do lau noho.

Wiki ginigunadia rua be Columbus, Ohio, ena dibura ruma ai lau noho. Dina ginigunana ai, Iehova lau guriguri henia: “Lagani 5 dibura ruma ai lau noho diba lasi. Lau diba lasi dahaka do lau karaia.”

 Murina dinana ai, gadi taudia ese lau idia ruhaia. Dibura ruma ai ia noho tauna ta dekenai lau raka lao, ia be tau latana bona ena tauanina be bada. Ai ruaosi ai gini bona windo amo ai roha lasi. Lau ia nanadaia: “Soti oi be dahaka oi karaia?” Lau gwau: “Lau be Iehova ena Witnes tauna ta.” Ia gwau: “Momokani? Dahaka dainai iniseni oi noho?” Lau gwau: “Iehova ena Witnes taudia be tuari dekenai idia lao lasi bona taunimanima idia alaia lasi.” Ia gwau: “Taunimanima oi alaia lasi dainai, oi idia hadiburaia, a? Tatau haida idia hadiburaia, badina idia ese taunimanima idia alaia. Unai lau lalopararalaia lasi.” Lau gwau: “Lau danu.”

Bena ia gwau: “Lagani 15 lalonai, lau be dibura ruma ma ta dekenai lau noho, unuseniai emui buka haida lau duahia.” Unai neganai lau guriguri: “Iehova e, mani lau oi durua, unai amo inai tau be lau ia durua diba.” Unai nega ai, unai tau Paul, ia gwau: “Bema inai tatau ta ese oi ia dagedage henia, oi boiboi sibona. Lau ese idia do lau heatu henia.” Unai dainai, dibura ruma ai idia noho taudia 50 ese lau idia dagedage henia lasi.

Dibura naria taudia ese Ashland ena dibura ruma dekenai lau idia siaia neganai, tadikaka haida danu be unuseni idia noho. Idia bamoa karana ese lau bona ma haida edia abidadama ia hagoadaia. Wiki ta ta ai, Baibel ena karoa haida idia henia ai duahia totona, bena henanadai bona haere haida ai hegaegaelaia, gabeai tadikaka ida ai hebou bona gadara ta ai karaia. Ai be mai emai haroro teritori naria tauna danu. Ai be ruma badana ta lalonai ai noho, haba kahirakahira bedi idia atodia. Teritori naria tadikaka be lau ia hamaoroa: “Robison e, emu maduna be inai bedi taudia do oi haroro henia. Unai be emu teritori. Inai gabu ia do rakatania lasi neganai, ia oi haroro henia be namo.” Unai dala ai haroro gaukara ai karaia.

Lagani 1945 ai, Tanobada Tuarina Iharuana ia ore, to lau be dibura ruma ai lau do noho. To, egu ruma bese lau laloa momo, badina guna egu tamana ese lau ia hamaoroa: “Bema ruma amo oi lau lulua, do ia auka lasi ruma taudia lau biagua totona.” Dibura ruma lau rakatania murinai, moale gauna ta ia vara. Ena be egu tamana ia dagedage, to  egu ruma bese taudia 7 be hebou idia lao bona egu taihuna ta be ia bapatiso.

Lagani 1950 ai, Korea ai tuari ia matamaia negana, lau idia boiria lou ami lalonai lau vareai totona. Lau idia hamaoroa Fort Hayes dekenai do lau lao egu diba tohoa totona. Unai idia karaia murinai, ami tauna ta be lau ia hamaoroa: “Emu grup lalonai oi be maka namona oi abia.” Lau gwau: “Unai be namo, to ami lalonai do lau vareai lasi.” Bena 2 Timoteo 2:3 ena hereva lau gwauraia: “Lau be Keriso ena tuari tauna.” Gabeai lau dekenai ia gwau: “Oi lao diba.”

Daudau lasi murinai, Cincinnati, Ohio, ena hebouhebou ta ai Betele hebouna dekenai lau lao. Tadikaka Milton Henschel ia gwau, bema tadikaka ta ia ura Basileia totona ia gaukara goada, Betele ai ia gaukara diba. Betele gaukara totona pepa lau hahonua, lau idia abia dae, bona August 1954 ai Brooklyn Betele dekenai lau lao. Unai nega amo Betele dekenai lau gaukara.

Betele ai lau gaukara goada. Lagani momo lalonai, printa rumana bona ofesi edia ranu hasiahua masini lau naria bona loka lau hanamodia. New York City ena Assembly Hall ai lau gaukara danu.

Betele maurina lau moalelaia, hegeregere daba tomadihona, famili Gima Kohorona Stadi bona kongrigeisen ida haroro karana. Iehova ena Witnes taudia edia ruma bese ibounai be unai idia karaia be namo. Bema tama sina be edia natudia ida dina siri idia itaia, Ruma Bese Ena Tomadiho idia karaia, kongrigeisen heboudia idia lao, bona sivarai namona idia harorolaia, edia abidadama be do ia goada.

Betele bona kongrigeisen ai egu turadia be momo. Haida be horoa taudia bona edia guba helarona idia abia vadaeni. To haida be lasi. Oibe, Iehova ena hesiai taudia ibounai, Betele taudia danu, be goevadae lasi. Bema hekwakwanai ta ia vara, maino lau karaia haraga. Mataio 5:23, 24 ena hereva lau laloa. Momokani, sori herevana ita gwauraia be auka, to unai lau karaia murinai, lau moale.

Lau buruka dainai, ia auka ruma-ta-ruma-ta gaukara lau karaia, to lau hesiku lasi. Mandarin Chinese lau diba sisina dainai, Chinese taudia lau haroro henia diba. Daba haida ai, magasin 30 o 40 lau hariharilaia.

China ai lou henia ta lau karaia danu! Dina ta, kekeni ta be huahua atoa teibolo ena pepa ia hariharilaia. Bena ia dekenai Chinese gado Gima Kohorona bona Awake! lau henia. Unai magasin rua ia abia bona ia gwau iena ladana be Katie. Unai murinai, lau ia itaia negadiai, lau ia hereva henia. Ia dekenai huahua bona uma aniani edia ladadia English gado ai lau hadibaia. Danu, ia dekenai Baibel lau herevalaia, bona Baibel Hadibaia bukana ia abia. To wiki haida murinai, ia lau itaia lou lasi.

Hua haida murinai, unai pepa ia hariharilaia kekeni ma ta dekenai magasin lau henia. Murina wiki ai, lau dekenai ena fon ia henia bona ia gwau: “China dekenai oi rini.” Lau gwau: “China tauna ta lau diba lasi.” To ia ura bada dainai, fon lau abia bona lau gwau: “Namo, lau be Robison.” Ta ia haere: “Robby e, lau be Katie. Hari China dekenai lau noho.” Lau gwau: “China?” Ia gwau: “Oibe. Robby e, oi dekenai fon ia henia kekenina oi diba, a? Ia be egu tadina. Oi ese lau dekenai gau namodia momo oi hadibaia. Mani lau oi hadibaia hegeregerena ia oi hadibaia.” Lau gwau: “Katie e, do lau hekwarahi ia lau durua totona. Lau moale oi noho gabuna lau dibaia.” Katie ena tadina lau hereva henia murinai, ia lau itaia lou lasi. Herevana edeseni idia noho, lau ura Iehova idia dibaia noho.

Lagani 73 lalonai Iehova lau hesiai henia. Lau moale badina ia ese lau ia durua dainai, tuari amo lau gini siri bona dibura ruma ai lau gini goada. Danu, ena be egu tamana ia dagedage, to lau haheauka, unai ese egu ruma bese ia hagoadaia. Egu sinana, tadikaka taihu 6 be idia bapatiso. Egu tamana danu be ena kara ia haidaua, bona ia do mase lasi neganai, hebou haida ia lao.

Bema unai be Dirava ena ura, idia mase vadaeni ruma bese taudia bona turadia be tanobada matamata ai do idia toreisi lou. Unai nega ai, ita bona iseda lalokau taudia be mai moale ida Iehova do ita hesiai henia! *