1, 2. (a) Edena bamona ita diba taunimanima be Dirava idia tura henia diba? (b) Inai stadi ai dahaka do ita herevalaia?

ITA vara negana amo ela bona ita mase, ita ura ta ese ita ia lalokau henia. Oibe, taunimanima idia ura bada ta ese idia ia lalokau henia. To, Iehova ese ita ia lalokau henia be mai anina bada. Taunimanima momo idia laloa idia be Dirava idia tura henia diba lasi, badina ia ita itaia diba lasi bona ia be Siahu Ibounai Diravana. To unai be momokani lasi!

² Baibel amo ita diba taunimanima haida be Dirava idia tura henia. Namona be edia haheitalai amo diba ita abia. Dahaka dainai? Badina iseda mauri lalonai Dirava ita tura henia be mai anina bada. Mani Aberahamo ena haheitalai ita laloa. (Iamesi 2:23 duahia.) Ia be edena dala ai Dirava ena turana ai ia lao? Aberahamo be Dirava ia abidadama henia, unai dainai ia idia gwauraia “abidadama taudia ibounai edia tamana.” (Roma  4:11) Iena kara oi herevalaia neganai, sibona oi nanadaia, ‘Edena dala ai Aberahamo ena abidadama do lau tohotohoa bona egu hetura karana Iehova ida do lau hagoadaia?’

3, 4. (a) Dahaka ese reana Aberahamo ena abidadama ia tohoa? (b) Dahaka dainai Aberahamo ia ura Isako ia bouboulaia?

³ Mani oi laloa, Aberahamo ena mauri lagani be 125 bamona bona metairametaira ororo ia daekau noho. ^[1] Iena natuna Isako be ia murinai ia raka, ena mauri lagani be 25 bamona. Isako be lahi au ia huaia, bona Aberahamo be kaia bona lahi karaia gaudia ia huaia. Reana Aberahamo ena mauri lalonai, unai be laolao aukana. Dahaka dainai? Aberahamo ia buruka dainai, a? Lasi, to badina Iehova ese ia hamaoroa ena natuna do ia bouboulaia!—Gen. 22:1-8.

⁴ Reana unai ese Aberahamo ena abidadama ia tohoa. Haida idia gwau Dirava ese Aberahamo ia noia ena natuna do ia bouboulaia neganai, ia be ia hebogahisi lasi. Bona haida idia gwau Aberahamo be mai ura ida unai ia karaia, badina ena natuna ia lalokau henia lasi. Taunimanima be unai bamona idia hereva, badina idia be abidadama lasi eiava abidadama momokani ena anina idia diba lasi. (1 Kor. 2:14-16) To Aberahamo be Dirava ia kamonai henia sibona lasi, ia be Dirava ia abidadama henia momokani. Ia diba Iehova be ia do ia noia lasi dika do ia havaraia gauna ta ia karaia totona. Ia diba bema ia kamonai, Iehova ese ia bona ena natuna do ia hanamoa. Dahaka ese Aberahamo ena abidadama ia hagoadaia? Iena diba bona ia vara gauna ese ena abidadama idia hagoadaia.

5. Aberahamo be edena dala ai Iehova ia dibaia bona unai diba ese edena bamona ia ia durua?

⁵ Diba. Aberahamo be Uru dekenai ia tubu daekau. Unai hanua taudia bona iena tamana be dirava koikoidia idia tomadiho henia. (Ios. 24:2) To, Aberahamo be edena bamona Iehova ia diba? Baibel ia gwau Noa ena natuna Sema be Aberahamo ena varavara. Ia be ia mauri noho ela bona Aberahamo ena mauri lagana be 150. Sema ena abidadama be ia goada, bona reana ia ese ena varavara dekenai Iehova ia herevalaia. Ita diba momokani lasi, to reana Aberahamo be unai dala amo Iehova ia dibaia. Aberahamo ia dibaia gaudia dainai Iehova ia lalokau henia, bona unai diba ese iena abidadama idia hagoadaia.

6, 7. Aberahamo dekenai idia vara gaudia ese edena dala ai iena abidadama ia hagoadaia?

⁶ Ia Vara Gauna. Aberahamo dekenai dahaka ia vara, bona unai ese iena abidadama ia hagoadaia? Haida idia gwau, lalohadai ese hemami ia havaraia bena gabeai kara ta oi karaia. Dirava dekenai ia dibaia gaudia ese Aberahamo ena kudouna ia hamarerea dainai, “Ataiai Momokani Dirava, guba bona tanobada ia karaia Diravana “ia matauraia bada. (Gen. 14:22) Baibel ese unai bamona hemataurai karana ia gwauraia, ‘Dirava gari henia’ karana. (Heb. 5:7) Unai dainai Dirava ita tura henia totona, namona be Dirava ita gari henia. (Sal. 25:14) Oibe, unai ese Aberahamo ia hagoadaia Iehova ia kamonai henia totona.

⁷ Dirava ese Aberahamo bona Sara ia hamaoroa edia hanua Uru do idia rakatania bona tano idauna dekenai do idia lao. Idia be idia buruka vadaeni, bona edia mauri dinadia ibounai lalonai palai ruma dekenai do idia noho. Ena be Aberahamo ia diba  hekwakwanai momo do ia davaria, to Iehova ia kamonai henia. Iena kamonai karana dainai, Dirava ese ia hanamoa bona ia gimaia. Hegeregere, Aberahamo ena adavana hairaina, Sara, be idia abia lao bona kahirakahira Aberahamo ena mauri do ia haboioa, to Iehova ese nega momo hoa dalanai Aberahamo bona Sara ia gimaia. (Gen. 12:10-20; 20:2-7, 10-12, 17, 18) Unai ese Aberahamo ena abidadama ia hagoadaia.

8. Edena dala ai iseda hetura karana Iehova ida ita hagoadaia diba?

⁸ Iehova ita tura henia diba, a? Oibe! Aberahamo bamona, namona be Iehova ita dibaia. Bona danu idia vara gaudia amo diba ita abia. Hari, ita dibaia gaudia be Aberahamo ena ia hanaia. (Dan. 12:4; Roma 11:33) Oibe, Baibel amo “guba bona tanobada ia karaia” tauna ita dibaia diba. Ita dibaia gaudia ese ita do ia durua, Iehova ita lalokau henia bona matauraia totona. Danu, unai ese ita do ia hagoadaia Dirava ita kamonai henia totona. Unai ita karaia neganai, ia ese ita ia gimaia bona hanamoa dalana do ita itaia bona unai ese eda abidadama do ia hagoadaia. Bona mai kudouna ibounai ida Iehova ita hesiai henia neganai, maino ai do ita noho bona do ita moale. (Sal. 34:8; Aon. 10:22) Oibe, iseda diba ia bada ia lao neganai, iseda hetura karana ia ida be do ia goada.

9, 10. (a) Hetura karana ia goada totona, dahaka ita karaia be namo? (b) Dahaka ese ia hahedinaraia Aberahamo be iena hetura karana Iehova ida ia laloa bada?

⁹ Hetura karana be dava bada gauna ta bamona. (Aonega Herevadia 17:17 duahia.) Ia be herahera sibona totona ita gaukaralaia dava bada hodu ta bamona lasi, to ia be flaoaflaoa hairaina ta bamona. Unai flaoaflaoa be rigi matamata ia atoa totona, ranu ita henia bona ita naria namonamo be namo. Unai hegeregerena, iseda hetura karana ita naria namonamo be namo. Aberahamo be iena hetura karana Iehova ida ia laloa bada dainai, Iehova ia rakatania lasi. Edena bamona unai ia karaia?

¹⁰ Aberahamo be Dirava ia gari henia bona kamonai henia. Hegeregere, ia, ena ruma bese bona hesiai taudia be Kanana dekenai idia lao neganai, ia karaia abia hida ibounai dekenai Iehova ena heduru ia noia. Aberahamo ena mauri lagani be 99 neganai, Iehova ese ia hamaoroa iena ruma ai idia noho tatau ibounai edia kopina do ia utua, unai nega ai Isako be ia do vara lasi. Aberahamo be ia daradara o Iehova dekenai ekskius idauidau ia gwauraia, a? Lasi, “unai dina dekenai” Iehova ia abidadama henia bona ia kamonai henia.—Gen.17:10-14, 23.

11. Dahaka dainai Aberahamo be Sodoma bona Gomora dainai ia lalohekwarahi, bona edena dala ai Iehova ese ia durua?

 ¹¹ Aberahamo be nega ibounai Iehova ia kamonai henia, gau maragidia dekenai danu, unai dainai edia hetura karana ia goada. Ia mamia ia be Iehova ia hereva henia diba, bona henanadai aukadia edia haere abia totona Iehova ena heduru ia noia diba. Hegeregere, Iehova ia gwau Sodoma bona Gomora do ia hadikaia neganai, Aberahamo be ia laloa momo. Dahaka dainai? Ia lalohekwarahi, badina kara maoromaoro taudia be kara dika taudia ida do idia mase hebou. Reana iena vavana Lota bona ena ruma bese ia laloa, idia be Sodoma ai idia noho. To, Aberahamo ese “tanobada ibounai ena kota biaguna,” Iehova, ia abidadama henia, bona mai manau ida Iehova dekenai iena lalohekwarahi ia gwauraia. Iehova be mai haheauka ida Aberahamo dekenai ia hahedinaraia Ia be hebogahisi Diravana. Bona taunimanima ia hahemaoro henidia neganai, ia ese kara maoromaoro taudia ia tahua bona ia hamauridia.—Gen. 18:22-33.

12, 13. (a) Aberahamo ese ia abia dibana bona ia dekenai idia vara gaudia ese edena dala ai ia idia durua? (b) Edena bamona ita diba Aberahamo be Iehova ia abidadama henia?

¹² Oibe, Aberahamo ese ia abia dibana bona ia dekenai idia vara gaudia ese iena hetura karana Iehova ida ia hagoadaia. Unai dainai gabeai, Iehova ese Aberahamo ia hamaoroa iena natuna do ia bouboulaia neganai, ia diba Iehova be haheauka, hebogahisi, bona kara momokani Diravana, bona ia do ia gimaia. Aberahamo ia diba momokani Iehova be kara auka Diravana lasi! Dahaka dainai unai bamona ita gwau diba?

¹³ Aberahamo be ena hesiai taudia ia do rakatania lasi neganai, ia gwau: “Umui ruaosi doniki danu iniseni umui noho. Lau be inai mero danu do ai lao unuseni, tomadiho totona, gabeai do ai giroa mai umui dekenai.” (Gen. 22:5) Aberahamo ena hereva ena anina be dahaka? Aberahamo be Isako do ia bouboulaia dainai, ia gwau ia be Isako ida do ia giroa mai neganai, ia be ena hesiai taudia ia koia, a? Lasi. Baibel ia gwau Aberahamo ia diba Iehova ese Isako ia hatorea isi lou diba. (Heberu 11:19 duahia.) Danu, Aberahamo ia diba ena be ia bona Sara idia buruka momokani, to Iehova ese idia dekenai natuna ta ia henia. (Heb. 11:11, 12, 18) Unai dainai ia abia dae momokani, Iehova be mai ena siahu kara ta ia karaia totona. Ena be Aberahamo be unai dina ai do ia vara gauna ia diba lasi, to ia abia dae momokani, Iehova ese ena natuna do ia hatorea isi lou, unai amo Dirava ena gwauhamata ibounai do idia guguru. Unai dainai Aberahamo idia gwauraia, “abidadama taudia ibounai edia tamana.”

14. Iehova oi hesiai henia noho lalonai, dahaka hahetoho oi davaria, bona edena dala ai Aberahamo ena haheitalai ese oi ia durua?

 ¹⁴ Hari Iehova ese ita ia hamaoroa lasi iseda natudia do ita bouboulaia, to ita ia noia iena hahegani ita badinaia totona. Nega haida ia henia hahegani ena badina ita lalopararalaia lasi eiava ia auka ita badinaia totona. Unai oi mamia danu, a? Haida dekenai haroro gaukara be auka. Reana idia hemarai dainai, ia auka idia diba lasi taudia idia hereva henia totona. Haida be idia ura lasi edia gaukara eiava sikuli turadia amo idia idau. (Eso. 23:2; 1 Tes. 2:2) Bema ta ese oi ia noia gaukara aukana ta oi karaia totona, namona be Aberahamo ena abidadama bona lalogoada karana oi laloa. Abidadama tatau bona hahine edia haheitalai ita laloa dobu neganai, unai ese ita do ia hagoadaia edia kara ita tohotoho bona iseda Turana, Iehova, kahirakahira ita lao totona.—Heb. 12:1, 2.

15. Edena bamona ita diba Aberahamo be Iehova ena hahegani ia badinaia dainai ia lalohisihisi lasi?

¹⁵ Aberahamo be Iehova ena hahegani ia badinaia dainai ia lalohisihisi, a? Baibel ia gwau Aberahamo be “ia mase, ia buruka momokani neganai.” (Gen. 25:8) Ena mauri lagani be 175, to ia ese ena mauri daudauna ia moalelaia. Dahaka dainai? Badina ia dekenai ena hetura karana Iehova ida be mai anina bada. To namo lasi ita laloa ia ura lasi vaira nega ai ia mauri.

16. Paradaiso ai Aberahamo be dahaka do ia moalelaia?

¹⁶ Baibel ia gwau Aberahamo “be taoni mai ena badina aukana ia naria noho, unai taoni ena palani ia karaia tauna bona ia haginia tauna be Dirava.” (Heb. 11:10) Aberahamo ia abia dae momokani nega ta unai taoni, Dirava ena Basileia unai, ese tanobada do ia lohiaia. Bona unai do ia vara momokani! Mani oi laloa, Aberahamo be mai moale ida tanobada paradaisona ai do ia noho, bona ena hetura karana Dirava ida do ia goadalaia noho. Iena abidadama karana ese lagani tausen momo lalonai Dirava ena hesiai taudia ia durua dalana ia kamonai neganai, do ia moale bada! Danu do ia laloparara, Moraia Ororona ai ia karaia boubouna ese mai anina bada gauna ta ia laulaulaia. (Heb. 11:19) Bona do ia laloparara iena natuna Isako ia bouboulaia gwauraia neganai ia mamia hisihisina ese taunimanima milioni momo ia durua. Oibe, idia ia durua Iehova be ena Natuna Iesu Keriso be boubou gauna bamona ia henia neganai, ia mamia hisihisina idia lalopararalaia totona. (Ioa. 3:16) Momokani, Aberahamo ena haheitalai ese ita ibounai ia durua mauri davalaia boubouna ita laloa bada totona, unai be lalokau kara hereadaena!

17. Ita ibounai be dahaka ita karaia be namo, bona stadi gabena ai dahaka do ita herevalaia?

¹⁷ Namona be ita ibounai ese Aberahamo ena abidadama ita tohotohoa. Ia bamona, namona be Iehova ita dibaia noho bona ia ita kamonai henia, unai amo iena hanamoa bona gimaia karana do ita itaia. (Heberu 6:10-12 duahia.) Namona be Iehova ita tura henia ela bona hanaihanai! Stadi gabena ai, Dirava idia tura henia abidadama taudia toi edia sivarai do ita herevalaia.