1, 2. Edena dala ai Davida ia hahedinaraia ia be Dirava ia badinaia? (Laulau ginigunana herevalaia.)

MANI oi laloa Iuda ena tano gagaena ai, Saulo bona ena tuari taudia 3,000 be Davida idia tahua noho idia alaia mase totona. To hanuaboi ta, Davida bona ena tatau ese Saulo bona ena tuari taudia idia kamepa gabuna idia davaria. Idia ibounai idia mahuta dainai, Davida bona Abisai be mai regerege lasi ida tuari taudia idia raka hanaia bona Saulo dekenai idia lao. Abisai be Davida dekenai ia gwau: “Mani emu kara, harihari lau ese sibona ena io dekenai, Saulo do lau gwadaia mase, nega tamona sibona. Lau ese nega rua do lau gwadaia lasi, momokani.” To Davida ese ia koua, ia gwau: “Do oi hadikaia lasi! Lohiabada ese ia abia hidi vadaeni, king totona. Bema tau ta ese Saulo ia hadikaia, Lohiabada ese unai tau do ia hadikaia momokani.” Ma ia gwau: “Lohiabada ese egu dala ia koua, lau ese Lohiabada ia abia hidi king totona tauna lau hadikaia diba lasi momokani.”—1 Sam. 26:8-12.

 ² Davida ia laloparara bema ia ura Dirava ia badinaia, Saulo do ia matauraia bona ia do ia hamasea lasi. Dahaka dainai? Badina Dirava ese Saulo ia abia hidi Israela ena king ai do ia lao. Hari danu, Iehova ia ura iena hesiai taudia ibounai be ia idia badinaia bona ia abia hidi taudia idia matauraia.—Mika 6:8, NWT.

3. Abisai ese edena bamona ia hahedinaraia Davida ia matauraia?

³ Abisai ese Davida ia matauraia, badina ia diba Dirava ese Davida ia abia hidi king ai do ia lao. To, Davida be king dagina ia abia murinai, kara dika badadia ia karaia. Oibe, Uria ena adavana ida ia mahuta hebou bena Ioaba ia hamaoroa tuari lalonai Uria do idia hamasea. (2 Sam. 11:2-4, 14, 15; 1 Siv. 2:16) Abisai be Ioaba ena kakana dainai, reana Davida ese ia karaia gauna ia diba, to Davida ia matauraia noho. Danu, Abisai be tuari biaguna dainai, ia sibona be king ai ia halaoa diba, to unai ia karaia lasi. Ia ese Davida ia hesiai henia bona iena inai taudia amo ia gimaia.—2 Sam. 10:10; 20:6; 21:15-17.

4. (a) Dahaka ese ia hahedinaraia Davida be Dirava ia badinaia? (b) Inai stadi ai dahaka do ita herevalaia?

⁴ Davida ena mauri lalonai, ia ese Iehova ia badinaia. Ia matamata neganai, Iehova bona Israela taudia ia gwauraia dika tauna Goliata ia alaia mase. (1 Sam. 17:23, 26, 48-51) Davida be king ai ia lao neganai, ia karaia kara dika dainai Iehova ena peroveta tauna Natana amo matahakani ia abia. Maoromaoro unai matahakani ia abia dae bona ia helalo-kerehai. (2 Sam. 12:1-5, 13) Gabeai, ia buruka neganai, ia ese dava bada gaudia momo ia henia Iehova ena dubu helaga haginia gaukarana durua totona. (1 Siv. 29:1-5) Oibe, ena be Davida be kara dika badadia ia karaia, to Dirava ia badinaia noho. (Sal. 51:4, 10; 86:2) Inai stadi ai, ita ese Davida bona iena nega ai idia noho taudia haida do ita herevalaia. Edia sivarai ese ita do ia durua Iehova ita badinaia noho totona. Bona kara namodia ma haida do ita herevalaia danu.

5. Abisai ena kara amo dahaka ita dibaia?

⁵ Abisai ia ura Saulo ia alaia mase neganai, ia ura hahedinaraia ia be Davida ia matauraia. To, Davida ia diba “Lohiabada ese ia abia hidi” tauna ia alaia mase be kerere, unai dainai Abisai ia koua. (1 Sam. 26:8-11) Unai amo ita dibaia gauna be inai: Bema ita ura ta ita badinaia, namona be Baibel ena hakaua herevadia ita tahua guna.

6. Ita ura ita lalokau henia taudia ita badinaia neganai, dahaka ita laloatao be namo?

⁶ Vaia ita ura ita lalokau henia taudia ita badinaia, hegeregere iseda turana eiava ruma bese tauna ta. To ita be goevadae lasi dainai, iseda laloa dalana ese ita ia hakaua kerere diba. (Ier. 17:9) Unai dainai bema ita lalokau henia tauna ta be kara kererena ia karaia bona hereva momokani ia rakatania, Iehova ita badinaia be gau badana.—Mataio 22:37 duahia.

7. Edena dala ai taihu ta be Dirava ia badinaia?

⁷ Bema emu ruma bese tauna ta be kongrigeisen amo idia atoa siri, namona be Iehova oi badinaia. Taihu ta ena ladana be Anne, ^[1] iena sinana be kongrigeisen amo idia atoa siri. Dina ta ena sinana be Anne ia rini henia, badina ia ura do ia vadivadi. Ia gwau ia be ia moale lasi, badina ruma bese taudia be ia idia hereva henia lasi. Anne ese ena sinana ia hebogahisi henia, to ia hamaoroa ia dekenai revareva ta do ia torea. Unai revareva ia do torea lasi neganai, ia ese Baibel ena hakaua hereva haida ia laloa. (1 Kor. 5:11; 2 Ioa. 9-11) Bena mai manau ida revareva amo ena sinana ia hamaoroa, ia kara dika bona ia helalo-kerehai lasi neganai, ia be ruma bese ia rakatania. Bona ia hamaoroa bema ia ura ia  moale, Iehova dekenai ia giroa lou be namo.—Iam. 4:8.

8. Dirava ita badinaia noho totona, edena kara ese ita idia durua diba?

⁸ Davida ena nega ai, Dirava idia badinaia taudia haida be idia manau, hebogahisi idia hahedinaraia, bona idia lalogoada. Unai kara ese ita idia durua diba danu.

9. Dahaka dainai Abinere ia ura Davida ia hamasea?

⁹ Davida ese Goliata ena kwarana be King Saulo dekenai ia laohaia neganai, Saulo ena natuna Ionatana bona Israela ena tuari biaguna, Abinere, ese unai idia itaia. Unai nega amo Ionatana be Davida ena turana namona ai ia lao. (1 Sam. 17:57–18:3) Gabeai, Saulo ia ura Davida ia alaia neganai, Abinere ese Saulo ia durua. (1 Sam. 26:1-5; Sal. 54:3) Ionatana bona Abinere idia diba Dirava ese Davida ia abia hidi Israela ena king ai do ia lao. Unai dainai Saulo ia mase murinai, Abinere ese Davida ia durua be namo. To lasi, ia ese Saulo ena natuna Isiboseta be king ai ia halaoa toho. Gabeai, ia ura sibona be king ai ia halaoa, reana unai dainai King Saulo ena adavana ma ta ida ia mahuta hebou. (2 Sam. 2:8-10; 3:6-11) Dahaka dainai Ionatana bona Abinere edia lalohadai Davida dekenai be idau? Badina Ionatana be Iehova ia badinaia bona ia manau, to Abinere be unai bamona lasi.

10. Dahaka dainai Abesaloma be Dirava ia badinaia lasi?

¹⁰ King Davida ena natuna, Abesaloma, be ia manau lasi dainai, Dirava ia badinaia lasi. Ia ura ia be king ai do ia lao, unai dainai “iena kariota ta ia abia, bona hosi, bona tatau 50, iena vairana dekenai do idia heau totona”! (2 Sam. 15:1) Danu, taunimanima edia lalona ia veria ia idia badinaia totona. Ma danu, ia ura iena tamana ia hamasea, ena be ia diba Iehova ese Davida be Israela ena king ai ia halaoa.—2 Sam. 15:13, 14; 17:1-4.

11. Abinere, Abesaloma, bona Baruku amo dahaka ita dibaia?

¹¹ Bema ta ia manau lasi bona ia ura dagi bada ia abia, do ia auka Dirava ia badinaia totona. To ita be Iehova ita lalokau henia dainai, ita ura lasi Abinere bona Abesaloma edia kara ita tohotohoa bona sibona iseda namo ita tahua. Danu, ita naria namonamo be namo, dika ita ura moni momo ita abia o ladana bada moni gaukara ita tahua. Unai ese iseda hetura karana  Iehova ida ia hadikaia diba. Guna Ieremia ena seketere, Baruku, be gau ma ta ia ura henia dainai, Dirava hesiai henia karana ia moalelaia lasi. Bena Iehova be ia dekenai ia gwau: “Lau Lohiabada ese lau haginia vadaeni gauna lau veria diho noho, bona lau ese lau hadoa gauna be lau kokia noho. Inai bamona do lau karaia inai tano ena kahana ibounai dekenai. To oi ese gau namo herea, oi sibona totona, oi tahua noho, a?” (Ier. 45:4, 5) Baruku ese unai matahakani ia abia dae. Ita danu ese unai matahakani ita abia dae be namo, badina kahirakahira inai tanobada dikana do ia ore.

12. Bema sibona iseda namo ita laloa, dahaka ia vara diba?

¹² Daniel be Mexico ai ia noho. Ia ura adavaia kekenina be Iehova ia tomadiho henia lasi. Daniel ia gwau: “Ena be lau painia, to ia lau tore henia noho.” To gabeai ia laloparara ia be sibona ena namo ia tahua bona Iehova ia badinaia lasi. Unai dainai ia manau bona elda ta dekenai iena sivarai ia gwauraia. Daniel ia gwau: “Iena heduru amo lau laloparara, bema lau ura Dirava lau badinaia, unai kekeni do lau tore henia lasi. Unai negai lau taitai bona guriguri momo lau gwauraia, unai murinai unai kekeni lau rakatania. Daudau lasi egu haroro gaukara lau goadalaia.” Hari Daniel be Iehova ia lalokau henia taihuna ia adavaia, bona sekit gaukara ia karaia.

13. Edena dala ai Natana ia hahedinaraia ia be Dirava ia badinaia bona Davida ia matauraia?

¹³ Iehova ita badinaia neganai, do ita ura ma haida ita durua dala maorona idia badinaia totona. Peroveta tauna Natana be Iehova ia badinaia bona Davida ia matauraia. Davida ia heudahanai bona unai hahine ena tau ia alaia murinai, Iehova ese Natana ia siaia Davida ia sisiba henia totona. Natana be Iehova ia kamonai henia bona mai lalogoada ida ia lao, to mai aonega bona manau ida Davida ia hereva henia. Ia ura Davida ia durua, unai amo do ia laloparara ia karaia karana be dika momokani. Unai dainai kohu momo tauna ese ogogami tauna ena mamoe ia henaoa karana ena sivarai ia gwauraia. Davida be unai ia kamonai neganai, kohu momo tauna dekenai ia badu dikadika. Bena Natana ia gwau: “Unai kohu momo tauna be oi!” Bena Davida ia laloparara ia be Iehova dekenai ia kara dika.—2 Sam. 12:1-7, 13.

14. Edena bamona do oi hahedinaraia Iehova oi badinaia bona ma haida oi hebogahisi henidia?

 ¹⁴ Namona be Iehova oi badinaia bona ma haida oi hebogahisi henia. Hegeregere, reana oi diba tadikaka ta be kara dika badana ta ia karaia. Reana iena kerere do oi hunia, badina ia be emu turana o emu ruma bese tauna ta. To oi diba Iehova oi badinaia be mai anina bada. Unai dainai Natana bamona, Iehova do oi kamonai henia, bona mai manau ida emu tadikaka oi kara henia. Ia oi hamaoroa elda taudia edia heduru do ia tahua bona unai ia karaia haraga be namo. Bema lasi, oi ese elda taudia oi hamaoroa be namo. Unai oi karaia neganai, oi be Iehova oi badinaia. Ma danu, oi hahedinaraia emu tadikaka oi hebogahisi henia, bona elda taudia ese ia do idia durua Iehova ia tura henia lou totona. Oibe, manau dalanai, ia do idia hamaoromaoroa.—Levitiko 5:1; Galatia 6:1 duahia.

15, 16. Dahaka dainai Husai ia lalogoada be namo?

¹⁵ King Davida ena turana ta ena ladana be Husai. Taunimanima idia ura Abesaloma be king ai idia halaoa neganai, Husai be mai lalogoada ida, Davida bona Dirava ia badinaia. Ia diba Davida ia heau vadaeni bona Abesaloma be iena tuari taudia ida Ierusalema dekenai ia lao. (2 Sam. 15:13; 16:15) To Husai be dahaka ia karaia? Davida ia rakatania bona Abesaloma ia durua, a? Lasi. Ena be Davida ia buruka bona taunimanima momo idia ura ia idia hamasea, to Husai be Davida ia badinaia, badina Davida be Iehova ese ia abia hidi king. Unai dainai Husai be Olive Ororona dekenai ia lao Davida ia hedavari henia totona.—2 Sam. 15:30, 32.

¹⁶ Davida ese Husai ia noia Ierusalema dekenai do ia giroa bona koikoi dalanai Abesaloma do ia tura henia, unai amo Abesaloma be ena sisiba do ia kamonai henia, to Ahitopela ena lasi. Ena be Husai ia diba ia be ena mauri ia haboioa diba, to mai lalogoada bona gari lasi ida Davida ena hereva ia kamonaia bona Iehova ia badinaia. Davida ena guriguri hegeregerena, Abesaloma ese Husai ia kamonai henia, to Ahitopela lasi.—2 Sam. 15:31; 17:14.

17. Dahaka dainai ita lalogoada be namo?

¹⁷ Iehova ita badinaia totona, ita lalogoada be namo. Ita momo be iseda ruma bese, gaukara turadia, o gavamani taudia edia dagedage karadia ita haheaukalaia. Hegeregere, Taro be Japan ai ia noho. Ia maragi negana amo, ia be ena tama sina edia ura sibona ia badinaia. Unai ia karaia, badina idia ia lalokau henia bona ia ura idia ia hamoalea. To, Iehova ena Witnes taudia ida Baibel ia stadilaia matamaia neganai, iena tama sina ese idia koua. Unai ia vara dainai ia lalohisihisi, bona ia auka idia ia hamaoroa, ena lalona ia hadaia hebou dekenai do ia lao. Taro ia gwau: “Idia badu dikadika dainai, lau idia koua bona lagani momo idia lau vadivadi henia lasi. Dirava lau noia lalogoada do ia henia, unai amo egu disisen do lau badinaia. Hari idia badu lasi, bona nega ta ta idia lau vadivadi henia.”—Aonega Herevadia 29:25 duahia.

18. Inai stadi ese edena dala ai oi ia durua?

¹⁸ Davida, Ionatana, Natana, bona Husai bamona, bema Iehova ita badinaia, moale korikori do ita davaria. To, ita ura lasi Abinere bona Abesaloma edia kara ita tohotohoa, idia be Dirava idia badinaia lasi. Momokani, ita be goevadae lasi taudia bona kerere ita karaia. To, gau badana be iseda mauri ibounai lalonai Iehova ita badinaia.