1, 2. Dahaka dainai Ionatana ena hetura bona badinaia karana Davida ida be haheitalai namona?

DAVIDA ese tau badana Goliata ia hamasea bona unai “Pilistia tauna ena kwarana” be Ionatana ena tamana, King Saulo, dekenai ia abia lao neganai, reana Ionatana ia hoa bada. (1 Sam. 17:57) Bona ia abia dae momokani Dirava be Davida ida ia noho. Oibe, unai nega amo, Ionatana bona Davida be tura namodia ai idia lao. Bona idia gwauhamata ta ta do idia badinaia. (1 Sam. 18:1-3) Ionatana ena mauri ibounai lalonai, Davida ia badinaia.

² Ena be Iehova ese Davida ia abia hidi Israela ena king ai do ia lao, to Ionatana ese Davida ia tura henia noho. Bona Saulo ia ura Davida ia hamasea neganai, Ionatana ia lalohekwarahi bada. Bona ia diba Davida be Horese ena tano gagaena ai ia noho, unai dainai ia lao Davida ia hagoadaia totona. Davida ia hamaoroa: “Do oi gari lasi, badina lauegu tamana Saulo ese oi do ia hadikaia diba lasi. Ia diba vadaeni oi be Israela ena king do oi lao, bona ia diba danu lau ese oiemu iharuana do lau lao.”—1 Sam. 23:16, 17.

3. Ionatana dekenai dahaka be mai anina bada? (Laulau ginigunana herevalaia.)

 ³ Tanobada hegegemadai, momo be idia ura ma ta idia tura henia. Vadaeni Ionatana be Davida sibona ia tura henia, a? Lasi, Ionatana ena mauri lalonai, Dirava badinaia karana be mai anina bada. Unai dainai Dirava ese Davida ia abia hidi king ai do ia lao neganai, Ionatana ia mama lasi, to Davida ia tura henia noho. Danu, Davida ia hagoadaia Iehova dekenai do ia tabekau. Oibe, idia ruaosi ese Iehova idia badinaia. Bona idia karaia gwauhamata idia badinaia: “Iehova be lau bona oi padanai bona lauegu natudia bona oiemu natudia padanai do ia noho ela bona hanaihanai.”—1 Sam. 20:42, BHḡ.

4. (a) Edena dala ai moale korikorina do ita davaria? (b) Inai stadi ai dahaka do ita herevalaia?

⁴ Namona be iseda ruma bese, turadia, bona tadikaka taihu ita tura henidia. (1 Tes. 2:10, 11) Bona Iehova ita badinaia noho be gau badana. Badina ia ese ita dekenai mauri ia henia! (Apok. 4:11) Ia ita badinaia neganai, moale korikorina do ita davaria. Nega aukadia ai danu, Dirava ita badinaia be namo. Inai stadi ai, do ita itaia edena dala ai Ionatana ena haheitalai ese ita do ia durua Iehova ita badinaia noho totona: (1) Bema ita laloa siahu ia abia tauna ta do ita matauraia lasi, (2) bema ita daradara daika do ita badinaia, (3) bema ita ia hakaua tadikakana ese ita ia kara namo henia lasi, bona (4) bema ia auka iseda gwauhamata ita badinaia totona.

5. Dahaka dainai ia auka Israela taudia ese Dirava idia badinaia totona?

⁵ Ionatana bona Israela taudia be hekwakwanai badana ta idia davaria. Ionatana ena tamana, King Saulo, be ia gwau-edeede dainai, Iehova ese ia dadaraia. (1 Sam. 15:17-23) To, Dirava ese maoro ia henia, lagani momo ia lohia totona. Unai dainai ia auka taunimanima ese Dirava idia badinaia totona, badina “Lohiabada ena terona” ai ia helai tauna be kara dika momo ia karaia.—1 Siv. 29:23.

6. Dahaka ese ia hahedinaraia Ionatana be Iehova ia badinaia?

⁶ Ionatana be Iehova ia badinaia. Saulo ese Dirava ia gwau-edeede henia matamaia neganai, Ionatana ese ia karaia karana mani oi laloa. (1 Sam. 13:13, 14) Unai negai, Pilistia tuari taudia be Israela taudia tuari henia totona idia mai, edia kariota ibounai be 30,000. ^[1] Saulo ena tuari taudia be 600 bona ia bona Ionatana sibona be mai edia tuari kohu. To, Ionatana ia gari lasi. Ia ese peroveta tauna Samuela ena hereva ia laloa, ia gwau: “Lohiabada ese gwauhamata metauna ia karaia vadaeni, ia ese umui do ia rakatania lasi.” (1 Sam. 12:22) Unai dainai tuari tauna ma ta ia hamaoroa: “Lohiabada ia ura hamauria kara ia karaia neganai, taunimanima momo, o taunimanima momo lasi, be idia koua diba lasi.” Vadaeni ia bona unai tuari tauna ese Pilistia ena orea ta idia tuari henia bona 20 idia hamasea. Ionatana be Iehova ia abidadama henia, bona Iehova ese ia hanamoa. Oibe, Iehova ese tano mareremarere ia havaraia bona Pilistia taudia idia gari bada. Bena ta ta idia alaia matamaia bona Israela taudia idia kwalimu.—1 Sam. 13:5, 15, 22; 14:1, 2, 6, 14, 15, 20.

7. Ionatana ese ena tamana be edena bamona ia kara henia?

⁷ Ena be Saulo ese Iehova ia badinaia lasi, to Ionatana ese ena tamana ia kamonai  henia noho. Hegeregere, Iehova ena taunimanima gimaia totona, tuari lalonai iena tamana ia durua.—1 Sam. 31:1, 2.

8, 9. Maoro idia abia taudia ita matauraia karana amo edena dala ai Dirava ita badinaia?

⁸ Ionatana hegeregerena, bema gavamani henunai ita noho, ita hahedinaraia Iehova ita badinaia. Iehova ese idia dekenai maoro ia henia ita idia lohiaia totona, unai dainai ia ura idia ita matauraia. (Roma 13:1, 2 duahia.) Oibe, gavamani ita matauraia be namo, ena be idia kara koikoi bona ita laloa idia do ita matauraia lasi. Momokani, Iehova amo maoro idia abia taudia ibounai ita matauraia be namo, iseda ruma bese ai bona kongrigeisen ai danu.—1 Kor. 11:3; Heb. 13:17.

⁹ Olga ^[2] be Sauth America ai ia noho bona Iehova ia badinaia. Ia be Iehova ena Witnes hahinena dainai, nega momo iena adavana ese ia kara auka henia, ia ida ia herevahereva lasi o ia hereva dika henia, to ia ese ena adavana ia matauraia. Nega ta, taihu ia hamaoroa ia do ia rakatania bona edia natudia ida do ia lao, to Olga be “ena dika davana” ia haloua lasi. Ia ese kara namodia ia hahedinaraia, hegeregere iena aniani ia nadua, iena dabua ia huria, bona edia natudia bona tau ena famili ia naria. (Roma 12:17) Bema ia hegeregere, iena adavana ena famili ia vadivadi henia. Hegeregere, iena adavana be ena tamana ena fineral totona taoni ma ta dekenai ia ura lao neganai, edia laolao totona gau ibounai ia hegaegaelaia. Bena fineral negana ai, edia dubu murimuri ai ia naria. Lagani momo murinai, Olga ena haheauka bona hemataurai karana dainai, ena adavana be ena kara ia haidaua. Hari, Olga ia hagoadaia hebou dekenai do ia lao, bona unuseni ia laohaia danu. Bona nega haida hebou dekenai ia lao.—1 Pet. 3:1.

10. Ionatana be edena bamona ia diba daika do ia badinaia?

¹⁰ Saulo ia ura Davida ia hamasea neganai, Ionatana be disisen aukana do ia  karaia. Ia ese iena tamana do ia kamonai henia eiava Davida do ia badinaia. To, Ionatana ia diba Dirava be Davida ida ia noho, to Saulo ida lasi, unai dainai ia ese Davida ia badinaia. Bona Davida ia hamaoroa gabu ta dekenai do ia hunia bena ia be Saulo do ia hereva henia.—1 Samuela 19:1-6 duahia.

11, 12. Dirava lalokau henia karana ese edena dala ai ita ia durua ia ita badinaia totona?

¹¹ Alice be Australia ai ia noho, ia danu be disisen aukana ia karaia. Baibel ia stadilaia neganai, ia dibaia gaudia be ena famili dekenai ia herevalaia. Ia hamaorodia idia ida Krismas do ia moalelaia lasi bona ena badina ia gwauraia danu. Matamanai ena famili idia lalohisihisi, to gabeai idia badu dikadika. Idia laloa Alice be idia ia laloa lasi. Bena ena sinana ese ia hamaoroa ia ura lasi ia do ia itaia lou. Alice ia gwau: “Unai neganai, lau lalohisihisi bada, badina egu famili lau lalokau henia. To egu kudouna ai, Iehova bona ena Natuna lau atoa guna, bena hebouhebou ta ai lau bapatiso.”—Mat 10:37.

¹² Namo lasi spot gadara, sikuli ta o bese ta ita abia isi bona iseda Iehova badinaia karana ita rakatania. Hegeregere, Henry be chess gadara ia moalelaia bona ia ura bada ena sikuli totona ia kwalimu. Wikeni ibounai chess ia gadara dainai, ia be nega lasi ia haroro o hebou ia lao totona. Ia mamia ia be iena sikuli ia atoa guna, bona Dirava ia badinaia lasi. Unai dainai iena lalona ia hadaia iena sikuli totona chess do ia gadara lasi.—Mat. 6:33.

13. Dirava badinaia karana ese edena dala ai ita ia durua famili lalonai idia vara hekwakwanai ita haheaukalaia totona?

¹³ Iseda famili lalonai, nega haida ita diba lasi daika do ita kamonai henia. Hegeregere, Ken ia gwau: “Lau ura nega ta ta egu sinana burukana lau vadivadi henia bona nega haida ai ida do ia noho. To, egu sinana bona adavana be idia hetura lasi.” Ma ia gwau: “Lau ura lasi ma ta lau hamoalea bona ma ta lau habadua.” Ken ese Baibel ena hakaua hereva ia laloa, bona ia abia dae iena adavana ia hamoalea bona kamonai henia be namo. Unai dainai iena adavana dekenai, iena sinana do ia kara namo henia ena badina ia gwauraia. Bona iena sinana dekenai iena adavana do ia matauraia ena badina ia gwauraia. Unai ia karaia dainai iena adavana ia moale.—Genese 2:24; 1 Korinto 13:4, 5 duahia.

14. Saulo ese Ionatana be edena bamona ia kara henia?

¹⁴ Bema ita idia hakaua tadikaka ta be ita ia kara namo henia lasi, Iehova ita badinaia noho be namo. Hegeregere, Dirava ese ia abia hidi king, Saulo, ese iena natuna ia kara namo henia lasi. Ionatana ese Davida ia lalokau henia ena badina ia lalopararalaia lasi dainai, Ionatana ese Davida ia durua neganai, Saulo ia badu dikadika, bona taunimanima momo vairanai iena natuna ia hahemaraia. To, Ionatana ese ena tamana ia matauraia. Unai nega ai danu, ia ese Iehova bona Davida ia badinaia noho, badina ia diba Dirava ese Davida ia abia hidi Israela ena king ai do ia lao.—1 Sam. 20:30-41.

15. Bema tadikaka ta ese ita ia kara namo henia lasi, edena bamona do ita kara?

¹⁵ Iseda kongrigeisen momo lalonai, iseda hakaua tadikaka ese ita ibounai be maka tamona ai idia kara henia. To inai tadikaka be idia goevadae lasi dainai, nega haida ita karaia gauna ena badina  do idia lalopararalaia lasi. (1 Sam. 1:13-17) Unai dainai bema idia ta ese ita ia kara namo henia lasi, Iehova ita badinaia noho be namo.

16. Edena bamona negadia ai Dirava do ita badinaia noho?

¹⁶ Saulo ia ura Ionatana be Israela ena king ai do ia lao. (1 Sam. 20:31) To, Ionatana be Iehova ia lalokau henia bona ia badinaia noho dainai, ia be sibona ena namo ia tahua lasi, to Davida ena turana ai ia lao bona ena gwauhamata ia badinaia. Momokani, Iehova ia lalokau henia bona ia badinaia tauna be “iena gwauhamata hereva do ia badinaia.” (Sal. 15:4) Ita be Dirava ita badinaia dainai, iseda gwauhamata ita badinaia be namo. Hegeregere, bema ta ida bisinesi gwauhamata ita karaia, unai gwauhamata do ita badinaia, ena be ia auka. Bona bema iseda headava lalonai hekwakwanai idia vara, iseda adavana do ita badinaia, unai amo ita hahedinaraia Iehova ita lalokau henia.—Malaki 2:13-16 duahia.

17. Inai stadi ese edena dala ai oi ia durua?

¹⁷ Ena be hekwakwanai idia vara, to ita ura Dirava ita badinaia noho Ionatana hegeregerena. Unai dainai ena be iseda tadikaka taihu ese iseda lalona idia hahisia, to idia ita kara namo henia. Bena Iehova do ia moale, bona do ita moale danu. (Aon. 27:11) Ita abia dae momokani ia ese hanaihanai ita do ia durua bona naria. Stadi gabena ai, Davida ena nega ai Dirava idia badinaia bona idia badinaia lasi taudia edia sivarai do ita herevalaia.