1-3. (a) Ita be Dirava ena turana ai ita lao diba, a? (b) Inai stadi ai, daidia do ita herevalaia?

BAIBEL ese nega toi Aberahamo ia gwauraia Dirava ena turana. (2 Siv. 20:7; Isa. 41:8; Iam. 2:23) Ia sibona be Baibel ese unai bamona ia gwauraia. Anina be gunaguna amo ema bona hari, Aberahamo sibona be Iehova ena turana, a? Lasi. Baibel ia gwau ita ibounai be Dirava ita tura henia diba.

² Baibel lalonai, Iehova idia gari henia, idia abidadama henia, bona ena turana ai idia lao taudia momo edia sivarai ia noho. (Sal. 25:14, BHḡ) Idia be Paulo ese ia herevalaia “witnes orea badana.” Idia ibounai ese Dirava idia tura henia.—Heb. 12:1.

³ Inai stadi ai, ita ese Iehova ena turadia toi do ita herevalaia. Idia be: (1) Moaba vabuna, Ruta, (2) Iuda ena king, Hesekaia, bona (3) Iesu ena sinana, Maria. Edia sivarai amo dahaka ita dibaia?

4, 5. Ruta be edena abia hidi badana ia karaia, bona dahaka dainai unai be abia hidi badana? (Laulau ginigunana herevalaia.)

⁴ Mani oi laloa, Naomi bona ena ravana rua, Ruta bona  Opera, be Moaba amo Israela idia lao henia noho. Gabeai, Opera be Moaba dekenai ia giroa lou. To, Naomi ia ura ena hanua, Israela, dekenai ia lao. Vadaeni, Ruta be dahaka do ia karaia? Ia be iena hanua, Moaba, dekenai do ia giroa lou o iena ravana, Naomi, ida Betelehema dekenai do ia lao?—Ruta 1:1-8, 14.

⁵ Ruta ena ruma bese be Moaba ai idia noho. Ia be idia dekenai ia giroa lou diba, bona idia ese ia do idia naria. Danu, Moaba taudia, edia gado, bona noho dalana ia diba. To, Betelehema taudia, edia gado, bona noho dalana ia diba lasi. Bona Naomi ese ia dekenai adavana ta o ruma ta ia henia diba lasi. Unai dainai Ruta ia noia Moaba dekenai do ia giroa lou. Opera be “iena bese taudia bona iena dirava dekenai ia giroa lou” hegeregerena. (Ruta 1:9-15) To, Ruta ia ura lasi iena bese taudia bona edia dirava koikoidia dekenai ia giroa lou.

6. (a) Ruta be dahaka abia hidi maorona ia karaia? (b) Dahaka dainai Boasi ese Ruta ia hanamoa?

⁶ Toana be Ruta be iena adavana o Naomi amo Iehova ia dibaia. Ia diba Iehova be Moaba taudia edia dirava bamona lasi. Bona Iehova sibona ia lalokau henia bona ia tomadiho henia be maoro. Unai dainai Ruta be inai abia hidi ia karaia. Naomi ia hamaoroa: “Oiemu bese be lauegu bese do idia lao, bona oiemu Dirava be lauegu Dirava do ia lao.” (Ruta 1:16) Oibe, Ruta ese Naomi ia lalokau henia sibona lasi, to Iehova ia lalokau henia danu. Unai ese Boasi ia hamoalea, bona gabeai Ruta ia hanamoa, badina Dirava dekenai ia mai, ia ese ia naria totona. (Ruta 2:12 duahia.) Boasi ena hereva dainai, manu maragina be ena tamana ena apena henunai ia hunia karana ita laloa diba. (Sal. 36:7; 91:1-4) Unai hegeregerena, Iehova ese Ruta ia naria bona ena abidadama dainai hahenamo ia abia. Oibe, Ruta ia moale, badina abia hidi maorona ia karaia.

7. Dahaka dainai Iehova dekenai iseda mauri ita gwauhamatalaia be namo?

⁷ Ena be taunimanima momo be ma ta amo Iehova idia dibaia, to ia dekenai idia lao lasi, ia naridia totona. Unai dainai idia ura lasi ia dekenai edia mauri idia gwauhamatalaia bona idia bapatiso. Bema oi be unai bamona, oi ura lasi ena badina mani oi laloa. Taunimanima ibounai be dirava idauidau idia hesiai henia diba. (Ios. 24:15) To, Dirava momokanina ita hesiai henia be aonega karana. Iehova dekenai emu mauri oi gwauhamatalaia neganai, oi hahedinaraia oi ura ia ese oi ia naria. Bona hekwakwanai negadiai, ia ese oi do ia durua ia oi hesiai henia noho totona. Ruta ia durua hegeregerena.

8. Hesekaia ena bese mani oi herevalaia.

⁸ Hesekaia ena bese be Ruta ena bese amo ia idau. Iena bese be Dirava ida gwauhamata ia karaia besena. To, Israela taudia ibounai ese Dirava idia badinaia lasi. Hesekaia ena tamana, King Ahasa, ena kara be dika. Ia ese Dirava ena dubu helaga ia matauraia lasi bona taunimanima edia lalona ia veria idau diravadia idia tomadiho henia totona. Danu, ia ese Hesekaia ena tadikaka haida be lahi dekenai ia gabua, ena dirava koikoi edia boubou gauna bamona. Hesekaia ena matamata  negana be dika herea!—2 Kin. 16:2-4, 10-17; 2 Siv. 28:1-3.

9, 10. (a) Hesekaia be dahaka ia karaia diba? (b) Dahaka dainai Dirava do ita badu henia lasi? (c) Ita sibona ese iseda vaira nega ita gwauraia diba, a?

⁹ Ahasa ena haheitalai dikana dainai, reana ena natuna Hesekaia be Iehova ia badu henia diba o iena tamana ena kara ia tohotohoa diba. Hari inai negai, momo be Hesekaia hegeregerena idia haheauka, to gabeai Iehova o iena orea idia badu henia. (Aon. 19:3) Haida idia laloa edia ruma bese ena mauri dikana dainai, edia mauri be ia dika o edia tama sina edia kara idia tohotohoa. (Ese. 18:2, 3) To unai be momokani, a?

¹⁰ Hesekaia ena mauri dalana ese ia hahedinaraia unai be momokani lasi! Iehova ita badu henia be maoro lasi. Taunimanima dekenai idia vara dika be ia ese ia havaraia lasi. (Iobu 34:10) Momokani, tama sina ese edia natudia dekenai kara namo bona kara dika idia hadibaia diba. (Aon. 22:6; Kol. 3:21) To, namo lasi ita laloa iseda tama sina edia kara dainai ita danu be unai bamona kara ita karaia. Dahaka dainai? Badina Dirava ese ita dekenai ura kwalimu ia henia, anina be ita sibona ese dahaka be namo eiava dahaka be dika ita abia hidi diba. (Deu. 30:19) Hesekaia ese edena dala ai iena ura kwalimu ia gaukaralaia?

11. Dahaka dainai Hesekaia be Iuda ena king namona?

¹¹ Ena be Hesekaia ena tamana be king dikana, to Hesekaia be tau namona. (2 King Taudia 18:5, 6 duahia.) Ia be ena tamana ena kara ia tohotohoa lasi. To, Iehova ena peroveta taudia edia sisiba ia kamonai namonamo, hegeregere Isaia, Mika, bona Hosea. Unai dainai ena tamana ese ia havaraia hekwakwanai momo ia hamaoromaoroa. Bona dubu helaga ia hagoevaia, Dirava ia noia taunimanima edia dika ia gwauatao totona, bona kaivakuku ibounai ia hadikaia. (2 Siv. 29:1-11, 18-24;  31:1) Gabeai, Asuria ena king, Senakeriba, ia ura Ierusalema ia tuari henia neganai, Hesekaia ia lalogoada bona Dirava ia abidadama henia. Ia diba Iehova ese idia do ia gimaia, unai dainai ena taunimanima ia hagoadaia. (2 Siv. 32:7, 8) Nega ta Hesekaia be ia hekokoroku, to Iehova ese ia hamaoromaoroa neganai, sibona ia hamanaua. (2 Siv. 32:24-26) Momokani, Hesekaia ena haheitalai ita tohotohoa be namo. Ia ese ena bese edia kara ia tohotohoa lasi. To, iena kara amo ia hahedinaraia ia be Iehova ena turana.

12. Hesekaia hegeregerena, edena dala ai momo idia hahedinaraia idia be Iehova ena turana?

¹² Hari taunimanima be lalokau idia hahedinaraia lasi, bona tama sina momo be edia natudia idia naria bona lalokau henia lasi. (2 Tim. 3:1-5) Ena be Keristani taudia momo edia ruma bese maurina be dika, to idia ese Iehova idia tura henia. Hesekaia hegeregerena, idia ese edia ruma bese edia kara idia tohotohoa lasi. Oibe, Dirava ese ita dekenai ura kwalimu ia henia dainai, abia hidi ita karaia diba ia ita hesiai henia bona matauraia totona, Hesekaia hegeregerena.

13, 14. Maria be dahaka gaudia ia lalohekwarahilaia, bona Gabriela ese ia hereva henia murinai, dahaka ia gwau?

¹³ Hesekaia ia mase bena lagani momo idia hanaia murinai, manau hahine ta ladana, Maria, be Iehova ia tura henia bona maduna idauna ta ia abia danu. Ia be do ia rogorogo bona Dirava ena Natuna do ia havaraia bona naria! Reana Iehova ese Maria ia lalokau henia bona ia abidadama henia, unai dainai unai hahenamo namo hereana ia henia. To unai maduna ia abia neganai, dahaka ia karaia?

¹⁴ Nega momo ita be Maria ese ia abia hahenamo namo hereana ita herevalaia. To, reana ia be dahaka gaudia ma haida ia lalohekwarahilaia? Hegeregere, aneru Gabriela ese ia hamaoroa ia be do ia rogorogo, ena be tau ta ida ia mahuta hebou lasi. To, Gabriela ese Maria do ia rogorogo dalana be iena ruma bese bona dekena taudia dekenai ia gwauraia hedinarai lasi. Unai dainai idia be dahaka do idia laloa? Edena bamona Iosepa dekenai unai do ia gwauraia hedinarai? Ma danu, Dirava ena Natuna do ia naria be maduna badana! Maria ena lalohekwarahi ibounai ita diba lasi, to Gabriela ese ia hereva henia murinai, ia karaia gauna ita diba. Ia gwau: “Lau be Iehova ena igui hesiai kekenina! Namona be  emu hereva hegeregerena lau dekenai do ia vara.”—Luka 1:26-38.

15. Dahaka dainai Maria ena abidadama be ia goada?

¹⁵ Maria be Dirava ia abidadama henia momokani! Igui hesiai kekenina bamona, ia noho hegaegae ia abia maduna ia hagugurua totona. Ia abia dae momokani Iehova ese ia do ia naria bona gimaia. Dahaka dainai Maria ena abidadama be ia goada? Ita be mai abidadama ida ita vara lasi. Unai dainai ita hekwarahi be namo unai kara ita hahedinaraia totona, bona Dirava ita noia ita do ia durua. (Gal. 5:22) Maria be ia hekwarahi iena abidadama ia hagoadaia totona. Edena bamona unai ita diba? Iena kamonai karana bona ia herevalaia gaudia mani ita itaia.

16. Dahaka ese ia hahedinaraia Maria be hereva ia kamonai namonamo?

¹⁶ Maria ena kamonai karana. Baibel ia gwau: “Namona be taunimanima ibounai be idia kamonai haraga, to idia hereva haraga lasi.” (Iam. 1:19) Baibel ia gwau danu, haida ese Iehova idia herevalaia neganai, Maria be ia kamonai namonamo. Nega ia atoa unai mai anina bada herevadia ia laloa dobu totona. Hegeregere, Iesu ia vara bena mamoe naria taudia ese aneru ta ena hereva be ia dekenai idia gwauraia neganai, unai hereva ia laloatao. Gabeai, Iesu ena mauri lagani be 12 neganai, ia gwauraia herevana dainai Maria ia hoa. Unai nega rua ai, Maria ia kamonai namonamo, hereva ia laloatao, bona ia laloa dobu.—Luka 2:16-19, 49, 51 duahia.

17. Maria ese ia herevalaia gaudia amo dahaka ita dibaia?

¹⁷ Maria ese ia herevalaia gaudia. Baibel lalonai, Maria ese ia gwauraia hereva ibounai idia torea lasi. Iena hereva be Luka 1:46-55 dekenai ita davaria diba. Unai siri ese ia hahedinaraia Maria be Heberu Toretoredia ia diba namonamo. Edena dala ai? Oibe, Maria ena hereva be Samuela ena sinana, Hana, ena guriguri herevadia hegeregerena. (1 Sam. 2:1-10) Maria ena hereva lalonai, ia ese nega 20 bamona Toretore Helagadia ia gwauraia. Unai ese ia hahedinaraia, ia ura iena Turana namona, Iehova, amo ia dibaia gaudia ia herevalaia.

18. Edena dala haida ai Maria ena abidadama ita tohotohoa diba?

¹⁸ Maria bamona, nega haida Iehova amo gaukara ta ita abia neganai, reana do ita laloa ia auka ita karaia totona. To, namona be Maria ena kara ita tohotohoa, bona mai manau ida unai maduna ita abia dae, bona ita diba momokani Iehova ese ita do ia durua. Danu, Iehova ena hereva ita kamonai namonamo bona ia bona ena ura ita laloa dobu neganai, ita ese Maria ena abidadama karana ita tohotohoa unai. Bona mai moale ida ita dibaia gaudia be ma haida dekenai ita gwauraia.—Sal. 77:11, 12; Luka 8:18; Roma 10:15.

19. Bema abidadama taudia edia kara ita tohotohoa, dahaka do ia vara?

¹⁹ Aberahamo hegeregerena, Ruta, Hesekaia, bona Maria be Iehova idia tura henia. Idia be “witnes orea badana” lalonai idia noho, bona idia be Dirava idia tura henia. Namona be unai abidadama taudia edia haheitalai ita tohotohoa. (Heb. 6:11, 12) Bema unai bamona ita karaia, ita be Iehova do ita tura henia ela bona hanaihanai!