EMU mauri ai ia vara moale gauna ta mani oi laloa. Unai be emu headava dinana o emu natuna ginigunana ia vara dinana, a? Eiava emu mauri oi gwauhamatalaia bona oi bapatiso dinana, a? Reana oi dekenai unai dina be mai anina bada bona moale dinana. Tadikaka taihu danu idia moale, badina idia vairanai oi hahedinaraia oi be mai emu kudouna, mauri, darana bona goada ibounai ida Dirava oi lalokau henia!—Mar. 12:30.

Emu bapatiso negana amo oi be mai moale ida Iehova oi hesiai henia noho, ani? To, pablisa haida be guna idia mamia moalena idia haboioa. Dahaka dainai? Dahaka dainai mai moale ida Iehova ita hesiai henia noho be namo?

Ita moale badina kahirakahira Iehova ese inai tanobada dikana do ia haorea bona tanobada matamata do ia havaraia, ani? Sepanaia 1:14 ia gwau: “Lohiabada ena dina badana be ia kahirakahira vadaeni inai. Ia be ia mai noho haraga.” To, nega daudau ita naria dainai, reana guna ita abia moalena ita haboioa diba bona iseda hesiai gaukarana do ita goadalaia lasi.—Aon. 13:12.

Dirava ena taunimanima bamoa karana ese ita do ia durua, mai moale ida Iehova ita hesiai henia noho totona. Momokani, haida be iseda kara namodia dainai, tomadiho momokani idia abia dae bona mai moale ida Dirava idia hesiai henia. (1 Pet. 2:12) To, bema Keristani tauna ta be Dirava ena taravatu ia badinaia lasi dainai sisiba ia abia, dahaka ia vara diba? Unai bamona negadiai, iseda kara namodia dainai hereva momokani idia abia dae taudia haida be idia lalomanoka bona edia moale idia haboioa diba.

Satani ena tanobada dikana ena laloani karadia ese iseda moale idia hadikaia diba. Hegeregere, Diabolo ese inai tanobada ena kohu amo iseda lalona ia veria diba, unai gaudia ita ura henia totona. To, namona be Iesu ena hereva ita laloatao, ia gwau: “Tau ta be biaguna rua edia igui hesiai gaukara ia karaia diba lasi, badina ia ese ta do ia inai henia bona ta do ia lalokau henia, eiava ta do ia durua bona ta do ia dadaraia. Dirava bona Taga edia hesiai gaukara umui karaia diba lasi.” (Mat. 6:24) Oibe, Iehova bona inai tanobada ena kohu be nega tamona ita hesiai henia diba lasi.

Iehova ita lalokau henia dainai, ita dekenai ia hesiai henia karana be gaukara metauna lasi. (1 Ioa. 5:3) Iesu ena hereva laloatao, ia gwau: “Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Lauegu huaia auna do umui huaia bona lau dekenai diba umui tahua, badina lau be manau bona lalomanada tauna bona goada matamata do umui davaria. Lauegu huaia auna be ia namo, bona umui lau noia do umui huaia gauna be ia metau lasi.” (Mat. 11:28-30) Hahediba taudia halaoa gaukarana amo goada matamata ita abia bona ita moale. Oibe, Iehova ena hesiai gaukara ita moalelaia. Iseda hamauria tauna dekenai ita moale ena badina toi mani ita herevalaia.—Hab. 3:18.

Mauri ia Henia Tauna, moale Diravana unai, ita hesiai henia. (Kara 17:28; 1 Tim. 1:11) Ita abia dae Dirava be iseda Havaraia Tauna bona ia dainai hari ita mauri. Unai dainai, ena be ita bapatiso bona lagani momo idia hanaia vadaeni, to namona be mai moale ida ia ita hesiai henia noho.

Héctor be lagani 40 lalonai sekit gaukara ia karaia. Ena be ia “buruka,” to ia goada noho. (Sal. 92:12-14) Iena adavana ena gorere dainai, Héctor be Dirava ena hesiai gaukara haida ia karaia lasi, to iena moale ia haboioa lasi. Ia gwau: “Ena be lau lalohisihisi badina egu adavana ena gorere ia bada, bona ia auka ia lau naria totona, to mai moale ida Dirava momokanina lau hesiai henia noho. Lau diba Iehova ese lau dekenai mauri ia henia, unai dainai ia lau lalokau henia bona mai kudouna ibounai ida ia lau hesiai henia. Haroro gaukara lau goadalaia, bona hanaihanai vaira nega ena helaro lau laloa, unai ese lau ia hamoalea.”

Iehova ese mauri davalaia boubouna ia henia dainai, hari iseda mauri ita moalelaia. Momokani, “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Oibe, Dirava ese Iesu amo ia henia mauri davalaia boubouna ita abidadama henia neganai, ia ese iseda kara dika do ia gwauatao bona do ita mauri hanaihanai. Unai dainai ita moale, ani? Namona be unai mauri davalaia boubouna ese ita ia hagoadaia mai moale ida Iehova ita hesiai henia totona.

Tadikaka ta ladana Jesús be Mexico ai ia noho, ia gwau: “Lau be hora momo lau gaukara, ena be unai be egu gaukara negana lasi. Unai lau karaia moni bada lau abia totona. Gabeai Iehova bona ia ese taunimanima totona iena Natuna ia henia  karana lau dibaia. Lau ura bada ia lau hesiai henia. Unai dainai Iehova dekenai egu mauri lau gwauhamatalaia. Bona lagani 28 lalonai lau karaia moni gaukarana amo lau doko bona ful-taim hesiai gaukara lau karaia.” Jesús be unai ia karaia dainai mai moale ida Iehova ia hesiai henia.

Ita havaraia huahua dainai ita lalohisihisi lasi, to ita moale. Iehova oi do dibaia lasi neganai, emu mauri be edena bamona? Aposetolo Paulo be Roma Keristani taudia dekenai ia gwau: “Guna umui be kara dika ena igui hesiai taudia,” to hari “umui be kara maoromaoro ena igui hesiai taudia ai umui lao.” Bona “umui havaraia huahua be kara helagana bona dokonai be mauri hanaihanai.” (Roma 6:17-22) Ita be mauri dala helagana ita badinaia dainai, matabodaga karadia eiava dagedage karadia amo idia vara dika ita davaria lasi. Unai dainai ita moale, ani?

Jaime be Dirava be lasi lalohadaina bona evolusen ia abia dae, bona boksini ia gadara. To gabeai, Keristani hebou ia lao henidia matamaia bona unuseniai ia itaia lalokau karana ese ena lalona ia veria. Jaime ia ura ena kara gunadia ia rakatania, unai dainai Iehova ena heduru ia noia. Ia gwau: “Metairametaira lau abia dae, ita ia lalokau henia Tamana bona hebogahisi Diravana ia noho. Iehova ena taravatu goevadia badinaia karana ese lau ia gimaia. Bema egu kara lau haidaua lasi, reana lau mase vadaeni, egu boksini turadia ma haida bamona. Iehova lau hesiai henia laganidia lau moalelaia bada.”

Inai tanobada dikana ena dokona ita naria noho lalonai, dahaka ita laloa be namo? Laloatao, “Dirava ena lauma hegeregerena ia hadoa tauna be . . . mauri hanaihanai do ia abia. Unai dainai ita hesiku lasi kara namodia ita karaia totona, badina bema ita hesiku lasi, nega korikori ai ita ese huahua do ita abia.” (Gal. 6:8, 9) Iehova ena heduru amo do ita haheauka noho, bona ita gaukara goada kara namodia ita hahedinaraia totona, unai amo “hisihisi badana” ai do ita roho mauri. Danu, ena be dagedage ita davaria, to mai moale ida Iehova ita hesiai henia noho.—Apok. 7:9, 13, 14; Iam. 1:2-4.

Namona be ita abia dae ita haheauka dainai, davana namona do ita abia, badina Dirava ese ita karaia gaukarana ia itaia, bona ia diba ita be ia bona ena ladana ita lalokau henia. Bema mai moale ida Iehova ita hesiai henia noho, Salamo torea tauna Davida bamona do ita gwau: “Nega ibounai lau diba, Lohiabada be lau dekenai ia noho. Ia be lau kahirakahira dainai, gau ta ese lau ia hagaria lasi. Unai dainai, egu kudouna ia moale, bona Lohiabada lau tanikiu henia noho. Lauegu tauanina danu ia noho namo.”—Sal. 16:8, 9.