LAGANI 1930 lalodiai, Brazil ai, haroro gaukara be ia bada lasi. To lagani 1935 ai, painia rua, Nathaniel bona Maud Yuille, ese Joseph F. Rutherford idia tore henia, unai negai ia be haroro gaukara ia gunalaia. Idia ura edia hesiai gaukara idia habadaia bona ia siaia gabuna dekenai do idia lao.

Unai negai, Nathaniel ena mauri lagani be 62, bona guna ia be ensinia tauna ta. Bona San Francisco, California, U.S.A. ai, kongrigeisen ta ena hesiai gaukara ia gunalaia. Unuseniai saun gaudia ia gaukaralaia sivarai namona harorolaia totona. Gabeai Brazil dekenai ia idia siaia lao, gado idauidau taudia durua totona.

Lagani 1936 ai, Nathaniel bona Maud be Brazil dekenai idia ginidae, Antonio P. Andrade be idia ida ia lao, ia be painia ta bona idia totona gado ia hahanaia. Idia ese rekodi masini 35 bona saun motuka ta danu idia abia lao. Unai negai, Basileia pablisa taudia be 60 sibona! To, unai saun tulu matamatadia ese idia do ia durua taunimanima milioni momo idia haroro henia totona.

Nathaniel bona Maud idia ginidae bena hua ta murinai, brens ofesi ese hebouhebou ginigunana ia hegaegaelaia, bona São Paulo dekenai idia karaia. Maud ese saun motuka ia taria, bona pablik tok totona taunimanima ia boiria, bona taunimanima 110 idia haboua! Unai hebouhebou ese pablisa momo ia hagoadaia dainai, edia haroro gaukara idia habadaia. Idia ese buka bona magasin, haroro kadi, bona rekodi masini gaukaralaia dalana idia dibaia. Bona haroro herevadia be  English, German, Hungarian, Polish, Spanish bona gabeai, Portugal gado ai idia rekodia.

Lagani 1937 ai, São Paulo, Rio de Janeiro, bona Curitiba dekenai idia karaia hebouhebou ese haroro gaukara ia durua. Saun motuka amo ruma-ta-ruma-ta dekenai idia haroro. Unai nega ai, José Maglovsky be mero matamata, ia gwau: “Teibolo ta ai emai Baibel buka bona magasin ai atoa, bona haroro herevadia be saun motuka amo ai gadaralaia, bena ruma amo idia raka-lasi taudia ai hereva henidia.”

Bapatiso be sinavai lalonai idia karaia, bona digudigu taudia momo be miri dekenai idia hekure. Unai be nega namona saun motuka amo sivarai namona idia harorolaia totona! Tadikaka Rutherford ena bapatiso tok be ibounai ese saun motuka ena spika amo idia kamonai. Unai tok be Portugal gado ai idia hahanaia neganai, taunimanima momo ese saun motuka idia hagegea bona idia kamonai. Bena bapatiso idia karaia neganai, Basileia anedia be Polish gado ai idia gadaralaia. Tadikaka taihu be gado idauidau ai idia ane. Lagani 1938 Yearbook ia gwau: “Idia ese Pentekoste dinana ai ta ta be edia gado idia lalopararalaia dalana idia laloa lou.”

Hebouhebou ena Sunday ai, ena be ia medu o dina ia diari, Baibel tok be saun motuka amo idia gadaralaia, bona loaloa gabudia, ruma ai, São Paulo ena faktori ai, bona kahirakahira idia noho taoni taudia ese idia kamonai. São Paulo ena notwest kahanai, lepera taudia edia gabu ta ia noho, ia be kilomita 97 bamona. Hua ta ta, saun motuka amo unuseni idia noho taudia 3,000 idia haroro henia. Daudau lasi murinai, kongrigeisen ta idia hamatamaia. Ena be idia be lepera taudia, to pablisa taudia ese gwaumaoro idia abia lepera taudia idia noho gabuna ma ta ai sivarai namona idia harorolaia totona.

Lagani 1938 ena dokonai, Portugal gado ai idia rekodia Basileia sivaraina idia abia. Souli Ibounai Edia Dina ai, gara gabudia ta ta ai, saun motuka amo idia rekodia herevadia, “Mase Taudia be Edeseniai?, “Iehova,” bona “Taga,” idia gadaralaia, bona taitai taudia 40,000 ese idia kamonai!

Mai gari lasi ida Baibel ena hereva momokani idia harorolaia dainai, dubu gunalaia taudia idia badu, bona pulisi taudia idia hamaoroa saun motuka do idia koua. Taihu Maud ia gwau, nega ta pris tauna ta ese hutuma ia hamaoroa saun motuka do idia koua hagegea. To, taoni naria tauna badana bona pulisi taudia be gau ta idia karaia lasi, to tok idia kamonai. Taoni naria tauna badana ia lao neganai, Baibel bukana ta ia abia. Unai dina ai dika ta ia vara lasi. Ena be unai bamona dagedage karadia idia vara, to lagani 1940 Yearbook ia gwau, Brazil ai lagani 1939 be “nega namona Tiokratik Lohia Hereadaena idia hesiai henia bona ena ladana idia harorolaia totona.”

Brazil ai, “Watch Tower saun motuka” ese haroro gaukara ia durua. Idia ese taunimanima milioni momo dekenai Basileia ena sivarai idia harorolaia. Ena be lagani 1941 ai unai motuka idia hoihoilaia, to Brazil ai Iehova ena Witnes taudia momo ese sivarai namona be kudou-maoro taudia dekenai idia harorolaia noho.—Orea ena histori Brazil amo.