“Kuku ania karana idia rakatania taudia be mai ura goadana ida idia hekwarahi dainai idia kwalimu.”​—“Stop Smoking Now!”

BEMA oi ura kuku ania karana oi rakatania, namona be mai ura goadana ida oi hekwarahi. Edena dala ai unai ura oi hagoadaia diba? Gau ta be, kuku oi rakatania karana ese oi dekenai ia havaraia namo oi laloa.

Moni do oi halusia lasi. Bema kuku ena paket ta be dina ta ta ai oi haorea, lagani ta lalonai moni tausen momo oi negea unai. “Lau laloparara lasi kuku dekenai moni bada lau negea.”​—Gyanu, Nepal.

Emu mauri lalonai do oi moale. “Kuku lau rakatania neganai, egu mauri ia namo ia lao noho.” (Regina, South Africa) Taunimanima be kuku idia rakatania neganai, aniani idauidau idia mamia bona idia bonaia namonamo diba, bona edia goada ia bada bona tauanina ena toana ia namo danu.

Emu helt do ia durua. “Kuku rakatania karana ese mauri lagani idauidau tatau bona hahine edia helt ia durua bada diba.”​—The U.S. Centers for Disease Control and Prevention.

Lalogoada do oi abia. “Kuku lau rakatania badina lau ura lasi kuku ese lau ia biagua. Lau ura lau sibona ese egu tauanina lau biagua.”​—Henning, Denmark.

Emu famili bona turadia be namo do idia davaria. “Kuku ania karana ese . . . oi badinai idia noho taudia edia helt ia hadikaia. . . . Tahua gaukara amo idia davaria lagani ta ta ai kuku ena kwalahu dainai taunimanima tausen momo be baragi bona kudou gorere amo idia mase.”​—American Cancer Society.

Emu Havaraia Tauna do oi hamoalea. ‘Lauegu lalokau taudia e, namona be tauanina hamiroa gaudia ibounai amo ita goeva.’ (2 Korinto 7:1) “Emui tauanina do umui henia, . . . mai helaga, bona Dirava ese ia moalelaia.”​—Roma 12:1.

“Dirava ese tauanina idia hamiroa gaudia ia inai henia lau lalopararalaia neganai, egu lalona lau hadaia kuku lau rakatania totona.”​—Sylvia, Spain.

Nega momo ura sibona be hegeregere lasi. Namona be ma haida, famili bona turadia edia heduru ita abia. Edena dala ai heduru idia henia diba?