“Tau ta ese tau tamona ia halusia diba, to bema rua idia gini hebou, idia ese unai tauna idia halusia diba.”​—Hadibaia Tauna 4:12.

MA haida amo heduru ita abia neganai, iseda inai tauna, herevana ia be daika eiava ia be dahaka, to do ita halusia diba. Unai dainai bema oi ura kuku ania karana oi rakatania, emu famili bona turadia eiava mai haheauka ida oi do idia durua taudia edia heduru oi tahua be aonega karana.

Kuku ania karana idia rakatania taudia haida oi laloa, badina oi do idia hebogahisi henia bona oi do idia durua. Torben, Denmark ai ia noho Keristani tauna ta ia gwau: “Lau dekenai haida edia heduru be mai anina bada.” Abraham, India ai ia noho, ia gwau: “Egu famili bona Keristani tadikaka ese idia hahedinaraia lalokau ese lau ia durua kuku lau rakatania totona.” To nega haida famili bona turadia edia heduru sibona be hegeregere lasi.

Tau ta ladana Bhagwandas ia gwau: “Lagani 27 lalonai kuku lau ania, to Baibel amo lau diba kuku ania karana be miro karana dainai egu lalona lau hadaia unai kara lau rakatania totona. Lau hekwarahi kuku ania karana lau hamaragia totona. Egu tura gunadia lau rakatania. Haida amo sisiba lau tahua. To unai ese lau ia durua lasi. Dokonai, hanuaboi ta lalonai mai kudouna ibounai ida Iehova Dirava lau guriguri henia lau ia durua kuku ania karana lau rakatania totona. Bena lau kwalimu!”

Mai anina bada gauna ta be gau haida oi hanaia totona oi hekwarahi be namo. Unai gau haida be dahaka? Atikol ma ta ese unai do ia herevalaia.

[Box on page 5]

MURAMURA OI GAUKARALAIA BE NAMO, A?

Kuku ania karana rakatania totona muramura haida, hegeregere nicotine patch, amo bisinesi taudia ese moni bilioni momo idia karaia. Unai oi do gaukaralaia lasi neganai, mani inai henanadai haida oi laloa:

Dahaka namo ia havaraia? Momo idia gwau Therapy idauidau ese kuku ania ena ura ia hamaragia dainai kuku oi rakatania diba. To haida idia gwau unai muramura be nega daudau lalonai oi gaukaralaia be namo lasi.

Dahaka Dainai? Muramura haida be mai edia dika, hegeregere mumuta ia havaraia, oi lalometau, bona sibona hamasea lalohadai do ia havaraia danu. Laloatao, ena be nicotine therapy idia karaia, to unai dala amo emu tauanina ai nicotine idia atoa lou, bona emu helt ia hadikaia diba. Unai dainai unai therapy ia abia tauna be kuku ia rakatania totona be auka.

Heduru ma haida be dahaka? Sevei ta ai kuku idia rakatania taudia 88 pesen idia gwau, kuku idia rakatania haraga badina muramura idia abia lasi.