Emu matamata negana ai, oi be “turana” ta oi davaria. Ia dainai oi mamia oi be tau badana ta bona ia dainai emu turadia oi bamoa diba. Oi laloa momo neganai, hanaihanai ia ese emu lalona ia “hanamoa.” Momokani, gau momo dekenai oi be ia dekenai oi tabekau.

To gabeai, ena dika oi itaia. Ia ura nega ibounai ia ida oi noho, ena be ia dainai gabu haida dekenai oi do idia welkam lasi. Bona ena be ia dainai oi mamia oi be tau badana, to ia dainai oi gorere diba. Bona ia dainai moni momo oi halusia.

Nega haida, oi ura unai hetura karana oi hadokoa, to ia ura lasi. Toana be ia be emu biaguna ai ia lao. Ia oi tura henia dainai, hari oi lalohisihisi.

UNAI be kuku ania taudia bona kuku ia herevalaia. Hahine ta ladana Earline be lagani 50 lalonai kuku ia ania murinai, ia gwau: “Kuku ese lau ia durua bada, tau ta ese unai bamona heduru ia henia lasi. Ia be egu tura gunana sibona lasi to ia be egu turana tamona.” Gabeai Earline ia laloparara kuku be tura koikoina bona dikana. Momokani ataiai herevadia be ia totona. Ia laloparara Dirava ena vairanai kuku ania karana be dika, badina Dirava ese ia henia tauanina ia hadikaia. Unai neganai kuku ania karana ia rakatania.​—2 Korinto 7:1.

Tau ta ladana Frank danu be kuku ania karana ia rakatania, badina ia ura Dirava ia hamoalea. To kuku ia rakatania dinana ai, ena ruma henunai ia rau loaloa kuku orena ia tahua totona. Ia gwau “Unai nega ai egu disisen lau karaia. Egu imana bona aena amo lau rau loaloa bona miro gabudia lau sekea kuku orena lau tahua totona. Unai kara be dika herea. Unai murinai kuku lau rakatania momokani.”

Dahaka dainai kuku idia rakatania be auka? Tahua gaukara karaia taudia ese badina haida idia gwauraia: (1) Kuku be drag haida bamona, bona unai idia manada. (2) Kuku amo idia veria nikotin be sekeni 7 lalonai harana lalonai ia vareai. (3) Kuku ania karana be ta ena mauri ena kahana badana ta ai ia lao diba, badina ia aniani, inuinu, herevahereva, lalohisihisi haorea, eiava unai bamona gaudia ma haida ia karaia neganai, kuku ia ania.

To, Earline bona Frank bamona, kuku ania karana oi rakatania diba. Bema oi ura kuku ania karana oi rakatania, atikol gabedia oi duahia, unai ese oi do ia durua bada.