BAIBEL ENA LALOHADAI
Moni Gadara
Taunimanima haida idia laloa moni gadara be kerere lasi, to ma haida idia laloa ia be mai ena dika.
Moni gadara be dika, a?
TAUNIMANIMA IDIA GWAU
Taunimanima haida idia laloa moni gadara be kerere lasi, bema taravatu hegeregerena idia gadara. Gavamani ese ia abia dae moni gadara haida be hegeregere, loto gadara, unai amo idia abia moni be gavamani ese taunimanima durua totona idia gaukaralaia.
BAIBEL IA GWAU
Baibel be moni gadara ia herevalaia lasi. To, ena hakaua herevadia haida ese Dirava ena hemami moni gadara dekenai ia hahedinaraia.
Moni gadara idia karaia taudia idia ura ma haida edia moni idia abia, unai be Baibel ena sisiba “mataganigani karadia idauidau ibounai umui dadaraia” ida ia hegeregere lasi. (Luka 12:15) Mataganigani dainai taunimanima ese moni gadara idia karaia. Moni gadara oreadia ese moni ena prais badana idia herevalaia, badina idia diba casino gadara taudia be unai prais badana idia laloa dainai moni bada do idia negea. Idia ese ta idia durua lasi mataganigani karadia ia dadaraia totona, to idia gwau karaharaga moni bada umui abia diba.
Moni gadara be sibona ena namo tahua karana: ma haida idia halusia moni be haida ese idia abia. To, Baibel ia gwau, “namo lasi ta be sibona ena namo ia tahua, to namona be ma ta ena namo ia tahua.” (1 Korinto 10:24) Bona Taravatu 10 ai taravatu ta ia gwau: “Namo lasi . . . emui dekena tauna ena gaudia umui ura henia.” (Esodo 20:17) Bema moni gadara tauna ta ia ura ia kwalimu, do ia ura ma haida ese edia moni do idia halusia.
Danu Baibel ena sisiba be, namo lasi ta ia laloa laki karana be hahenamo ta. Idaunegai Israela ai, haida edia abidadama Dirava dekenai be ia goada lasi dainai “idia ese Laki diravana totona teibolo ta idia hegaegaelaia.” Unai kara be Dirava ese ia abia dae, a? Lasi, idia dekenai ia gwau: “Egu vairana ai umui kara dika noho, bona lau umui habadua karadia umui karaia.”—Isaia 65:11, 12.
Oibe, tano haida ai, moni gadara amo idia abia moni idia gaukaralaia edukeisen, economic, bona pablik gaukara haida durua totona. Ena be idia laloa unai moni amo heduru idia henia, to unai be moni abia dalana maorona lasi. Badina unai be mataganigani bona sibona laloa bada karana, bona gau ta abia kava lalohadaina ia habadaia.
“Namo lasi . . . emui dekena tauna ena gaudia umui ura henia.”—Esodo 20:17.
Moni gadara karaia taudia dekenai dahaka dika idia vara diba?
BAIBEL IA GWAU
Baibel ena sisiba be “idia ura idia taga taudia be hedibagani do idia davaria, tarapu lalonai do idia moru, ura dikadia do idia abia bona kavakava karadia do idia karaia, unai ese dika bada ia havaraia.” (1 Timoteo 6:9) Mataganigani dainai taunimanima be moni gadara idia karaia, bona mataganigani karana be dika momokani. Unai dainai Baibel ese “mataganigani” be Dirava ese ia inai henia karadia ida ia gwauraia.—Efeso 5:3.
Ta be moni gadara amo taga haraga lalohadaina ia abia dainai, unai ese ena lalona ia veria diba moni ia lalokau henia totona. Baibel ia gwau unai be “dika idauidau ibounai edia badina.” Moni ura henia karana ese ta ena mauri ia biagua diba, unai ese lalohisihisi bada ia havaraia bona ena abidadama Dirava dekenai ia hadikaia diba. Baibel ia gwau moni idia lalokau henia taudia be “hisihisi momo idia davaria.”—1 Timoteo 6:10.
Mataganigani taudia idia laloa idia abia moni be hegeregere lasi, unai dainai idia moale lasi. “Mai ena siliva momo tauna be siliva ma haida do ia ura henia noho, unai hegeregerena kohu momo tauna be kohu ma haida do ia ura henia noho.”—Hadibaia Tauna 5:10.
Moni gadara idia karaia taudia milioni momo be moni gadara ena tarapu lalonai idia moru bamona. Tahua gaukara ese ia hahedinaraia unai hekwakwanai be gabu ibounai dekenai ia vara, bona United States ai, milioni momo be moni gadara idia manadalaia.
Baibel ia gwau: “Bema matamanai ta be mataganigani dalanai ena ahuna ia abia, dokonai ia be do ia moale lasi.” (Aonega Herevadia 20:21) Moni gadara dainai idia vara hekwakwanai be, abitorehai momo, eiava moni ia ore, bona moni gaukara idia haboioa, headava ia dika bona turadia ese idia rakatania. Baibel ena hakaua herevadia badinaia karana ese ta ia durua diba, unai amo moni gadara ese ia havaraia dika do ia davaria lasi bona do ia moale.
“Idia ura idia taga taudia be hedibagani do idia davaria, tarapu lalonai do idia moru, ura dikadia do idia abia bona kavakava karadia do idia karaia, unai ese dika bada ia havaraia.”—1 Timoteo 6:9.
