HEBERU Baibel oi duahia diba, a? Sedira lasi. Bona reana Heberu Baibel oi do itaia lasi. To, lagani 1600 ai ia noho diba bada tauna Elias Hutter bona ia halasia Heberu Baibel rua amo gau haida oi dibaia neganai, unai ese oi do ia durua emu Baibel oi laloa bada totona.

Elias Hutter be lagani 1553 ai, German kahirakahira ia noho taoni maragina Görlitz ai ia vara, unai be Poland bona Czech Republic edia boda ai ia noho. Hutter be Jena ai Lutheran University dekenai Middle East taudia edia gado ia stadilaia. Ena mauri lagani be kahirakahira 24 neganai, ia idia abia hidi Leipzig ai Heberu gado ena profesa ai do ia lao. Ia be edukeisen ena gaukara hanamoa tauna dainai, Nuremberg dekenai sikuli ta ia haginia, unai amo stiuden taudia be lagani foa lalonai Heberu, Grik, Latin, bona German gado do idia dibaia. Guna sikuli eiava iunivesiti ma haida ai unai bamona idia karaia be auka.

Lagani 1587 ai, Hutter ese Taravatu Gunana be Heberu gado ai ia halasia. Inai Baibel ena ladana be Derekh ha-Kodesh, unai be Isaia 35:8 amo ia abia, ena anina be “Helaga Kara Ena Dala.” Unai Baibel ena leta mai edia hairaidia edia hereva ena anina be “gau ibounai ese inai buka ena hairai ia hahedinaraia.” To unai Baibel ena namo badana ta be, stiuden ese unai idia gaukaralaia Heberu gado idia dibaia totona.

Hutter ia halasia Heberu Baibel be heduru gauna, unai ita lalopararalaia totona, Heberu gado Baibel idia ura duahia stiuden taudia idia davaria hekwakwanai rua mani ita itaia. Gau ginigunana be, Heberu alfabet ena toana be idau bona unai idia diba lasi, bona gau iharuana be, hereva ta ena matamanai (prefix) bona dokonai idia noho herevadia (suffix) dainai, ia auka Heberu hereva korikorina idia dibaia totona. Hegeregere, inai Heberu Herevana נפשׁ (idia hahanaia ne’phesh) mani ita laloa, ena anina be “souli.” Esekiela 18:4 lalonai inai Heberu hereva ה (ha) be vairanai idia atoa neganai, inai hereva הנפשׁ (han·ne’phesh) eiava “souli” ia hedinarai. Heberu alfabet ia diba lasi tauna ena matana ai, inai hereva, הנפשׁ (han·ne’phesh) be hereva idauna נפשׁ (ne’phesh) amo.

Hutter ese ena stiuden durua totona, printa dala matamatana ia gaukaralaia bona Heberu leta badadia ia gaukaralaia. Ia ese toretore koremadia dekenai Heberu hereva korikoridia ia torea bona printaia. To hereva ta ena matamana bona ena dokona herevadia be leta koremadia ai ia torea lasi (hollow letters). Unai ia karaia dainai, ia auka lasi stiuden taudia ese Heberu hereva korikorina idia davaria haraga totona, ma  danu, unai ese idia ia durua Heberu gado idia dibaia totona. New World Translation of the Holy Scriptures​—⁠With References ena futnout ese unai dala ia badinaia danu. * Idia hahanaia Heberu herevana be leta koremana ai idia torea, to hereva ena matamana bona ena dokonai idia noho herevana be toretore koremana ai idia torea lasi. Laulau ai idia makaia kahana be Hutter ese ena Heberu Baibel lalonai Esekiela 18:4 ai ia gaukaralaia toretore ia hahedinaraia, bona Reference Bible ena futnout ese unai dala ia badinaia danu.

Hutter ese Taravatu Matamata ia printaia danu, bona ena hereva be gado 12 dekenai ia hahanaia. Unai Baibel be Nuremberg ai lagani 1599 ai idia printaia, bona nega momo unai idia gwauraia Nuremberg Polyglot. Hutter ia ura Heberu gado ai Keristani Grik Toretoredia ia hahanaia. Ia gwau, ena be “mai egu ura ida moni bada lau negea” unai Heberu gado Baibel lau hahanaia totona, to unai be anina namona do ia havaraia lasi. * Unai dainai ena lalona ia hadaia, Taravatu Matamata be Grik amo ia hahanaia Heberu gado dekenai. Hutter ese ena gaukara ma haida ia atoa siri, bena unai Taravatu Matamata hahanaia gaukarana be lagani tamona sibona lalonai ia haorea.

Hutter ese Heberu gado ai ia hahanaia Keristani Grik Toretoredia be mai ena namo eiava? Heberu diba bada tauna, Franz Delitzsch, ia gwau: “Iena Heberu gado Baibel lalonai ia gaukaralaia gado be Keristani taudia haida sibona ese idia lalopararalaia, to ena hereva be taunimanima ese idia duahia diba, badina nega momo hereva maorodia ia gaukaralaia.”

Hutter be ena hahanaia gaukarana amo taga tauna ai ia lao lasi, badina ena Baibel momo ia hoihoilaia lasi. To ena gaukara be mai anina bada bona ena namo be nega daudau lalonai ia noho. Hegeregere, Heberu gado ai ia hahanaia Taravatu Matamata be William Robertson ese ia torea bona lagani 1661 ai ia printaia lou bona lagani 1798 ai Richard Caddick ese ma ia torea lou. Hutter be Grik gado ia hahanaia neganai, inai dagi ladadia Kyʹri·os (Lohiabada) bona The·osʹ (Dirava) edia gabu ai, “Iehova” (יהוה, JHVH) ia torea, unai ia karaia bema siri be Heberu Toretoredia amo ia abia, eiava bema ia mamia unai siri ese Iehova ia herevalaia. Unai be moale gauna, badina ena be Taravatu Matamata momo lalonai Dirava ena ladana idia gaukaralaia lasi, to Hutter ena Baibel ai Keristani Grik Toretoredia lalonai Dirava ena ladana be gabu maorona dekenai ia atoa giroa lou.

Baibel ai Dirava ena ladana, Iehova, be Keristani Grik Toretoredia lalonai oi itaia eiava Reference Bible ena futnout ai oi itaia neganai, namona be Elias Hutter ena gaukara namona bona ena Baibel idau hereadia oi laloa.