Ita abia dae momokani Dirava ena gwauhamata ibounai do ia vara momokani, a? Iesu ia abia dae unai do ia vara, bona taunimanima ia hadibaia neganai, ia durudia unai idia abidadama henia totona. Mani iena Ororo Harorona ai ia henia haheitalai, Mataio 5:18 ai ita laloa, ia gwau: “Umui lau hamaoroa momokani, guba bona tanobada idia boio diba, to Taravatu ena kahana ta eiava ena leta ta do ia boio lasi ela bona edia hereva ibounai idia guguru.”

Heberu alfabet ena leta maragina be י (yod), unai be Tetragrammaton ena leta ginigunana, Dirava ena ladana helagana, Iehova. * Ma danu, taravatu hadibaia taudia bona Farisea taudia ese Dirava ena taravatu ena hereva bona leta ibounai sibona idia laloa bada lasi, to unai taravatu ena “leta ta ta” ibounai be mai anina bada idia dekenai.

Iesu ia gwau toana be guba bona tanobada be do idia boio, to Taravatu ena hereva maragidia ibounai be do idia guguru momokani. To Baibel ese ita ia hadibaia, hari ia noho guba bona tanobada be do idia boio lasi. (Salamo 78:69) Unai dainai unai siri ena hereva ese ia hahedinaraia, Taravatu ena hereva maragidia ibounai do idia guguru momokani.

Iehova Dirava be unai hereva maragidia ibounai ia laloa bada, a? Oibe! Mani inai oi laloa: Idaunegai Israela taudia idia hamaoroa Pasova dinana ai do idia bouboulaia mamoe ena turia ta do idia makohia lasi. (Esodo 12:46) Reana unai hereva be hereva maragina sibona. To mamoe ena turia do idia makohia lasi ena badina idia lalopararalaia, a? Sedira lasi. Iehova Dirava be peroveta herevadia ena kahana ibounai ia diba, Mesia be hisihisi auna dekenai idia tauadae neganai ena turia ta idia makohia lasi.​—⁠Salamo 34:20; Ioane 19:31-33, 36.

Dahaka ita dibaia Iesu ena hereva dekenai? Ita danu ita abia dae momokani, Iehova Dirava ena gwauhamata ena hereva maragidia ibounai do idia guguru momokani. Herevana unai Heberu leta be maragi, to ia be mai ena siahu!