Lasi, Baibel eiava histori bukadia ai Keristani taudia be mase taudia totona bapatiso idia abia karana ena sivarai ta ita duahia lasi.

Baibel momo ai unai siri idia torea dalana dainai, haida idia laloa Paulo ena negai taunimanima haida be mase taudia totona ranu bapatiso idia abia. Haheitalai ta be: “Umui gwau mase taudia idia toreisi lou lasi. Bema inai be momokani, badina dahaka haida ese bapatiso idia abia mase taudia totona?”​—Buka Helaga.

To, Baibel idia diba bada taudia rua edia hereva mani ita itaia. Dr. Gregory Lockwood ia gwau inai lalohadai “mase taudia totona haida be bapatiso idia abia” be “Baibel eiava histori bukadia ta ese ia hamomokania lasi.” Profesa Gordon D. Fee be unai bamona ia hereva danu: “Baibel eiava histori bukadia lalonai unai bamona bapatiso karana ena sivarai ta ia noho lasi. The N[ew] T[estament] danu ese unai ia gwauraia lasi. Bona Keristani ginigunadia ese unai idia karaia lasi, eiava aposetolo taudia idia mase murinai idia hedinarai dubu haida ese unai idia karaia lasi.”

Baibel ia gwau Iesu murinai idia raka taudia ese ‘bese ibounai taudia be hahediba taudia ai do idia halaoa, . . .  bona do idia hadibaia,’ ia ese ia ‘hamaoroa gaudia ibounai do idia badinaia.’ (Mat. 28:19, 20) Bema ta ia ura bapatiso ia abia, ia ese Iehova bona Iena Natuna do ia dibaia, abidadama henidia bona kamonai henia. Ia mase bona idia guria vadaeni tauna be unai do ia karaia diba lasi, bona Keristani tauna ta be ia totona unai do ia karaia lasi.​—Had. 9:5, 10; Ioa. 4:1; 1 Kor. 1:14-16.

Paulo ena hereva ena anina be dahaka?

Korinto taudia haida idia gwau mase taudia be do idia toreisi lou lasi. (1 Kor. 15:12) Paulo ia hahedinaraia edia lalohadai be kerere. Ia gwau ‘dina ibounai kahirakahira ena mauri ia haboioa.’ Ena be dika idauidau ia davaria, to ia abia dae momokani ia mase murinai, lauma tauna bamona do ia toreisi lou bona Keriso bamona guba dekenai do ia daekau.​—1 Kor. 15:30-32, 42-44.

Korinto tadikaka idia laloparara idia be horoa taudia dainai, dina ta ta ai idia vara dika do idia davaria, idia mase bena do idia toreisi lou. “Keriso Iesu lalonai bapatiso” idia abia taudia ibounai be “iena mase lalonai [idia] bapatiso” danu. (Roma 6:3) Anina be Iesu bamona, dika do idia davaria bona idia mase unai amo do idia toreisi lou bona guba maurina idia abia.

Iesu be ranu bapatiso ia abia bena lagani rua murinai, iena aposetolo taudia rua ia hamaoroa: “Lau abia bapatisona do umui abia danu.” (Mar. 10:38, 39) Unai nega dekenai, Iesu be ranu bapatiso ia herevalaia lasi. To Iesu be ‘mase lalonai bapatiso’ karana ia herevalaia. Iena hereva anina be Dirava ia badinaia noho karana dainai do ia mase. Paulo ia gwau horoa taudia be “Keriso ida [do idia] hisihisi hebou, vadaeni ia ida hanamoa do [idia] abia hebou danu.” (Roma 8:16, 17; 2 Kor. 4:17) Anina be idia danu do idia mase, unai amo idia toreisi lou neganai, guba maurina do idia abia.

Unai dainai, Paulo ena hereva be inai bamona idia hahanaia be maoro: “Bema mase taudia be do idia toreisi lou lasi, vadaeni mase lalonai bapatiso idia abia taudia be edena bamona? Bema mase taudia do idia toreisi lou lasi, vadaeni dahaka dainai unai bamona bapatiso idia abia?”