1-2. Dahaka dainai guba lao taudia edia toreisi lou karana ita laloa bada be namo?

HARI Iehova idia hesiai henia taudia momo edia helaro be tanobada ai do idia noho hanaihanai. To lauma helaga ese ia horoa orena taudia edia helaro be guba ai do idia noho. Unai horoa taudia be vaira nega ai do idia abia maurina idia laloa bada, to tanobada helarona do idia abia taudia be edena bamona? Inai stadi ai do ita itaia, guba helarona idia abia taudia ese tanobada ai do idia noho taudia dekenai hahenamo momo do idia mailaia. Unai dainai, ena be iseda helaro be tanobada ai eiava guba ai, to ita ese guba lao taudia edia toreisi lou karana ita laloa bada be namo.

² Dirava ese ena lauma helaga amo Iesu ena hahediba taudia ginigunadia ia hasiahua, guba helarona be Baibel lalonai idia torea totona. Aposetolo Ioane ia gwau: “Hari ita be Dirava ena natudia, to ita do diba lasi vaira negai ita be edena bamona, badina ita dekenai ia do hedinarai lasi. To ita diba Dirava be ita dekenai ia hedinarai neganai, ita be ia bamona do ita lao.” (1 Ioa. 3:2) Unai dainai horoa taudia be lauma tauanina ida guba dekenai idia daekau neganai idia diba lasi idia be do edena bamona. To edia guba ahuna idia abia neganai, edia matana amo Iehova do idia itaia. Do idia toreisi lou bona guba maurina idia abia taudia totona, Baibel ese gau momo ia gwauraia hedinarai lasi. To Paulo ese gau haida ia herevalaia: Keriso ese “gavamani ibounai, lohia taudia ibounai, bona siahu taudia ibounai be ia ese ia haorea” neganai horoa taudia be ia ida do idia lohia. Danu “mase, iseda inai tauna ginigabena” do ia haorea. Dokonai, Iesu bona ia ida idia lohia taudia ese idia sibona bona gau ibounai be Iehova henunai do idia  atoa. (1 Kor. 15:24-28) Unai be moale bada negana! *

3. Korinto Ginigunana 15:30-32 ia hereva bamona, Paulo ese toreisi lou ia abidadama henia dainai dahaka ia karaia?

³ Paulo be toreisi lou ia abidadama henia dainai, unai ese ia durua hahetoho idauidau ia haheaukalaia totona. (1 Korinto 15:30-32 duahia.) Korinto taudia ia hamaoroa: “Dina ibounai kahirakahira egu mauri lau haboioa.” Paulo ma ia gwau: “Efeso dekenai dagedage animal ida lau heatu.” Reana ia be Efeso ena steidiam ai dagedage animal korikoridia ida ia heatu karana ia herevalaia. (2 Kor. 1:8; 4:10; 11:23) Eiava, reana Paulo ese Iuda taudia bona ma haida edia dagedage karadia be “dagedage animal” ida ia hahegeregerea. (Kara 19:26-34; 1 Kor. 16:9) Herevana Paulo be edena dagedage karana ia herevalaia, to ia be dika badadia ia davaria. Ena be unai ia vara to ia abia dae vaira nega ai gau namodia do idia vara.​—2 Kor. 4:16-18.

4. Hari toreisi lou helarona ese edena dala ai Keristani taudia ia hagoadaia? (Rau 1 ena laulau itaia.)

⁴ Ita be nega dikadia lalonai ita noho. Iseda tadikaka taihu haida be raskol taudia ese kara dika henidia. Haida be tuari gabudia ai idia noho dainai idia gari. Ma haida be edia tano dekenai haroro gaukara idia koua eiava idia taravatua, bona edia mauri idia haboioa diba, to Iehova ena gaukara idia karaia noho. Unai tadikaka taihu ibounai be mai haheauka ida Iehova idia hesiai henia noho, bona ita dekenai idia be haheitalai namona. Idia laloparara edia mauri idia haboioa diba to idia gari lasi, badina Iehova ese vaira negai idia dekenai mauri namona do ia henia.

5. Edena lalohadai kererena ese iseda abidadama toreisi lou karana dekenai ia hadikaia diba?

⁵ Paulo ese ena tadikaka ia hamaorodia haida ese idia abia lalohadai kererena do idia dadaraia, idia gwau: “Bema mase taudia be do idia toreisi lou lasi, ‘namona be ita aniani bona ita inuinu badina kerukeru do ita mase.’” Unai lalohadai be guna Paulo ia noho lasi neganai haida ese idia abia vadaeni. Paulo be reana Isaia 22:13 ena hereva ia gwauraia, unai lalohadai be guna Israela taudia ese idia abia. Idia be edia lalokau Dirava dekenai idia hagoadaia lasi, to moale karadia idia laloa bada. Israela taudia edia lalohadai be “hari ita abia gaudia ita moalelaia be namo, badina gabeai unai gaudia do ita moalelaia lasi.” Unai lalohadai be hari momo ese idia abia noho. To, Israela taudia edia lalohadai kererena dainai, idia davaria dika ena sivarai be Baibel lalonai idia torea.​—2 Siv. 36:15-20.

6. Toreisi lou helarona ese edena dala ai ita ia durua iseda turadia ita abia hidi totona?

⁶ Iehova ese mase taudia do ia hatorea isi lou karana ita abia dae dainai, iseda turadia ita abia hidi namonamo be namo. Korinto ai idia noho tadikaka be turadia abia hidi karana dekenai idia naria namonamo, badina haida be toreisi lou herevana idia abia dae lasi. Ita dibaia gauna be inai: Bema vaira nega ai do idia vara gaudia idia laloa lasi to moale karadia sibona idia laloa bada turadia ita bamoa momo, idia ese iseda helaro namona idia hadikaia diba. Bema Keristani ta be unai bamona taudia ia bamoa momo, iena lalohadai bona kara namodia idia hadikaia diba. Unai taudia ese idia veria diba Dirava ia inai henia karadia ia karaia totona. Unai dainai, Paulo ese ita ia hagania: “Kara maoromaoro dalana dekenai umui  noga bona kara dika umui karaia noho lasi.”​—1 Kor. 15:33, 34.

7. Korinto Ginigunana 15:35-38 ena hereva bamona, haida be toreisi lou karana dekenai dahaka henanadai idia henia?

⁷ Korinto Ginigunana 15:35-38 duahia. Toreisi lou helarona dekenai daradara ia ura havaraia tauna be do ia henanadai: “Mase taudia be edena bamona do idia toreisi lou? Bona edena bamona tauanina do idia abia?” Namona be Paulo ena haere ita laloa namonamo, badina hari inai negai ta ia mase murinai idia vara gaudia dekenai taunimanima edia lalohadai be idauidau. To Baibel be dahaka ia hadibaia?

8. Edena haheitalai ese ita ia durua guba lao taudia edia toreisi lou karana ita lalopararalaia totona?

⁸ Tauna ta ia mase neganai, ena tauanina ia bodaga. To tanobada be gau ta lasi amo ia karaia Diravana ese unai tauna ia hatorea isi lou, bona tauanina matamatana ia henia diba. (Gen. 1:1; 2:7) Paulo be guba toreisi louna ia herevalaia neganai, haheitalai ta amo ia hahedinaraia Dirava ese tauanina gunana amo idia do ia hatorea isi lou lasi. Mani “witi uhena eiava uhe ma ta” oi laloa. Witi uhena be tano lalonai idia hadoa neganai, ia tubu bona witi matamata ai ia lao. Unai witi matamata be uhe maragina amo ia idau. Paulo ese witi ena haheitalai amo ia hahedinaraia iseda Havaraia Tauna ese ena ura hegeregerena, “uhe ta ta dekenai edia anina korikorina ia henia.”

9. Korinto Ginigunana 15:39-41 ese tauanina edia idau be edena bamona ia herevalaia?

⁹ Korinto Ginigunana 15:39-41 duahia. Paulo ia hahedinaraia Dirava be tauanina idauidau ia karaia. Hegeregere boromakau, manu bona gwarume edia tauanina be idauidau. Ia gwau guba ai ita itaia dina bona hua, be mai edia idau. Bona ia gwau “hisiu ta ta edia hairai be idauidau.” Oibe, ena be iseda matana amo ita itaia lasi, to saiens taudia idia gwau hisiu be idauidau, haida be badadia,  maragidia, kakakaka, kurokuro bona haida be ielo iseda dina bamona. Paulo ma ia gwau “guba tauanidia bona tanobada tauanidia idia noho” danu. Unai ena anina be dahaka? Tanobada ai, taunimanima edia tauanina be mai edia hidio, to guba ai lauma tauanidia idia noho, hegeregere aneru edia tauanina bamona.

10. Guba toreisi louna do idia abia taudia be dahaka tauanina do idia abia?

¹⁰ Mani Paulo ese ia gwauraia gauna ma ta ita laloa, ia gwau: “Mase taudia edia toreisi lou danu be unai bamona. Ia bodaga diba tauanina idia guria, to ia bodaga diba lasi tauanina ia toreisi lou.” Momokani, ta ia mase neganai, ena tauanina be ia bodaga bona kahu ai ia lao. (Gen. 3:19) Vadaeni edena dala ai mase tauna be ‘ia bodaga diba lasi tauanina ai ia toreisi lou’ diba? Paulo be tanobada ai do idia toreisi lou taudia ia herevalaia lasi, hegeregere Elia, Elisaia bona Iesu ese idia hatorea isi lou taudia. To, Paulo be do idia toreisi lou bona guba ai “lauma tauanina” do idia abia taudia ia herevalaia.​—1 Kor. 15:42-44.

11-12. Iesu ia toreisi lou neganai dahaka hoa gauna ia vara, bona edena dala ai horoa taudia dekenai unai do ia vara?

¹¹ Iesu be tanobada ai ia noho neganai, ia be tanobada tauanina ia abia. To ia toreisi lou neganai, “mauri ia henia laumana ai ia lao” bona guba dekenai ia daekau. Unai hegeregerena, horoa Keristani taudia be idia toreisi lou neganai lauma tauanina do idia abia. Paulo ia gwau: “Ita be Dirava ese kahu amo ia karaia tauna hegeregerena, unai dainai gabeai ita danu be guba dekenai ia lao tauna hegeregerena” ai do ita lao.​—1 Kor. 15:45-49.

¹² Ita laloatao point badana be inai, Iesu be tanobada tauanina ai ia toreisi lou lasi. Paulo be ena hereva dokona ai unai ia gwauraia hedinarai, ia gwau guba ai, “hidio bona rara ese Dirava ena Basileia do idia abia diba lasi.” (1 Kor. 15:50) Aposetolo bona horoa taudia ma haida be guba ai idia lao totona, hidio bona  rara tauanina ai do idia toreisi lou lasi. Edena negai do idia toreisi lou? Paulo ia hahedinaraia unai toreisi lou karana be idia mase neganai maoromaoro do ia vara gauna lasi, to gabeai do ia vara gauna. Paulo ese 1 Korinto ia torea neganai, hahediba taudia haida, hegeregere Iamesi be “mase lalonai idia mahuta vadaeni.” (Kara 12:1, 2) Aposetolo taudia bona horoa taudia ma haida be gabeai “mase lalonai idia mahuta.”​—1 Kor. 15:6.

13. Iesu ena noho negana lalonai dahaka gaudia do idia vara?

¹³ Iesu bona Paulo ese mai anina bada negana ta idia herevalaia. Unai nega be Keriso ena noho negana. Unai nega lalonai tuari, tano mareremarere, bona tanobada hegegemadai gau dikadia do idia vara. Inai peroveta herevana be lagani 1914 ai ia guguru matamaia. To, mai anina bada toa ma ta ia herevalaia danu. Iesu ia gwau Dirava ena Basileia ena sivarai namona be “tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mat. 24:3, 7-14) Paulo ia gwau “Lohiabada ena noho negana” lalonai, “mase lalonai idia mahuta vadaeni” horoa Keristani taudia be do idia toreisi lou bona guba maurina do idia abia.​—1 Tes. 4:14-16; 1 Kor. 15:23.

14. Keriso ena noho neganai lalonai idia mase horoa taudia dekenai dahaka do ia vara?

¹⁴ Hari idia noho horoa Keristani taudia idia mase neganai maoromaoro guba dekenai idia lao. Paulo ese 1 Korinto 15:51, 52 ai unai ia hamomokania, ia gwau: “Ita haida be mase lalonai do ita mahuta lasi, to do ita idau, kibi dokona idia hiriria neganai, unai do ia vara haraga, ia be matana  hakapua bona kehoa haraga bamona.” Paulo ena hereva be hari idia guguru noho! Keriso ena tadikaka be do idia toreisi lou neganai, do idia moale bada badina ‘Lohiabada ida do idia noho ela bona hanaihanai.’​—1 Tes. 4:17.

15. “Matana hakapua bona kehoa haraga” bamona idia idau taudia be dahaka gaukara do idia karaia?

¹⁵ Baibel ese “matana hakapua bona kehoa haraga” bamona idia idau taudia ese guba dekenai do idia karaia gaukara ia herevalaia. Iesu be idia dekenai ia gwau: “Ia kwalimu bona egu kara ia badinaia ela bona dokona tauna dekenai, siahu do lau henia bese idauidau ia lohiaia totona, egu Tamana amo siahu lau abia hegeregerena, bona ia ese auri itotohi amo taunimanima do ia lohiaia, vadaeni uro hegeregerena idia do ia makohia maragimaragi.” (Apok. 2:26, 27; 19:11-15) Edia Tuari Biaguna do idia badinaia bona tanobada besedia be auri itotohi amo do idia biagua.​—Apok. 2:26, 27; 19:11-15.

16. Horoa taudia bona abidadama taudia ma haida be edena dala ai mase do idia halusia?

¹⁶ Ia hahedinaraia goevagoeva, horoa taudia be mase do idia halusia. (1 Kor. 15:54-57) Idia toreisi lou murinai, Aramagedono ai tanobada hegegemadai kara dika ibounai kokia gaukarana lalonai do idia vareai. Keristani tatau bona hahine milioni momo be “hisihisi badana amo” do idia roho mauri bona tanobada matamatana lalonai do idia vareai. (Apok. 7:14) Bona tanobada ai idia roho mauri taudia ese mase idia halusia dalana ma ta do idia itaia, idaunegai idia mase vadaeni taudia do idia toreisi lou. Unai ia vara neganai do ita abia moalena mani oi laloa! (Kara 24:15) Bona Iehova idia abidadama henia taudia ibounai ese Adamu amo idia abia mase do idia halusia. Tanobada ai do idia noho ela bona hanaihanai.

17. Korinto Ginigunana 15:58 ena hereva bamona, hari dahaka ita karaia be namo?

¹⁷ Hari idia noho Keristani taudia ibounai ese Paulo be Korinto taudia dekenai ia torea toreisi lou herevana idia moalelaia be namo. Ita ese Paulo ena hereva ita abia dae bona “Lohiabada ena gaukara lalonai” do ita bisi noho. (1 Korinto 15:58 duahia.) Bema mai kudouna ibounai ida unai gaukara ita karaia noho, vaira nega ai mauri namona do ita moalelaia. Unai nega ai mauri be do ia namo herea momokani. Unai ese do ia hamomokania iseda hekwarahi Lohiabada ena gaukara lalonai be hekwarahi kava lasi.