Idaunega amo ema bona hari, taunimanima ese Krismas idia gwauraia Keristani ariana ta, Iesu ena vara negana idia moalelaia totona. To, do ita henanadai: ‘Edena dala ai unai bamona kastom karadia idauidau be Iesu ena vara negana moalelaia totona idia halaoa?’

Ena badina ta be, Father Christmas be gori sivaraina. Hegeregere, hari momo idia diba Father Christmas be mai ena besoso kurokuro, bona ena dabua be kakakaka. Lagani 1931 ai, North America ena bia kampani ta ese Father Christmas ia gaukaralaia edia hoihoi gaudia idia advatais totona. Lagani 1950 lalodiai, Brazil taudia haida idia ura Father Christmas ena gabu ai Grandpa India do idia gaukaralaia, ia be edia gori sivaraina lalonai idia gwauraia tauna. To, dahaka ia vara? Profesa Carlos E. Fantinati ena hereva ia hahedinaraia, Father Christmas ese Grandpa India bona ‘natuna maragina Iesu ena gabu ia abia, unai dainai December 25 ena aria ai taunimanima ese Father Christmas idia laloa bada.’ To, unai bamona gori sivarai sibona dainai ita gwau Krismas moalelaia karana be kerere, a? Unai haerelaia totona, mani Keristani tomadiho ginigunana ita laloa.

Buka ta (Encyclopedia Britannica) ia gwau: “Lagani 200 B.C.E. bamona lalonai, Keristani tomadiho ginigunana ese Iesu bona edia abidadama dainai idia mase taudia edia vara dinadia moalelaia karana ia abia dae lasi.” Dahaka dainai? Keristani taudia be vara dinana moalelaia karana idia abia dae lasi, badina unai be Keristani lasi taudia edia kastom karadia. Danu, Baibel ese Iesu ena vara dinana ia gwauraia lasi.

Lagani 300 C.E. bamona ai, Keristani taudia ginigunadia be vara dinana idia moalelaia lasi. To Katolik dubu ese Krismas moalelaia karana ia hamatamaia. Badina unai dubu taudia idia ura, Roma taudia ese dirava koikoi tomadiho henia karana bona keru negana ai idia karaia moale karadia do idia karaia lasi. Unai amo momo ese edia tomadiho do idia abia dae. Penne L. Restad (Christmas in America) ia gwau, lagani ta ta ai, unai be December 17 ela bona January 1, “Roma taudia ese aria idia karaia, idia gadara, laini ai idia raka bona mavaru bona moale karadia ma haida idia karaia, unai amo edia dirava idauidau idia hanamoa.” Bona December 25 ai, Roma taudia be dina diravana ena vara dinana idia moalelaia. Unai dainai Katolik taudia ese unai dina idia abia hidi Krismas totona, unai amo Roma taudia momo idia veria Iesu ena vara dinana idia moalelaia totona, to edia dina dirava ena vara dinana lasi. Bowler Gerry (Santa Claus, a Biography) ia gwau, to Roma taudia be “keru negana ai idia karaia moale karadia idia do karaia noho.” Anina be “unai dina matamatadia idia abia dae, to idia karaia kara gunadia be idia do badinaia noho.”

Unai ese ia hahedinaraia, Krismas moale karadia be Baibel ena hereva hegeregerena lasi. Stephen Nissenbaum ese ena buka (The Battle for Christmas) ai ia gwau Krismas be,“tomadiho koikoi ese idia karaia kara koikoidia amo ia honu.” Unai dainai, Krismas karadia ese Dirava bona iena Natuna Iesu Keriso edia ladana ia hadikaia. Dahaka dainai unai be mai anina bada? Baibel ia gwau: “Edena bamona kara maoromaoro bona kara dika idia turana diba? Eiava edena bamona diari bona dibura idia noho hebou diba?” (2 Korinto 6:14) Au ena gabana ia gageva neganai, hamaoromaoroa dalana be lasi. Unai hegeregerena, Krismas be tomadiho koikoi taudia ese idia hamatamaia dainai, Dirava vairanai unai be ia ‘maoromaoro’ diba lasi.​—Hadibaia Tauna 1:15.