RAU 1 AMO | GURIGURI BE MAI ENA NAMO, A
Ta be Iseda Guriguri Ia Kamonai, A?
Taunimanima haida idia laloa guriguri karana be anina lasi, badina ta ese edia hereva ia kamonai lasi. Haida idia guriguri to idia mamia haere ta idia abia lasi. Baibel ia abia dae lasi tauna ta be guriguri ai Dirava ia noia: “Gado maragina amo lau oi hereva henia.” To ia gwau, Dirava be ia “haere lasi.”
To, Baibel ia gwau Dirava ia noho bona ia ese iseda guriguri ia kamonai henia. Baibel ai idaunegai taudia dekenai inai hereva idia gwauraia: “Unai dainai umui ese durua totona ia [Dirava] dekenai umui taitai neganai ia ese do ia kamonai, bona umui dekenai do ia haere.” (Isaia 30:19) Bona Baibel siri ta ia gwau: “Taunimanima namodia idia guriguri neganai, Lohiabada ia moale noho.”—Aonega Herevadia 15:8.
Iesu be iena Tamana dekenai ia guriguri “bona Dirava ese ena noinoi ia kamonai” henia.—Heberu 5:7
Danu, Baibel ai Dirava ese haida edia guriguri ia haerelaia. Siri ta ia gwau, Iesu be ia “do ia hamauria diba Tauna dekenai ia guriguri . . . bona Dirava ese ena noinoi ia kamonai.” (Heberu 5:7) Haheitalai haida be Daniela 9:21 bona 2 Sivarai 7:1 ai ita itaia diba.
Dahaka dainai taunimanima haida idia laloa Dirava ese edia guriguri ia haerelaia lasi? Namona be Dirava momokanina, Iehova, * sibona ita guriguri henia , dirava ma haida o sene taudia lasi. Danu Dirava ia ura “ena ura hegeregerena” ai ia ita hereva henia. Danu bema iena ladana dekenai ita guriguri, “ita do ia kamonai henia.” (1 Ioane 5:14) Unai dainai namona be Dirava bona ena ura ita dibaia.
Momo idia abia dae guriguri be tomadiho karana ta sibona lasi, bona Dirava be iseda guriguri ia kamonai henia bona ia haerelaia. Kenya dekenai ia noho tauna ta ladana Isaac, ia gwau: “Heduru totona lau noinoi, unai amo Baibel do lau lalopararalaia. Gabeai ta be lau dekenai ia mai bona lau ia durua Baibel lau lalopararalaia totona.” Philippines ai ia noho hahine ta ladana Hilda be kuku ania karana ia ura hadokoa. To unai kara ia hadokoa be auka, unai dainai iena adavana ese ia hamaoroa: “Dirava oi noia oi ia durua totona.” Hilda be unai bamona ia karaia dainai ia gwau: “Dirava ese lau ia durua karana dekenai lau hoa bada. Metairametaira kuku anina karana ena ura ia boio. Bena unai kara lau hadokoa.”
Bema oi noinoilaia gaudia be Dirava ena ura ida ia hegeregere, oi laloa Dirava ese oi do ia durua, a?
^ par. 6 Baibel ai ia hedinarai Dirava ena ladana be Iehova.
