Kekeni maragina ta ena mauri lagani foa be kwalahu ia itaia faktori amo ia raka lasi bona unai kwalahu ese ori badadia ia havaraia. Unai kekeni maragina ia laloa, unai faktori amo ori idauidau idia mai. Natu maragidia ese unai bamona lalohadai idia gwauraia neganai, do oi kiri, ani? To, bema gau ta oi lalopararalaia lasi, unai ese emu mauri ia hadikaia diba. Hegeregere, muramura ena kavabu ai ia noho hereva ena anina oi lalopararalaia lasi neganai, oi dekenai dika bada do ia havaraia.

Dirava ena hereva daradaralaia karana be dika momokani. Hegeregere, taunimanima haida be Iesu ena hadibaia hereva idia daradaralaia. (Ioane 6:48-68) Iesu ese idia dekenai ia hadibaia gaudia ibounai idia kamonai lasi. Unai hereva namodia idia dadaraia!

Baibel oi duahia oi ia hakaua totona, a? Bema oibe, unai be namo herea. Bema emu duahiduahi lalonai hereva ta oi lalopararalaia lasi, do oi laloa unai hereva eiava lalohadai be kerere, a? Taunimanima momo dekenai unai ia vara. Taunimanima ese idia abia dae lalohadai kereredia toi mani ita herevalaia.

• Baibel ia gwau, “Dirava do oi gari henia,” to haida ese unai hereva idia laloa kerere. Idia laloa unai hereva anina be Dirava do ita gari henia dikadika. (Hadibaia Tauna 12:13) To, Dirava ia ura lasi ia idia tomadiho henia taudia be unai bamona do idia gari. Dirava ia gwau: “Do umui gari lasi, lau be umui dekenai lau noho! Lau be umui emui Dirava, gau ta ese umui do ia hagaria lasi. Lau ese umui do lau hagoadaia, bona umui do lau durua.” (Isaia 41:10) Dirava gari henia ena anina be ia ita matauraia bada.

• Taunimanima haida ese inai Baibel herevana idia daradaralaia: Baibel ia gwau, “Inai tanobada dekenai idia vara gaudia ibounai be mai edia nega korikori, . . . vara be mai ena nega, mase danu be mai ena nega.” Idia gwau Dirava ese taunimanima ta ta edia mase dinana ia abia hidi. (Hadibaia Tauna 3:1, 2) To, unai hereva ena anina be dina ta ta ena mauri ai idia vara gaudia ia herevalaia bona danu ia hahedinaraia mase be ia vara gauna. Danu Baibel ese ita ia hadibaia, ita karaia abia hidi ese iseda mauri ia hakwadogia diba. Hegeregere, Baibel ia gwau: “Lohiabada do oi gari henia, bona ia ese oiemu mauri lagani do ia halataia.” (Aonega Herevadia 10:27; Salamo 90:10; Isaia 55:3) Edena dala ai? Hegeregere, bema Dirava ena Hereva ita matauraia, unai ese ita do ia durua, inuinu kekero bona matabodaga karadia do ita dadaraia totona.​—1 Korinto 6:9, 10.

• Taunimanima haida be Baibel ena hereva ena anina idia daradaralaia. Idia gwau guba bona inai tanobada be ‘lahi ese do ia araia,’ bona idia gwau Dirava ese inai tanobada do ia hadikaia ore. (2 Petero 3:7) To Dirava ia gwauhamata, inai tanobada korikorina be do ia hadikaia lasi momokani. Dirava be “inai tanobada ia karaia goada, ena gabu korikori dekenai, bona inai tanobada ia goada noho, ia marere sisina diba lasi, lasi momokani”. (Salamo 104:5; Isaia 45:18) Baibel ena hereva ena anina be inai tanobada korikorina do ia hadikaia lasi, to ia be inai tanobada oromana dikana ia herevalaia, Dirava ese do ia haorea momokani hegeregere lahi ese ia araia bamona. To, inai hereva guba, ita laloa neganai, ia be guba korikorina, iunives eiava Dirava ena noho gabuna ia herevalaia. Dirava be unai gaudia do ia hadikaia lasi.

Unai haheitalai amo ita itaia taunimanima be nega momo Baibel lalonai idia duahia siri idia daradaralaia. To dahaka dainai Dirava ese ena hereva ena anina ia hahedinaraia lasi? Reana haida do idia gwau, ‘Bema Dirava be aonega bada bona gau ibounai ia diba, vadaeni ita lalopararalaia bukana ta ia henia diba unai amo do ita daradara lasi. To Dahaka dainai unai ia karaia lasi?’ Taunimanima ese Baibel idia laloa kerere ena badina toi ita herevalaia.

1. Baibel be idia manau bona diba idia ura abia taudia ese idia lalopararalaia diba. Iesu be ena Tamana dekenai ia gwau: “Tamagu, guba bona tanobada  edia Lohiabada e, taunimanima vairanai oi lau hanamoa, badina oi ese inai gaudia be aonega bona diba bada taudia amo oi hunia, to natudia maragidia dekenai oi hahedinaraia.” (Luka 10:21) Baibel torea taudia ese Baibel idia torea dalana amo idia hahedinaraia laloa dalana maorona idia abia taudia ese ena sivarai idia lalopararalaia diba. Idia hekokoroku taudia​—eiava “aonega bona diba bada taudia”​—be Baibel ena hereva idia laloa kerere. To “natudia maragidia” bamona taudia​—manau bona idia ura diba idia abia taudia​—be Dirava ena sivarai idia lalopararalaia namonamo diba. Dirava ese Baibel ia torea namo herea, ani?

2. Baibel be mai momokani ida Dirava ena heduru idia ura abia taudia ese idia lalopararalaia diba. Iesu ia hahedinaraia, ia hadibaia gaudia idia lalopararalaia namonamo totona taunimanima be heduru do idia tahua. Edena dala ai do idia abia? Iesu ia gwau: “Tamana ese egu ladanai durua tauna, lauma helaga do ia siaia, ia ese umui dekenai gau ibounai do ia hadibaia.” (Ioane 14:26) Unai dainai Dirava ese ena lauma helaga​—iena gaukara siahuna unai​—ia henia taunimanima ia durua Baibel lalonai idia duahia gauna idia lalopararalaia totona. To Dirava be, ia amo heduru idia ura lasi taudia dekenai ena lauma helaga ia henia lasi, unai dainai Baibel idia lalopararalaia totona be ia auka. Danu lauma helaga ese aonega bada Keristani taudia ia gaukaralaia, diba idia ura abia taudia idia durua totona.​—Kara 8:26-35.

3. Baibel ena sivarai haida be nega korikori dekenai, taunimanima ese idia lalopararalaia diba. Hegeregere, Aneru ta ese peroveta tauna Daniela ia hamaoroa vaira nega ena sivarai ia torea totona. Unai aneru ia gwau: “Daniela, inai peroveta herevana do oi hunia noho, bona inai buka do oi koua momokani, do ia noho ela bona dokona negana ia ginidae.” Lagani momo ai, taunimanima ese Baibel bukana Daniela idia duahia to ena hereva idia lalopararalaia namonamo lasi. Momokani, Daniela danu be ia torea hereva haida ia lalopararalaia lasi. Mai manau ida ia gwau: “Lau kamonai, to unai hereva ena anina be lau diba lasi.” To metairametaira, taunimanima be Daniela ese ia torea herevadia idia lalopararalaia, to Dirava ese ia abia hidi negana ai sibona unai ia vara. Aneru be Daniela dekenai ia hahedinaraia, ia gwau: “Daniela, vadaeni, oi lao, badina inai hereva ena anina be do hunia bamona ia lao, ela bona dokona negana ia ginidae.” Daika ese Dirava ena sivarai do ia lalopararalaia? Baibel ia gwau: “Dika taudia be . .  .   diba do idia davaria lasi. To mai edia aonega taudia be diba do idia davaria.” (Daniela 12:4, 8-10) Unai dainai, Dirava be Baibel ena hereva haida edia anina ia hahedinaraia lasi ela bona nega maorona ai ia hahedinaraia.

Iehova ena Witnes taudia be nega dainai, Baibel idia lalopararalaia namonamo lasi, a? Oibe. To, Dirava be ena nega korikori ai ena hereva edia anina ia hahedinaraia goevagoeva bona Witnes taudia be unai diba matamata dainai Baibel dekenai lalohadai maorona idia abia. Idia abia dae idia ese Keriso ena aposetolo taudia edia haheitalai idia tohotohoa, badina idia be Iesu ese edia lalohadai ia hamaoromaoroa neganai, mai manau ida idia abia dae.​—Kara 1:6, 7.

Matamanai ita herevalaia kekeni maragina be ia laloa ori be faktori ta amo ia mai, to unai lalohadai be kerere. To, Baibel ese ita dekenai ia hadibaia gauna be mai anina bada. Ta ese Baibel ia lalopararalaia namonamo totona, namona be hanaihanai ia duahia. Unai dainai oi duahia gauna oi lalopararalaia totona heduru oi tahua be namo. Mai manau ida Baibel idia stadilaia taudia, Baibel idia lalopararalaia totona lauma helaga ena heduru idia abia taudia, bona Dirava ena ura ita dekenai idia diba bona Baibel ena hereva idia abia dae taudia edia heduru oi tahua be namo. Iehova ena Witnes taudia ida oi hereva diba henia o emai websait jw.org ai oi davaria gauna oi duahia namonamo. Baibel ia gwau: “Bema oi ese aonega totona oi noinoi . . . Dirava [“ena aonega”] do oi diba.”​—Aonega Herevadia 2:3-5.