ENOKA be lagani momo ia noho. Unai ita lalohadailaia totona, be do ia auka, to Enoka be lagani 365 gunanai ia noho​—hari iseda nega ai, unai be lagani momo herea! To ia be ia buruka momokani lasi. Lagani 5,000 gunanai, taunimanima be lagani momo idia mauri bona idia noho daudau. Tau ginigunana, Adamu ena mauri lagani be 600 neganai Enoka ia vara bona Adamu be lagani 300 mai kahana ma ia mauri! Ena bese taudia ma haida danu be lagani momo idia mauri. Unai dainai Enoka ena mauri lagani be 365 neganai ia be tau matamata bona mai ena goada bona ia noho daudau diba. To unai ia vara lasi.

Enoka be hekwakwanai momo ia davaria. Mani inai oi piksaia. Dirava ese Enoka dekenai ia henia sivaraina be taunimanima dekenai ia gwauraia neganai idia kamonai lasi. Unai dainai Enoka be ia ura do ia heau boio. Edia vairana toana amo idia hahedinaraia idia lalohisihisi bada. Idia inai henia. Ia gwauraia sivaraina dainai idia badu, bona Dirava idia gwauraia dika. Enoka idia dagedage henia diba, to ena Dirava, Iehova, do idia dagedage henia lasi. Reana Enoka ia laloa, iena famili do ia itaia lou eiava lasi. Ena adavana bona natudia kekeni o iena natuna mero Metusela bona iena tubuna mero Lameka ia laloa, a? (Genese 5:21-23, 25) Enoka ena sivarai be unai sibona, a?

Baibel ai Enoka ena sivarai be momo lasi. Ena sivarai be Baibel ena buka toi sibona dekenai idia hedinarai. (Genese 5:21-24, NWT; Heberu 11:5; Iuda 14, 15) To herevana ena sivarai be momo lasi, unai siri toi ese idia hahedinaraia Enoka be abidadama tauna. Oi be mai emu ruma bese, a? Mai gari lasi ida oi abia dae gaudia oi herevalaia, a? Bema oibe, Enoka ena abidadama karana amo gau momo do oi dibaia.

Tanobada be kara dika amo ia honu bona unai nega ai Enoka ia vara. Enoka be Adamu murinai ia vara tauna namba 7. Unai nega ai, taunimanima be metairametaira goevadae maurina idia haboioa lao noho. Unai dainai taunimanima be idia noho daudau diba. To unai nega ai edia lalohadai bona kara be ia dika. Dagedage karadia be idia bada. Uru iharuana ai unai kara dikadia idia matamaia, hegeregere, Kaino be ena tadikakana Abela ia hamasea. Kaino ena bese amo ia vara tauna ta ena dagedage bona badu dikadika karana be bada herea bona ia be Kaino ena dagedage karadia ia hanaia. Uru ihatoina ai kara dika ma haida idia matamaia. Taunimanima be Iehova ena ladana idia boiboi matamaia, to tomadiho dalana maorona ai unai idia karaia lasi. Idia ese Dirava ena ladana helagana idia hadikaia bona matauraia lasi.​—Genese 4:8, 23-26.

Enoka ena nega ai, unai bamona tomadiho koikoi karadia idia karaia. Enoka ia tubu daekau noho lalonai abia hidi ia karaia. Iena nega ai idia noho taudia do ia badinaia, a? Eiava guba bona tanobada ia karaia Dirava momokanina, Iehova, do ia badinaia? Reana ia be Abela ena sivarai ia diba. Badina Abela be Iehova ese ia ura henia tomadiho dalana ia badinaia bona ena abidadama dainai ia mase. Unai dainai Enoka be abia hidi ia karaia unai dala hegeregerena do ia  badinaia. Genese 5:22 ia gwau: “Enoka be Dirava danu idia turana karaia [“raka,”NW] noho.” Unai hereva ese ia hahedinaraia Dirava diba lasi taudia huanai Enoka sibona be Dirava badinaia tauna. Baibel ia hahedinaraia Enoka be Iehova ida ia raka tauna ginigunana.

Unai siri ese ia hahedinaraia Metusela ia vara murinai Enoka be Iehova ida ia do raka noho. Unai dainai ita gwau diba Enoka ena mauri lagani be 65 neganai ia be mai ena ruma bese. Ia be mai ena adavana, to Baibel ese ena ladana ia gwauraia lasi, bona edia “natuna tatau bona hahine” edia namba be Baibel ese danu ia gwauraia lasi. Bema tama ta be mai ena ruma bese bona Dirava ida ia raka noho, namona be ia gaukara goada Dirava ena dala hegeregerena ai ena ruma bese ia naria bona ubua. Enoka ia laloparara ena adavana ida ia noho hebou be namo, badina unai be Iehova ena ura. (Genese 2:24) Bona ia gaukara goada iena natudia dekenai Iehova Dirava ena dala ia hadibaia totona. Dahaka namo ia abia?

Baibel ese unai sivarai ibounai ia gwauraia lasi. Baibel lalonai, Enoka ena natuna mero, Metusela be ia mauri daudau ela bona abata badana ia vara. Baibel ese ena abidadama karana ena sivarai ta ia gwauraia lasi. To, Metusela be Lameka ena tamana. Lameka ena mauri lagani ese iena tubuna tauna Enoka ena mauri laganina ia hanaia. Lameka ia tubu daekau noho lalonai abidadama karana ia hahedinaraia. Iehova ese Lameka amo Noa dekenai do idia vara gaudia ia perovetalaia, Noa be Lameka ena natuna bona unai peroveta herevana be abata murinai ia guguru. Noa, be ena tubuna tauna Enoka bamona, Dirava ida ia raka. Noa be Enoka ia hedavari henia lasi. To Enoka be taga maurina ia rakatania. Noa be iena tamana Lameka, tubuna tauna Metusela o reana Enoka ena tamana Iareda amo unai bamona taga maurina ia dibaia diba. Noa ena mauri lagani be 366 neganai Iareda ia mase.—⁠Genese 5:25-29; 6:9; 9:1.

Enoka bona Adamu edia sivarai ena idau mani oi laloa. Adamu be goevadae tauna, to Iehova vairanai ia kara dika bona natudia dekenai gwau-edeede bona hisihisi ia henia hanai. Enoka be goeva dae lasi, to Dirava ida ia raka bona ena natudia dekenai Dirava abidadama henia karadia ia henia hanai. Enoka ena mauri lagani be 308 neganai, Adamu ia mase. Adamu ia mase neganai, ena bese ese ena tauanina latanai idia taitai, a? Ita diba lasi. To ita diba gauna be “Enoka be Dirava momokanina ida ia raka noho.”​—Genese 5:24.

Bema oi be mai emu ruma bese, Enoka ena abidadama karana amo oi dibaia gauna oi laloa. Oibe, emu ruma bese naria totona moni gaukara oi karaia be kerere lasi, to Dirava hesiai henia karana ese moni bona kohu ia hereaia. (1 Timoteo 5:8) Unai do oi mamia be hereva amo lasi to kara dekenai danu. Enoka ia karaia hegeregerena, bema abia hidi oi karaia Dirava ida oi raka bona Dirava ena hereva be oi ia hakaua, oi danu ese emu ruma bese ena abidadama oi hagoadaia diba​—idia ese unai haheitalai hereadaena do idia tohotohoa.

Enoka be abidadama tauna bona ia mamia inai kara dika tanobadana lalonai ia be sibona ia noho bamona. To ena Dirava, Iehova be unai ia itaia, a? Oibe, ia diba. Iehova ese ena abidadama hesiai tauna ida ia herevahereva dinana ia ginidae. Unai nega ai idia noho taudia totona Dirava ese Enoka dekenai sivarai ta ia henia. Dirava ese Enoka be peroveta tauna ai ia halaoa, bona Baibel ai ia be peroveta tauna ginigunana. Unai ita diba badina, Iuda, Iesu ena tadina, be  lagani tausen momo idia hanaia murinai Enoka ena peroveta herevana ia torea. a

Enoka ena peroveta herevana be dahaka? Baibel ia gwau: “Iehova be ena aneru helagadia tausen momo danu ia mai, taunimanima ibounai hahemaoro henia totona, bona Dirava idia matauraia lasi taudia ia kota henia totona, idia ese idia karaia kara dika ibounai dainai, bona kara dika taudia ese ia dekenai idia gwauraia hereva dika rohorohodia ibounai dainai.” (Iuda 14, 15) Oi dibaia gauna ginigunana be, Enoka be idaunega ai idia vara gaudia ia itaia bona hari ia herevalaia dalana ai ia hereva, hegeregere Dirava be peroveta herevadia hegeregerena ia kara vadaeni. Peroveta herevadia momo be unai dala tamona idia badinaia. Point be inai: Unai peroveta herevana be do ia guguru gauna ta ia herevalaia, bona reana Baibel ai ia noho dalana be hegeregere ia guguru vadaeni!​—Isaia 46:10.

Enoka be unai hadibaia herevana be idia kamonai taudia ibounai dekenai ia harorolaia neganai, iena hemami be edena bamona? Unai hadibaia hereva goadana lalonai inai hereva, Dirava idia matauraia lasi, kara dika ibounai bona hereva dika rohorohodia ese unai taudia edia kara bona idia karaia karadia ia hahedinaraia. Unai peroveta herevana ese taunimanima ibounai ia sisiba henia badina idia noholaia tanobada be ia dika momokani. Iehova be ena “aneru helagadia”​—danu ia mai neganai tanobada ai idia vara kara dika ibounai do haorea momokani. Enoka be mai lalogoada ida unai mai anina bada sisiba be taunimanima dekenai ia gwauraia bona ia sibona ese unai ia karaia. Unai ia vara lalonai, mero maragina Lameka be reana unai ia itaia. Ena badina ita lalopararalaia diba.

Enoka ena abidadama karana ese ita ia hagoadaia ita ta ta sibona dekenai inai henanadai ita henia, Dirava ese inai tanobada ia itaia dalana be ita itaia danu eiava lasi? Enoka ese unai hahemaoro herevana ia gwauraia neganai, unai be hari iseda nega danu ia herevalaia; Enoka ena nega danu be iseda nega bamona. Enoka ena sisiba hegeregerena, Iehova ese Noa ena nega ai abata badana ia mailaia bona kara dika tanobada ia hadikaia ore. To, unai nega ai ia vara dika ese ia hahedinaraia vaira nega ai dika bada do ia vara danu. (Mataio 24:38, 39; 2 Petero 2:4-6) Hari, Dirava be ena aneru helagadia danu ia noho hegaegae inai kara dika tanobadana dekenai kota maoromaoro idia mailaia totona. Namona be ita ta ta ese Enoka ena sisiba herevana ita laloa bada bona ma haida dekenai ita harorolaia danu. Reana iseda famili bona turadia be ita do idia dadaraia. Nega haida do ita mamia ita be sibona ita noho bamona. To, Iehova be Enoka ia rakatania lasi; unai hegeregere, hari danu Dirava be ena abidadama hesiai taudia do ia rakatania lasi!

Edena dala ai Enoka ia mase? Ia mase dalana be hoa dalana ai ia vara. Genese bukana ese inai bamona ia herevalaia, ia gwau: “Bona Enoka be Dirava momokanina ida ia raka noho. Bena gabeai ia noho lasi, badina Dirava ese ia abia oho.” (Genese 5:24) Dirava ese edena dala ai Enoka ia abia oho? Aposetolo Paulo ese inai bamona ia herevalaia. Ia gwau: “Enoka ia abidadama dainai, Dirava ese ia abia lao, unai amo mase ia itaia lasi, bona ia be gabu ta dekenai idia davaria lasi, badina Dirava ese ia abia lao. To unai ia do vara lasi neganai, Dirava ia hahedinaraia ia be Enoka dekenai ia moale.” (Heberu 11:5) Paulo ese inai hereva, “ia abia lao, unai amo mase ia itaia lasi” ia gwauraia neganai, dahaka ia hahedinaraia? Baibel hahanaia taudia haida idia gwau Dirava ese Enoka be guba dekenai ia abia lao. To Dirava be unai do ia karaia lasi. Baibel ia hahedinaraia guba dekenai daekau lao tauna ginigunana be Iesu Keriso.​—Ioane 3:13.

Edena dala ai Enoka be ia “lao” unai amo ia be “mase ia itaia lasi”? Iehova ese Enoka ia hamahutaia bona metairametaira ena laga ia kokia ela bona ia mase, unai  amo ia idia inai henia taudia edia imana dekenai do ia mase lasi. To, unai ia do vara lasi neganai, “Dirava ia hahedinaraia ia be Enoka dekenai ia moale.” Edena dala ai? Enoka ia do mase lasi negana, Dirava amo matahanai ta ia abia, reana unai matahanai lalonai ia ese tanobada paradaiso ia itaia. Unai ia itaia noho lalonai Iehova ena lalonamo ia abia bona ena mahuta lalonai ia mase. Aposetolo Paulo be Enoka bona abidadama tatau bona hahine ma haida edia sivarai ita torea neganai, inai bamona idia ia gwauraia: “Idia ibounai be edia abidadama idia dogoatao ela bona idia mase” (Heberu 11:13) Unai murinai, ia idia inai henia taudia ese ena mase tauanina idia tahua to “gabu ta dekenai idia davaria lasi,” reana Iehova ese hoa dalanai ena tauanina ia haboioa, unai amo taunimanima ese ena mase tauanina do idia hadikaia lasi o do idia gaukaralaia lasi tomadiho koikoi totona. b

Unai siri ena badina ita laloa lalonai, Enoka ia mase dalana mani ita laloa. Inai oi piksaia. Laloatao unai be dala tamona sibona. Enoka be ia heau bona ia idia lulua noho, ena goada ia ore. Ia idia dagedage henia taudia be ia idia tahua noho, ena hahemaoro hereva dainai idia badu dikadika. Enoka be laga-ani totona hunia gabuna ta ia davaria, to ia diba ena heau boio gabuna ta be lasi. Ia be kahirakahira do idia alaia inai. Ia laga-ani noho lalonai, ena Dirava dekenai ia guriguri. Bena lalomaino ia abia. Matahanai ta amo ia itaia, ia be gabu daudau ta dekenai ia ginidae vadaeni.

Mani oi laloa, laulau namona ta be ena vairanai ia kehoa bona unai laulau ai, gabu hairaina ta ia itaia. Unai be hari ia itaia gauna bamona lasi. Reana ia itaia unai gabu be hairai bona ia be Eden umana, to unuseniai taunimanima idia lulua raka-lasi kerubi anerudia idia noho lasi. Tatau bona hahine​—gorere be lasi bona edia tauanina be ia matamata​—be hutuma. Mai maino ida idia noho. Enoka ia diba gauna be, inai heheni bona tomadiho koikoi edia dagedage karadia, to unai gabu dekenai be unai bamona lasi. Enoka be Iehova ena gwauhamata, lalokau bona lalonamo ia mamia. Ia abia dae momokani ia be unai gabu dekenai ia noho bona unai be ena noho gabuna ai do ia halaoa. Ia moale bona unai murinai ena matana ia koua bena ena mahuta ai ia mase.

Bona unai bamona ia mahuta ema bona hari​—ia mahuta mase. Ita diba momokani ia be Iehova Dirava ese ia laloatao noho! Iesu ia gwauhamata hegeregerena, nega ia mai noho, Dirava ese ia laloatao noho taudia ibounai ese Keriso ena gadona do idia kamonai bona guria gabu lalonai do idia raka-lasi, bona edia matana idia kehoa neganai, tanobada matamatana bona hairaina do idia itaia.​—Ioane 5:28, 29.

Oi ura unai gabu dekenai oi noho? Vaira nega ai Enoka oi davaria neganai do oi abia moalena oi laloa. Ia amo gau momo do ita dibaia, ani? Ita ia hadibaia diba bema iseda lalona ena matana amo ena dina dokona ai ia karaia gaudia ita laloatao. To, hari namona be ia amo mai anina bada gauna ta ita dibaia. Paulo ese Enoka ia herevalaia murinai, inai hereva ia gwauraia, ia gwau: “Bema tau ta be abidadama lasi, ia ese Dirava ia hamoalea diba lasi” (Heberu 11:6) Abidadama goada tauna Enoka ita tohotohoa totona, unai be mai anina bada!