Rau 3 ai ia noho gori ese ia hahedinaraia, Delphi ese Croesus ia koia bona tuari ia lao neganai Parasa ena king ese ia halusia. To Baibel ese Parasa ena king dekenai ia perovetalaia gaudia ena kahana ibounai be idia guguru.

Lagani 200 gunanai​—king ia do vara lasi neganai—Heberu ena peroveta tauna Isaia ese ena toretore lalonai Kurese ena ladana ia gwauraia bona ia ese Babulonia hanua do ia hadikaia dalana ia sivarailaia danu.

Isaia 44:24, 27, 28: “Lohiabada ia hereva, ia gwau, “Lauegu oda hereva dekena amo, davara mai ena ranu dobudia be do idia kaukau. Lau ese king Kurese dekenai do lau hereva, lau gwau, ‘Oi ese lauegu ladana dekenai, tanobada do oi gunalaia. Lauegu ura be oi ese do oi karaia. Oi ese do oi oda, vadaeni Ierusalema do idia haginia lou. Bona oi ese do oi oda, vadaeni Dubu Helaga ena badina nadidia do idia haginia!’””

Greek ena histori tauna ladana Herodotus ese ia hahedinaraia, Kurese ena tuari oreana ese Babulonia ai Euparate Sinavai ena aru dalana idia haidaua. Kurese ena palani dainai ena tuari oreana be sinavai idia hanaia bona hanua lalonai idia vareai. Kurese ia kwalimu murinai, Babulonia ena igui hesiai henunai idia noho Iuda taudia ia ruhadia bona Ierusalema dekenai ia siaidia lao dubu helaga idia haginia lou totona, badina Ierusalema be lagani 70 gunanai idia hadikaia vadaeni.

Isaia 45:1: “Lohiabada ese Kurese ia abia hidi vadaeni, king dagi totona! Lohiabada ese Kurese ia abia hidi, bese idauidau tuari dekenai do ia halusia totona. Lohiabada ese Kurese ia siaia noho, king edia siahu do ia hamanokaia totona. Lohiabada ese hanua badadia edia magu iduara do ia kehoa, Kurese do ia raka vareai totona.”

Parasa taudia be hanua ena iduara badadia rua amo idia raka vareai, badina unai iduara be gima taudia ese idia koua lasi. Bema Babulonia taudia be Kurese ena palani idia diba, sinavai badinai idia noho iduara ibounai do idia koua. To unai hanua be ta ese ia gimaia lasi.

Baibel ai idia noho peroveta herevadia ibounai be idia guguru, bona inai peroveta herevana danu be ia guguru momokani. a Taunimanima be edia dirava koikoidia amo idia peroveta koikoi, to Baibel ena peroveta herevadia be Ia Peroveta Diravana amo ia mai, ia gwau: “Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna. Lau gwau lauegu ura, lauegu palani, be do ia gini noho, do ia moru lasi. Lau ura karaia gaudia ibounai be do lau karaia.”​—Isaia 46:10.

Dirava momokani, iena ladana be Iehova, ese unai hereva ia gwauraia. Unai ladana ena anina be “Ia ese Ia Halaoa.” Unai ese ia hahedinaraia, ia diba bona  ena ura hegeregerena vaira nega ai do idia vara gaudia ia palanilaia. Unai ese ita ia hagoadaia, ia gwauhamatalaia gaudia ibounai be do idia guguru.

Baibel ese hari iseda nega ia perovetalaia dalana oi ura diba, a? Lagani 2,000 gunanai Baibel ia peroveta, “dina gabediai nega aukadia do idia vara.” Dina gabediai dahaka do ia vara? Inai tanobada o taunimanima ia herevalaia lasi, to ia be lagani tausen momo lalonai taunimanima ese idia mamia hisihisi, dagedage bona lalohisihisi ia herevalaia. Idia perovetalaia “dina gabediai” do idia vara gaudia mani ita herevalaia.

2 Timoteo 3:1-5: “To namona be inai oi diba, dina gabediai nega aukadia do idia vara, bona unai ese taunimanima do idia hahekwarahia bada. Badina taunimanima be sibodia do idia laloa bada, moni do idia ura henia bada, sibodia do idia abia isi, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia hahedinaraia lasi, ma haida do idia badinaia lasi, ruma bese lalonai lalokau be lasi, do idia ura lasi gwauhamata idia karaia, idia be ladana hadikaia taudia, sibodia edia ura do idia biagua lasi, do idia dagedage, kara namodia do idia ura henia lasi, ma haida edia mase dalana do idia karaia, do idia kwara auka, do idia heagi, moale karadia do idia ura henia bada, to Dirava do idia lalokau henia lasi, Dirava badinaia karana be toana sibona do idia hahedinaraia, to ena siahu do idia abia dae lasi.”

Hari taunimanima edia kara amo unai oi itaia, a? Oi itaia taunimanima be sibodia idia laloa bada, moni idia mataganigani henia bona idia hekokoroku, a? Taunimanima be haida do idia badinaia lasi bona do idia ura lasi gwauhamata idia karaia? Momokani matamata taudia momo be tama sina idia kamonai henia lasi bona taunimanima ibounai be moale karadia do idia ura henia bada, to Dirava do idia lalokau henia lasi. Bona dina ta ta ai, hekwakwanai be idia bada idia lao noho.

Mataio 24:6, 7: “Umui ese gabu idauidau amo tuari edia sivarai do umui kamonai.  . . Bese ta do ia toreisi bese ta do ia tuari henia, bona basileia ta ese basileia ta do ia tuari henia.”

Lagani 1914 ai, taunimanima haida idia gwau, tuari momo ai taunimanima 100 milioni mai kahana idia mase, unai namba ese bese ibounai edia popiuleisen ia hanaia. Taunimanima edia taitai, lalohisihisi bona hisihisi mani oi laloa. Tanobada gavamanidia be unai kerere idia itaia bona tuari idia haorea, a?

Mataio 24:7: “Bona gabu idauidau ai hitolo bada . . . . do idia vara.”

Orea ladana World Food Programme ia gwau: Tanobada hegegemadai ena aniani be hegeregere lasi taunimanima ibounai ubua totona, badina taunimanima 815 milioni be hanuaboi ibounai idia aniani lasi bona idia mahuta. Idia momo be malnutrition o hitolo gorere idia abia. Tahua gaukara amo idia davaria, lagani ta ta ai natu maragidia 3 milioni bamona be hitolo dainai idia mase.

Luka 21:11: “Bona tano mareremarere badadia do idia vara.”

Lagani ta ta ai, taunimanima ese tano mareremarere 50, 000 bamona idia mamia. Tano mareremarere 100 bamona ese ruma momo idia hadikaia bona tano mareremarere badana be lagani ta ta ai ia vara. Tahua gaukara amo idia davaria lagani 1975 bona 2000 huanai taunimanima 471, 000 be tano mareremarere amo idia mase.

Mataio 24:14: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”

Iehova ena Witnes taudia, 8 milioni mai kahana be tano 240 mai kahana ai Dirava ena Basileia ena sivarai namona idia harorolaia noho. Sivarai namona be siti badadia, gunika hanuadia, bona ororo ataiai momokani ai idia noho hanuadia lalonai idia harorolaia noho. Inai gaukara be Dirava ena ura hegeregerena idia hagugurua murinai, “dokona be do ia ginidae.” Unai ena anina be dahaka? Taunimanima edia lohia dalana be do ia ore bona Dirava ena Basileia ese tanobada do ia lohiaia. Dirava ena Basileia ese dahaka hahenamo idauidau do ia mailaia? Unai oi dibaia totona, rau gabedia oi duahia.