Dirava ena Basileia ena sivarai namona be tanobada ibounai dekenai idia harorolaia vadaeni, Iesu ia peroveta hegeregerena. (Mataio 24:14) Daniela bukana ese ia hahedinaraia unai Basileia be Dirava ena gavamani. Daniela karoa 2 ai, taunimanima edia gavamani o basileia, edia lohia bona moru sivaraidia idia noho, unai be idaunegai Babulonia ena nega amo ema bona hari danu ia herevalaia. To vaira nega ia herevalaia totona, siri 44 mani ita itaia, ia gwau:

“Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”

Inai peroveta herevana bona Baibel ai idia noho peroveta herevadia ma haida ese ia hahedinaraia, Dirava ena Basileia ese inai tanobada ena lohia dalana ena gabu do ia abia bona noho namo bona maino do ia mailaia. Basileia henunai mauri be do edena bamona? Henunai idia noho gwauhamata be kahirakahira do idia guguru.

• TUARI DO IA ORE

  Salamo 46:9: “Tuari be Dirava ese ia hadokoa noho, tanobada kahana ibounai dekenai. Ia ese peva ia makohia noho, bona io be ia ese ia hakwaidua noho. Kariota be ia ese lahi dekenai ia gabua noho.”

  Do ia vara gauna mani oi laloa. Taunimanima ese tuari kohu karaia totona idia gaukaralaia aonega bona moni be unai negai taunimanima ibounai do ia hamasea lasi to do ia durua bada. Dirava ena Basileia henunai unai gwauhamata be do ia guguru momokani.

• GORERE DO IA ORE

  Isaia 33:24: “Ta ese do ia gwau lasi, “Lau be gorere.”

  Inai oi laloa. Tanobada be do edena bamona bema kudou-gorere, kensa, malaria o gorere ma haida be lasi. Ita be hospital dekenai do ita lao lasi eiava muramura do ita inua lasi. Iseda tauanina be do ia goeva​—vaira nega ai taunimanima be unai bamona mauri do idia noholaia.

• ANIANI BE DO IDIA MOMO HEREA

  Salamo 72:16: “Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”

  Tanobada ai taunimanima ibounai totona aniani be do idia tubu namonamo bona do idia momo herea. Hitolo bona malnutrition gorere be do lasi.

• LALOHISIHISI, TAITAI, BONA MASE BE DO IDIA ORE

  Apokalupo 21:4: “Bona ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”

   Anina be tanobada paradaisona ai do ita noho ela bona hanaihanai! Unai be iseda lalokau Havaraia Tauna, Iehova Dirava ese ia gwauhamatalaia.

Oi laloa unai gwauhamata do ia vara momokani, a? Herevana taunimanima momo idia abia dae Baibel ese mauri namona ia herevalaia, to badina momo dainai do ia auka mauri hanaihanai helarona idia lalopararalaia totona. Unai kara dekenai ita hoa lasi, badina tanobada ai ta be unai bamona mauri ia do mamia lasi, bona do ia auka ita dekenai ia gwauraia totona.

Taunimanima be kara dika bona mase ese ia guidia vadaeni, bona idaunegai amo hisihisi, lalometau bona lalohekwarahi momo idia do davaria noho, unai dainai taunimanima momo be inai mauri idia manadalaia vadaeni. To unai mauri be ia idau momokani, iseda Havaraia Tauna, Iehova Dirava ese ia gwauhamatalaia maurina amo.

Iseda abidadama ia hagoadaia bona ena gwauhamata ita laloa bada totona, Dirava ese ita dekenai inai hereva ia gwauraia, ia gwau: “Inai bamona danu, lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”​—Isaia 55:11.

Baibel ese Iehova ia gwauraia, “Ia koikoi diba lasi Diravana.” (Tito 1:2) Dirava ese vaira nega totona inai gau namodia ia gwauhamatalaia dainai, namona be sibona dekenai inai henanadai ita henia: Taunimanima be Dirava ese ia gwauhamatalaia tanobada matamata lalonai do idia noho, a? Dirava ena hahenamo ita abia totona dahaka ita karaia be namo? Inai atikol ai idia noho rau gabedia ai, unai henanadai edia haere do oi davaria diba.