Inai haba ladana, Arch of Titus be mai ena du badadia rua, bona ena vairanai be momo ese idia dibaia sivaraina ta idia torea. Taunimanima momo be idia diba lasi, to unai haba ai Baibel ese ia perovetalaia sivarai ta ia noho: Inai haba o Arch of Titus ai be Baibel ena peroveta herevadia hegeregerena idia torea bona unai ese ia hahedinaraia, ia be unai peroveta herevadia ia gwauraia maoromaoro.

Aposetolo edia negai, Roma Basileia ese Britain amo ia lao bona Gaul (hari idia gwauraia France) bona Aigupito ena rijin, ia lohiaia. To Roma Basileia be Iudea ena provinsi dekenai ia moale lasi. Unai provinsi be gabu daudau ai ia noho.

Buka ta (Encyclopedia of Ancient Rome) ia gwau: “Roma be ia henunai idia noho hanua haida, hegeregere, Iudea ia inai henia momokani. Iuda taudia be Roma ena tau badadia idia inai henidia, badina Iuda ena kastom idia laloa bada lasi bona Roma taudia be Iuda taudia idia kara auka henidia, badina idia hekokoroku momo.” Iuda taudia momo idia ura lohia tauna ta ese ia durudia, unai amo Roma taudia do idia kokia bona Israela taudia dekenai noho namo do ia mailaia. To, lagani 33 C.E. ai Iesu Keriso ia gwauhamata, dika bada be Ierusalema dekenai do ia vara.

Iesu ia gwau: “Badina nega do ia ginidae, emu inai taudia ese au mai matadia amo magu aukana do idia karaia bona oi do idia hagegea bona kahana ibounai amo oi do idia tuari henia. Oi bona oi lalonai idia noho natudia be tano dekenai do idia negea diho, bona nadi ta be nadi ta latanai do ia noho lasi, badina oi idia sekea negana oi diba lasi.”​—Luka 19:43, 44.

Iesu ena hereva dainai ena hahediba taudia idia daradara. Idia lao Ierusalema ena dubu helaga idia itaia bona dina rua murinai, edia ta be Iesu dekenai ia gwau: “Hadibaia Tauna e, inai nadi bona ruma badadia oi itaia!” Dubu helaga ena nadi tamona ena bada (long) be 11 mitas, ena lababa (wide) be 5 mitas bona ena lata (high) be 3 mitas! To Iesu ia haere, ia gwau: “Nega ta do ia mai bona hari umui itaia gaudia ibounai be do idia moru, iniseniai nadi ta be nadi ta latanai do ia noho lasi, to idia ibounai do idia moru.”​—Mareko 13:1; Luka 21:6.

Iesu be ma idia dekenai ia gwau: “Umui itaia Ierusalema be tuari oreadia ese idia hagegea neganai, do umui diba ena hadikaia ore negana be ia mai kahirakahira. Unai neganai Iudea dekenai idia noho taudia be ororo dekenai do idia heau lao be namo bona Ierusalema lalonai idia noho taudia be unai gabu do idia rakatania, bona badina hanuadia dekenai idia noho taudia be ia dekenai do idia vareai lasi.” (Luka 21:20, 21) Iesu ena hereva ia vara momokani, a?

Lagani 33 idia hanaia vadaeni, bona Roma Basileia be Iuda taudia idia do inai henia noho. To lagani 66 C.E. ai, Iudea ai ia noho Roma ena gavamani tauna ta, Gessius Florus, ese dubu ena maua ai ia noho moni ia henaoa. Iuda taudia be idia badu dikadika bona idia haheauka diba lasi. Daudau lasi murinai, Iuda tuari taudia be Ierusalema ai idia vareai, Roma tuari taudia idia alaia bona Roma gavamani amo idia sibona totona independens idia abia.

 Hua toi mai kahana murinai, Cestius Gallus bona Roma tuari taudia 30,000 mai kahana be Ierusalema dekenai idia lao Iuda taudia edia gwau-edeede karana idia koua totona. Karaharaga, unai siti lalonai idia vareai bona dubu helaga ena magu idia makohia. Bona idia giroa lou, to ena badina be ita diba lasi. To gwau-edeede Iuda taudia idia laloa idia kwalimu vadaeni unai dainai Roma tuari taudia edia murinai idia heau lao idia luludia totona. Unai ia vara neganai Iesu ena sisiba idia badinaia Keristani taudia be karaharaga Ierusalema hanuana idia rakatania bona hanua ena ororo amo idia heau lao ela bona Ioridane Sinavai ena ororo kahanai idia ginidae.​—Mataio 24:15, 16.

Murina laganina ai, Roma taudia ese edia palani Iuda taudia tuari henia totona idia hamatamaia lou, bona unai be Jeneral Vespasian bona ena natuna, Titus ese idia gunalaia. To, lagani 68 C.E. ai Roma ena Pavapava Nero ia mase, unai murinai Vespasian be Roma dekenai ia giroa lou ena terona ia abia totona. Bona Iuda taudia tuari henia ena palani be ena natuna Titus dekenai ia rakatania, mai ena tuari taudia 60,000 ida.

Lagani 70 C.E., June ai, Titus ese iena tuari taudia ia hadibaia Iuda tanodia ai idia noho au ibounai do idia utua diho, unai amo au mai matadia do idia karadia bona Ierusalema ena magu do idia koua hagegea, ena lata be kilomita 7. Iesu ena peroveta herevana hegeregerena, hua toi murinai, Roma tuari taudia ese dubu helaga idia gabua bona ena nadi badadia idia makohi. (Luka 19:43, 44) Tahua gaukara ia karaia tauna ta ia gwau: “Roma tuari taudia ese Ierusalema siti lalonai bona ena badinai idia noho taudia ibounai 250,000 bona 500,000 bamona huanai idia hamasedia.”

Lagani 71 C.E. ai, Titus be Italy dekenai ia giroa lou, badina Roma taudia be ia totona aria badana idia karaia. Unai siti ai idia noho taudia ibounai be idia kamonai Roma ia kwalimu dainai idia moale bada.

Roma tuari taudia be taoni ibounai lalonai idia loaloa neganai, hutuma idia hoa. Hutuma ese idia itaia, Roma tuari taudia be tuari ai idia abia gaudia, hegeregere, Ierusalema dubu ena kohu bona bouti edia laulau idia huaia bona taoni lalonai idia raka.

Lagani 79 C.E ai, Titus ese ena tamana, Vespasian, ena pavapava dagina ia abia. To lagani rua murinai, Titus ia mase. Bona ena tadina merona, Domitian, ese ena terona ia abia. Unai dainai Titus laloatao totona ena arch o haba ia haginia.

Lagani ta ta ai, tano idauidau amo taunimanima idia mai bona Roma dekenai inai haba o Arch of Titus idia itaia. Taunimanima be unai haba idia itaia neganai, haginia bona karaia taudia edia gaukara namona idia laloa, bona ma haida be Roma gavamani ena siahu idia laloa eiava Ierusalema bona ena dubu helaga ena moru dalana idia laloa.

To, Baibel idia duahia namonamo taudia idia gwau, inai haba eiava Arch of Titus be mai anina bada gauna ta ia hahedinaraia. Taunimanima momo be idia diba lasi, to unai haba ai Baibel ese ia perovetalaia sivaraina ia gwauraia maoro bona ia hahedinaraia unai peroveta herevadia be Dirava ena hahekau henunai idia torea.​—2 Petero 1:19-21.