Inai magasin ena atikol ta ai, Iesu ese ia gwauraia toa ita herevalaia. Unai toa ese ia hahedinaraia Dirava ena Basileia be guba ai ia haginia vadaeni bona Iesu Keriso be King.

Baibel ia gwau Iesu be Basileia ena lohia siahuna ia abia neganai, Satani bona ena demoni be guba amo do ia negea diho. Bona hari tanobada dekenai hekwakwanai idia havaraia noho, unai badina ta dainai lagani 1914 amo dika be ia bada ia lao.​—Apokalupo 12:7, 9.

Herevana tanobada ai dika idauidau idia vara noho, to Iesu, Dirava ena Basileia ena King, ese gau haida ia karaia tanobada hegegemadai taunimanima ia durua totona. Iesu ese ia perovetalaia tanobada hegegemadai Baibel hadibaia gaukarana dainai, hari momo be edia dina ta ta ena mauri lalonai Baibel ena hakaua herevadia idia dibaia bona badinaia noho. (Isaia 2:2-4) Taunimanima milioni momo be moni gaukara dekenai lalohadai maorona idia abia karana ese idia ia durua edia ruma bese maurina idia hanamoa bona kohu momo tahua lasi maurina idia moalelaia totona. Unai taudia be hari edia namo habadaia dalana idia dibaia noho bona idia be Dirava ia ura henia taudia bamona ai idia lao dainai, iena Basileia henunai do idia noho.

Herevana Iesu be guba ai ia lohia vadaeni, to taunimanima be tanobada ai idia do lohia noho. To, Dirava ese Iesu ia hamaoroa, ia gwau: “Oi dekenai idia tuari henia taudia do oi biagua.” (Salamo 110:2) Kahirakahira Iesu ese inai taudia ibounai do ia hadikaia ore bona mai ura ida Dirava idia kamonai henia taudia edia hekwakwanai ibounai do ia hanamoa.

Kahirakahira, Dirava ena Basileia ese

• Tomadiho koikoi do ia hadikaia ore. Baibel ese tomadiho koikoi be ariara hahine ida ia hahegeregerea. Tomadiho idauidau ese Dirava totona hereva koikoidia idia hadibaia bona taunimanima edia mauri idia hametaua karadia be do idia ore. Bema unai ia vara, taunimanima momo do idia hoa.​—Apokalupo 17:15, 16.

• Taunimanima edia lohia dalana do ia haorea. Dirava ena Basileia ese kara ta do ia karaia taunimanima edia lohia dalana ia haorea totona.​—Apokalupo 19:15, 17, 18.

• Kara dika taudia do ia kokia. Kara dika idia ura karaia taudia bona Dirava idia ura lasi kamonai henia taudia be edena bamona? “Kara dika taudia be tano dekena amo, . . . do ia kokidia momokani.”​—Aonega Herevadia 2:22.

• Satani bona demoni ibounai do ia hadikaia ore. Satani bona demoni ibounai ese ‘tanobada besedia do idia hakaudia kerere lou lasi.’​—Apokalupo 20:3, 10.

Dirava ena Basileia idia abiadae taudia dekenai unai gaudia ibounai edia anina be dahaka?

Iesu be guba ai King gaukara ia karaia, bona tanobada ena lohia taudia idia karaia diba lasi gaudia momo do ia karaia. Iesu bona tanobada amo Iehova ia abia hidi 144,000 taudia be do idia lohia hebou. (Apokalupo 5:9, 10; 14:1, 3) Ia ese tanobada ai Dirava ena ura do ia hagugurua momokani. Dirava ena Basileia ese tanobada ai do idia noho taudia totona dahaka do ia karaia?

• Gorere bona mase do ia haorea momokani. “Siona dekenai idia noho taudia ta ese do ia gwau lasi, ‘Lau be gorere,’” bona “mase be do ia ore.”​—Isaia 33:24; Apokalupo 21:4.

• Maino korikorina bona noho namo do ia mailaia. Oiemu natudia be “mauri namona bona maino do idia davaria,” bona “ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi.”​—Isaia 54:13; Mika 4:4.

• Gaukara namodia do ia henia. “Edia imana gaukara dekenai idia karaia gaudia do idia moalelaia. Do idia hekwarahi kava lasi.”​—Isaia 65:22, 23.

• Tanobada idia hadikaia karadia do ia haorea. “Taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo.”​—Isaia 35:1.

• Taunimanima dekenai mauri hanaihanai abia dalana do ia hadibaia. “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.”​—Ioane 17:3.

Dirava ia ura unai hahenamo idauidau oi moalelaia. (Isaia 48:18) Atikol ma ta ai, hari dahaka do oi karaia unai amo vaira negai mauri namona oi moalelaia diba do ia herevalaia.