LUZIA ENA AENA LAURINA BE IA DIKA DAINAI IA RAKA NAMONAMO LASI. Ia maragi neganai, ia be poliomyelitis gorerena ia abia, unai be daihanai gorerena ta bona tauanina lalonai ia noho varovaro ia hadikaia bona tauanina ena kahana haida idia marere lasi. Ena mauri lagani be 16 neganai, Luzia ena bosi be ia dekenai ia gwau: “Dirava ese oi ia panisia badina emu sinana oi gwau-edeede henia bona oi be kekeni dikana.” Lagani momo idia ore murinai, Luzia be ena bosi ese ia gwauraia herevana ia laloa momo bona ia lalohisihisi.

DAMARIS BE BRAIN CANCER IA ABIA NEGANAI, iena tamana ese ia nanadaia: “Dahaka oi karaia dainai inai gorere oi abia? Reana gau dikana ta oi karaia. Unai dainai Dirava ese oi ia panisia.” Damaris be ena tamana ena hereva dainai ia lalohisihisi bada.

Lagani tausen momo lalonai taunimanima idia abia dae Dirava be gorere amo taunimanima ia panisia. Buka ta ladana, Manners bona Customs of Bible Lands ia gwau, Keriso ena negai idia noho taudia idia abia dae “gorere be gorere tauna ena kara dika, eiava ia karaia karadia amo, bona unai be ia karaia kara dikana ena panisi.” Buka ta ladana Medieval Medicine and the Plague ia gwau, lagani 500 bona 1500 C.E. huanai, “taunimanima haida idia abia dae Dirava be gorere amo ta ena kara dika davana ia henia o ia panisia.” Unai dainai, lagani 600 gunanai Europe ai, gorere ta dainai taunimanima milioni momo idia mase neganai, Dirava be unai dala amo kara dika taudia ia hahemaoro henidia, a? Eiava doketa taudia edia tahua gaukaradia amo idia davaria gorere be gaigai maragidia amo ia vara? Reana haida do idia laloa, taunimanima edia kara dika dainai Dirava be momokani gorere amo idia ia hahisia, a? *

MANI OI LALOA: Bema taunimanima idia laloa Dirava ese gorere bona hisihisi amo idia ia panisia, vadaeni dahaka dainai Iesu ese taunimanima edia gorere ia hanamoa? Unai ese Dirava ena kota maoromaoro bona kara maoromaoro karana ia hahedinaraia lasi, a? (Mataio 4:23, 24) Iesu be Dirava ena kara ia hakoikoia diba lasi. Ia gwau: “Hanaihanai ia hamoalea gaudia lau karaia” bona, “Tamana ese lau dekenai ia henia hahegani lau badinaia noho.”​—⁠Ioane 8:29; 14:31.

Baibel ena hereva be momokani. Iehova Dirava be “ia kara dika lasi.” (Deuteronomi 32:4) Hegeregere, Dirava be peleini ai ia guia tauna ta ia panisia totona, peleini do ia hadikaia lasi, bona kerere lasi taudia handred momo do ia hamasedia kava lasi! Dirava ena kara maoromaoro taravatudia hegeregerena, Aberahamo, Dirava ia abidadama henia tauna, ia gwau Dirava be ‘kara maoromaoro bona kara dika taudia danu nega tamona do ia alaia ore’ diba lasi. Ia gwau, unai be ‘iena kara lasi.’ (Genese 18:23, 25) Danu, Baibel ia gwau, “Dirava ese, kara dika ia karaia lasi”; ia be do ia “kerere lasi.”​—⁠Iobu 34:10-12.

Hisihisi ita davaria neganai namo lasi ita laloa kara dika ta dainai Dirava ese ita ia panisia. Iesu bona ena hahediba taudia be, matana kepulu tauna ta idia itaia neganai, unai lalohadai ia hamaoromaoroa. Baibel ia gwau: “Ena hahediba taudia ese ia idia nanadaia: ‘Rabi e, daika ia kara dika, inai tauna eiava ena tama sina, unai dainai ia vara neganai ia matakepulu?’ Iesu ia haere, ia gwau: ‘Inai tauna bona ena tama sina idia kara dika lasi, to Dirava ena gaukara be ia dekena amo do ia hedinarai.’”​—Ioane 9:1-3.

Iesu ese ena hahediba taudia edia lalohadai hamaoromaoroa totona, ia hamaorodia unai tau ena  matana ia kepulu be ena tama sina o iena kerere lasi neganai, idia hoa bada. Iesu ese unai matakepulu tauna ena matana ia hanamoa sibona lasi, to taunimanima ese Dirava dekenai idia abia lalohadai kererena ia hamaoromaoroa. (Ioane 9:6, 7) Hari inai negai, gorere badadia idia abia taudia idia diba edia hisihisi be Dirava ese ia havaraia lasi, unai dainai edia lalona ia goada.

Baibel ese ita ia hadibaia

• “Ta ese dika gaudia amo Dirava ia tohoa diba lasi bona Dirava ese dika gaudia amo tau ta ia tohoa lasi.” (IAMESI 1:13) Momokani, lagani handred momo lalodiai taunimanima idia hahisia “dika gaudia” hegeregere, gorere, hisihisi, bona mase be kahirakahira do idia ore vaitani.

• Iesu Keriso ese “gorere taudia ibounai ia hanamoa.” (MATAIO 8:16) Iesu be ia dekenai idia mai taudia ibounai ia hanamoa karana amo ia hahedinaraia, vaira negai Dirava ena Basileia ese tanobada hegegemadai unai do ia karaia.

• “Ia [Dirava] ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”​—APOKALUPO 21:3-5.

Dahaka dainai taunimanima ese hisihisi bada idia davaria noho? Lagani handred momo lalonai, taunimanima be unai henanadai idia do laloa noho. Bema Dirava be hisihisi ia havaraia lasi, vadaeni daika ese hisihisi ia havaraia noho? Unai henanadai edia haere be atikol ma ta ese do ia herevalaia.