Bema hisihisi be Dirava amo ia mai lasi, vadaeni daika ese ita davaria hisihisi hegeregere, hitolo bada, ogogami, tuari, gorere bona disasta ia havaraia noho? Dirava ena Hereva, Baibel ese ita davaria hisihisi ena badina toi ia gwauraia:

1. Dagedage, Sibona Laloa Bada bona Inai Henia Karana. “Taunimanima haida ese ma haida idia biagua noho, bona idia hisihisi henidia noho.” (Hadibaia Tauna 8:9) Nega momo taunimanima be hisihisi idia davaria, badina ma haida ese idia dagedage henidia bona hahisidia noho.

2. Nega Bona Idia Vara Kava Gaudia. Taunimanima idia hisihisi noho, “badina ibounai ese nega dika idia davaria noho, bona inai dika ia vara kava noho.” (Hadibaia Tauna 9:11) Taunimanima be nega kererena lalonai gabu kererena dekenai idia ginidae o taunimanima be sibona idia naria namonamo lasi o kerere idia karaia dainai aksiden idia davaria.

3. Tanobada Ena Lohia Dikana. Baibel be taunimanima ese idia davaria hisihisi ena badina ia gwauraia. Baibel ia gwau: “Ita diba ita be Dirava amo, to tanobada ibounai be Dika Tauna ena siahu lalonai ia noho.” (1 Ioane 5:19) Unai “dika tauna” be Satani Diabolo. Guna, ia be Dirava ena aneru ta, to “hereva momokani ia badinaia lasi.” (Ioane 8:44) Aneru ma haida be Satani idia badinaia bona Dirava idia gwau-edeede henia, badina idia ura lasi ta ese idia do ia biagua, bena idia be demoni ai idia lao. (Genese 6:1-5) Satani bona ena demoni edia gwau edeede negana amo ema bona hari, edia siahu idia gaukaralaia noho inai tanobada ai idia vara gaudia idia biagua totona. Unai gaudia be hari ita itaia diba. Hari, Diabolo be ia badu dikadika bona “ia be tanobada ibounai ia hakaua kerere noho” bona unai ese dika bada ia havaraia. (Apokalupo 12:9, 12) Momokani, Satani be lohia dikana. Taunimanima hahisia karana ia moalelaia. Dirava be hisihisi ia havaraia lasi, to Satani be inai tanobada ai idia vara hisihisi ibounai ia havaraia noho.

MANI INAI OI LALOA: Diabolo be kerere lasi taudia dekenai hisihisi ia havaraia noho. To Baibel ia gwau: “Dirava be lalokau.” (1 Ioane 4:8) Dirava be lalokau dainai, ia “be kara dika ta do ia karaia diba lasi, Badina Siahu Ibounai Diravana be kerere ta lasi.”​—Iobu 34:10, NWT.

To, nega haida inai bamona do oi laloa, ‘Edena negai Siahu Ibounai Diravana ese Satani do ia kokia?’ Ita diba vadaeni, Dirava be kara dika ia inai henia momokani, bona iseda hisihisi ia itaia neganai, ia lalohisihisi bada. Iena Hereva ia gwau: “Emui lalohekwarahi ibounai be ia dekenai umui negea, badina ia be umui ia laloa bada.” (1 Petero 5:7) Dirava ese ita ia lalokau henia bona ia be mai ena siahu, hisihisi bona kara gageva ibounai ia haorea totona. Atikol ma ta ese unai do ia herevalaia. *