Unai bamona ura ia vara kava, a? Lasi! Baibel ese ita ia hadibaia Dirava ese iseda lalona ai unai ura ia atoa. (Hadibaia Tauna 3:11) Baibel ma ia gwau “Dirava be lalokau.” (1 Ioane 4:8) Bema lalokau Diravana ese iseda kudouna ai mauri hanaihanai urana ia atoa, bona gabeai unai ura ena hemami ia kokia be maoro, a?

Momokani, mase be iseda turana lasi. Unai dainai Baibel ia gwau ia be “iseda inai tauna.” (1 Korinto 15:26) Haida be idia do matamata neganai idia mase, ma haida idia mauri daudau bena idia mase, to dokonai taunimanima ibounai dekenai mase do ia vara. To momo be mase dekenai idia lalohekwarahi bona idia gari. Nega ta mase do ia ore vaitani, a? Momokani unai do ia vara, a?

Reana do oi hoa bema oi diba taunimanima idia mase be Dirava ena ura lasi. Baibel bukana Genese ese ia hahedinaraia goevagoeva, Dirava ena ura taunimanima be tanobada ai do idia noho hanaihanai. Iehova Dirava ese tanobada ai gau ibounai ia karaia taunimanima ese idia moalelaia totona. Bena tau ginigunana, Adamu ia havaraia, bona paradaiso ai ia atoa, unai be Eden umana. Unai murinai, “Dirava ese ia karaia vadaeni gaudia ibounai ia itaia, bona momokani idia be namo herea.”​—Genese 1:26, 31.

Dirava ese iena toana bamona, Adamu ia karaia bona ia be goevadae. (Deuteronomi 32:4) Adamu ena hahine, Heva danu be goevadae. Iehova be idia  dekenai ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua. Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.”​—Genese 1:28.

Adamu bona Heva be edia natudia idia havaraia bona tanobada idia hahonua totona be do ia vara haraga lasi. Heva ese natudia do ia havaraia, bona unai natudia ese natudia ma haida do idia havaraia ela bona tanobada do idia hahonua badina unai be Dirava ena palani. (Isaia 45:18) Oi laloa Iehova ese Adamu bona Heva dekenai mauri hanaihanai helarona do ia henia, bema idia noho daudau edia natudia bona reana tubudia idia itaia, bona gabeai do ia vara gaudia idia diba lasi, a?

Mani oi laloa idia dekenai gaukara ia henia animal idauidau do idia biagua totona. Danu, Dirava ese Adamu ia hamaoroa animal idauidau edia ladana do ia hatoa bona reana nega sisina daudau unai do ia karaia. (Genese 2:19) To idia ia biagua totona, ena anina be edia kara do ia dibaia, bona idia do ia naria dalana do ia lalopararalaia. Reana nega daudau lalonai unai do ia karaia.

Unai dainai, Dirava ena hadibaia herevana​—⁠tanobada do idia hahonua bona animal idauidau do idia biagua karana ese ia hahedinaraia, tau bona hahine ginigunana ia havaraia idia noho daudau totona. Bona momokani, Adamu be ia mauri daudau.

Baibel ese ia hahedinaraia taunimanima haida be guna idia mauri daudau, hari inai negai bamona lasi. Ia gwau: “Adamu ena mauri lagani ibounai be 930.” Bona ma ia gwau tatau siks be lagani 900 mai kahana idia mauri daudau! Edia ladana be Seta, Enosi, Kenana, Iareda, Metusela bona Noa. Idia ibounai be Noa ena nega ai Abata ia do vara lasi neganai idia noho, bona Noa be lagani 600 ia noho bena abata ia mai. (Genese 5:5-27; 7:6; 9:29) Dahaka dainai idia mauri daudau?

Adamu bona Heva be mauri goevadaena ai idia noho negana lalonai, unai tatau idia vara. Reana unai badina dainai idia mauri daudau. To, edena dala ai tauanina bona lalona ia goeva karana ese oi ia durua diba oi mauri daudau totona? Bona mase be edena dala ai do ia ore? Haere ita dibaia totona, dahaka dainai ita buruka bona ita mase ita lalopararalaia guna be namo.