Ta be Mase amo Do Ia Heau Mauri Lasi
MANI oi laloa, oi be lada bada tauna o hahinena ta ena muvi oi itaia noho, reana ia be miusiki gadaralaia tauna ta. Muvi ena matamanai be ia maragi negana amo miusiki gadaralaia dalana ia dibaia bona hanaihanai ia praktis karana ia hedinarai. Bena oi itaia concert momo ai miusiki ia gadaralaia, gabu idauidau ia lao, bona taunimanima momo be ia idia diba. Daudau lasi murinai, ia moalelaia laganidia ai ia abia laulaudia ia hedinarai, bona dokonai ia buruka ia lao bena ia mase.
Inai muvi be ia mase vadaeni tauna ta ena sivarai korikorina. Herevana ia be miusiki gadaralaia tauna ta, saiens tauna ta, spot gadara tauna ta, o taunimanima idia diba momo tauna ta, to edia sivarai be hegeregere sibona. Ena be ta ese gau namodia momo ia karaia, to bema ia buruka bona ia mase lasi, oi laloa gau momo ia karaia diba, a?
Bema mase ita laloa, reana do ita lalohisihisi to ita ibounai do ita mase. (Hadibaia Tauna 9:5) Ena be dahaka ita karaia, to buruka bona mase amo do ita heau mauri lasi. Unai sibona lasi, to reana gorere o aksiden dainai do ita mase diba. Baibel ena hereva bamona, ita be daba ena kwalahu bamona “nega sisina ia hedinarai bena ia boio.”—Iamesi 4:14.
Haida idia laloa mauri be anina lasi dainai inai bamona mauri dalana idia abia dae, “namona be ita aniani bona ita inuinu badina kerukeru do ita mase.” (1 Korinto 15:32) Taunimanima be unai bamona mauri dalana ai idia noho badina idia diba nega ta do idia mase bona idia laloa vaira negai helaro be lasi. Nega haida hekwakwanai badana ta oi davaria neganai, reana do oi laloa, ‘Mase be mauri ena dokona, a?’ Edeseniai haere oi davaria diba?
Hari inai negai momo idia laloa saiens taudia ese haere do idia davaria. Saiens bona doketa taudia ese gau haida idia davaria, unai amo taunimanima idia mauri daudau diba. Danu saiens taudia haida idia gaukara noho mauri idia halataia totona. Ena be saiens taudia idia kwalimu o lasi, to taunimanima be inai henanadai idia laloa noho: Dahaka dainai ita buruka bona ita mase? Iseda inai tauna mase, be do ia ore momokani, a? Atikol ma haida ai unai topik do ita herevalaia bona inai henanadai do ita haerelaia, Mase be mauri ena dokona, a?