Abidadama Dainai Dirava Ena Lalonamo Oi Abia
“Abidadama bona haheauka karana amo Dirava ese ia gwauhamatalaia gaudia idia abia taudia, do umui tohotohoa.”—HEB. 6:12.
ANE: 86, 54
1, 2. Iepeta bona ena natuna ese dahaka abia hidi badana idia karaia?
KEKENI ia moale bada badina ena tamana be tuari amo ia giroa mai. Vadaeni mai ane bona mavaru ida ia heau lao bona ena tamana ia hedavari henia. To ena tamana be ia ida ia ane bona mavaru lasi, to ena tuari dabua ia darea bona ia tai ia gwau: “Egu natuna o, madi, lau be dika, egu kudouna oi makohia inai.” Bena Iehova dekenai ia karaia gwauhamata be kekeni dekenai ia gwauraia. Unai gwauhamata ese kekeni ena mauri do ia haidaua momokani, ia be do ia headava lasi bona natuna do ia havaraia lasi. To, kekeni be mai moale ida ena tamana ia hagoadaia, ena gwauhamata ia badinaia totona. Unai ese ia hahedinaraia kekeni ena abidadama be goada. Bona Iehova dekenai ia tabekau. (Gun. 11:34-37) Ena Tamana ia moale bada, badina ia diba kekeni ena kara dainai, Iehova be ia moale.
2 Iepeta bona ena natuna ese Iehova bona ena hakaua daladia idia abidadama henia momokani, ena be ia auka. Idia
abia dae momokani Iehova ena lalonamo abia karana ese boubou karana ia hereaia.3. Edena dala ai Iepeta bona ena natuna edia haheitalai ese ita ia durua diba?
3 Nega haida ia auka Iehova ita abidadama henia noho totona. To namona be iseda abidadama ita “dogoatao auka.” (Iuda 3) Unai ita karaia totona, mani Iepeta bona ena natuna ese idia haheaukalaia gaudia haida ita itaia. Dahaka ese idia ia durua Iehova idia abidadama henia noho totona?
TANOBADA ENA LALOHADAI DADARAIA
4, 5. (a) Iehova ese Israela taudia dekenai dahaka hahegani ia henia? (b) Israela taudia edia gwau-edeede karana dainai dahaka ia vara?
4 Dina ta ta ai, Iepeta bona ena natuna ese Iehova dadaraia karana amo ia vara dika idia laloa lou. Lagani 300 gunanai, Iehova ese edia tubudia ia hagania, Gwauhamata Tanona ai tomadiho koikoi idia badinaia taudia ibounai idia alaia mase totona. (Deu. 7:1-4) Israela taudia momo ese unai hahegani idia badinaia lasi dainai, Kanana taudia edia kara dikadia idia tohotohoa, idia ese dirava koikoidia idia tomadiho henia bona matabodaga karadia idia karaia.—Salamo 106:34-39 duahia.
5 Israela taudia idia gwau-edeede dainai, Iehova ese ia lalonamo henidia lasi, bona ia gimadia lasi. (Gun. 2:1-3, 11-15; Sal. 106:40-43) Unai ese Iehova idia badinaia ruma besedia edia abidadama ia tohoa momokani! To, Baibel ese abidadama taudia haida ia herevalaia, hegeregere, Iepeta bona ena natuna, Elikana, Hana, bona Samuela. Idia be Dirava ena lalonamo idia abia.—1 Sam. 1:20-28; 2:26.
6. Hari taunimanima be edena bamona kara idia abia isi, bona ita be dahaka ita karaia be namo?
6 Iseda nega ai, taunimanima edia kara bona lalohadai be Kanana taudia edia bamona. Idia ese mahuta hebou, dagedage, bona taga bada abia karana idia abia isi. To, unai bamona karadia amo Iehova ese ita ia gimaia. Oibe, ia ese ita dekenai hakaua herevadia ia henia, Israela taudia dekenai ia karaia bamona. Israela taudia edia kerere amo dahaka ita dibaia? (1 Kor. 10:6-11) Namona be ita gaukara goada inai tanobada ena lalohadai ita dadaraia totona. (Roma 12:2) Unai ita karaia diba, a?
DIRAVA IA ABIDADAMA HENIA NOHO
7. (a) Iepeta ese ena bese taudia amo dahaka hahetoho ia davaria? (b) Iepeta be dahaka ia karaia?
7 Iepeta ena nega ai, Israela taudia edia gwau-edeede karana dainai, idia be Filistia bona Amono taudia edia igui hesiai taudia ai idia lao. (Gun. 10: 7, 8) To, unai besedia sibona ese Iepeta idia dagedage henia lasi, iena tadikaka bona Israela ena gunalaia taudia ese ia idia dagedage henia danu. Iena tadikaka ese ia idia mama bona inai henia dainai, ia idia lulua bona ia ese ena vara guna ahuna ia abia lasi. (Gun. 11:1-3) To, edia kara ese Iepeta ena laloa maoromaoro karana ia hadikaia lasi. Oibe, Israela ena tatau badadia be heduru totona ia dekenai idia mai neganai, ia durudia. (Gun. 11:4-11) Dahaka ese Iepeta ia durua dainai unai bamona ia kara?
8, 9. (a) Edena dala ai Iepeta ese Mose ena Taravatu ia badinaia? (b) Iepeta be dahaka ia laloa bada?
8 Iepeta be tuari tauna goadana sibona lasi, to Dirava ese ena taunimanima ia kara henia dalana ia diba danu. Ia be Gun. 11:12-27) Mose ena Taravatu lalonai idia noho hakaua herevadia ese Iepeta ena laloa dalana bona ena kudouna ia biagua. Unai dainai ia diba Iehova ese ta badu henia noho karana ia moalelaia lasi, to Dirava ia ura Iena taunimanima ese ta ta do idia lalokau henia. Ma danu, Taravatu ia gwau ma haida edia namo do ia laloa, herevana ia idia “badu” henia.—Esodo 23:5; Levitiko 19:17, 18 duahia.
Israela taudia edia sivarai ia diba namonamo dainai, ia diba dahaka be Iehova ena matanai ia namo bona ia dika. (9 Iosepa ena haheitalai ese Iepeta ia durua bada. Ena be Iosepa ena tadikaka ese ia “idia badu henia,” to idia ia hebogahisi henia. (Gen. 37:4; 45:4, 5) Iepeta be unai ia laloa dobu dainai, Iehova ia hamoalea karana ia karaia. Momokani, iena tadikaka edia kara ese Iepeta ena lalona ia hahisia bada, to Iehova bona Iena taunimanima hesiai henia karana ia rakatania lasi. (Gun. 11:9) Ia ura lasi ia vara hepapahuahuana ese Iehova ena ladana ia hadikaia. Oibe, ia ese ena lalona ia hadaia Iehova ia abidadama henia noho totona. Bona ena kara dainai ia bona Israela taudia be namo idia davaria.—Heb. 11:32, 33.
10. Hari Baibel ena hakaua herevadia ese edena dala ai ita ia durua diba?
10 Iepeta ena haheitalai amo dahaka ita dibaia? Bema tadikaka o taihu ta ena kara dainai ita lalohisihisi, namo lasi Keristani heboudia o Iehova hesiai henia karana ita rakatania. Namona be hanaihanai iseda tadikaka taihu ida ita noho. Iepeta hegeregere, Baibel ena hakaua herevadia ita badinaia neganai, namo do ita davaria.—Roma 12:20, 21; Kol. 3:13.
MAI URA BADA IDA ITA GAUKARA
11, 12. Iepeta be dahaka gwauhamata ia karaia, bona ena anina be dahaka?
11 Iepeta ia laloparara Israela besena be Amono taudia amo ia hamauria totona, Dirava ena heduru ia noia be namo. Unai dainai Iehova dekenai ia gwauhamata, bema ia dekenai kwalimu ia henia, tuari amo ia giroa neganai, ena ruma amo ia raka-lasi tauna ginigunana be “gabua boubouna” bamona Iehova dekenai do ia henia. (Gun. 11:30, 31) Unai ena anina be dahaka?
12 Taunimanima bouboulaia karana be Iehova ese ia inai henia. Unai dainai ita diba Iepeta be tau ta do ia bouboulaia lasi. (Deu. 18:9, 10) Mose ena Taravatu henunai, gabua boubou ena kahana ibounai be Iehova dekenai idia henia. Unai dainai Iepeta ena hereva ena anina be do ia henia tauna ena mauri ibounai lalonai, dubu helaga ai Dirava ena hesiai gaukara do ia karaia. Iehova ese Iepeta ena gwauhamata ia abia dae bona ia dekenai kwalimu ia henia. (Gun. 11:32, 33) To Iepeta ese “gabua boubouna” bamona Dirava dekenai daika do ia henia?
13, 14. Gunalaia Tauna 11:35 ese edena dala ai Iepeta ena abidadama ia hahedinaraia?
13 Inai stadi ena matamana ai ita herevalaia sivaraina mani oi laloa. Iepeta be tuari amo ia giroa neganai, ia hedavari henia totona ia lao tauna be ena lalokau natuna kekeni tamona! Iepeta be dahaka do ia karaia? Ia ese ena natuna do ia henia, bona ena mauri ibounai lalonai dubu helaga ai do ia gaukara, a?
14 Ita gwau diba Baibel ena hakaua herevadia ese Iepeta ia durua abia hidi maorona ia karaia totona. Reana Esodo 23:19 ena hereva ia laloatao, unai siri ese Dirava ena taunimanima ia hagoadadia Iehova dekenai gau namo hereadia idia henia totona. Danu, Taravatu ia gwau, ta be gwauhamata ia karaia neganai, ia badinaia be namo. Ia gwau: “Bema tau ta ese Lohiabada dekenai ia gwauhamata, . . . unai tau ese iena gwauhamata do ia karaia momokani, iena gwauhamata do ia makohia lasi.” (Num. 30:2) Abidadama hahinena Hana hegeregerena, Iepeta ese ena gwauhamata ia badinaia, ena be ia diba iena natuna kekeni be do ia headava lasi bona natudia do ia havaraia lasi, iena bese habadaia totona. (Gun. 11:34) Gunalaia Taudia 11:35 ai, Iepeta ia gwau: “Lohiabada dekenai gwauhamata lau karaia vadaeni, lau makohia diba lasi gauna.” Iena abidadama karana dainai, Iehova ese ia lalonamo henia bona hanamoa. Oi danu be Iepeta do oi tohotohoa, a?
15. Ita momo be dahaka gwauhamata ita karaia, bona edena dala ai unai ita hamomokani diba?
15 Iehova dekenai iseda mauri ita gwauhamatalaia neganai, ita gwauhamata iena ura do ita karaia. Ita diba unai gwauhamata ita badinaia totona, sibona iseda ura ita dadaraia be namo. Nega haida do ia auka unai ita karaia totona. To, bema iseda ura ita dadaraia bona Dirava ita hesiai henia, ita hahedinaraia ita ura Dirava ita badinaia noho. Momokani, Iehova amo ita abia hahenamo ese ita dadaraia gaudia ibounai ia hereaia. (Mal. 3:10) To Iepeta ena natuna kekeni be edena bamona?
Edena dala ai Iepeta bona ena natuna edia abidadama ita tohotohoa diba? (Paragraf 16, 17 itaia)
16. Iepeta ena gwauhamata dainai, ena natuna be dahaka ia karaia? (Laulau ginigunana herevalaia.)
16 Reana Iepeta ena natuna be ena tamana ese ia karaia gwauhamata dainai do ia vara gaudia ia abia dae be auka. Unai be Hana ena gwauhamata amo ia idau. Hana ese ena natuna Samuela ia henia bona Nasiri tauna bamona Dubu Helaga ai ia gaukara. (1 Sam. 1:11) Nasiri tauna be ia headava bona ruma bese ia havaraia diba. To, Iepeta ena natuna be “gabua boubouna” bamona ia henia, unai dainai ia be do ia headava lasi bona natudia do ia havaraia lasi. (Gun. 11:37-40) Mani oi laloa! Iepeta be Israela ena gunalaia tauna dainai, reana ena natuna kekeni be tau namona ia adavaia diba. To, hari ia be mai manau ida Dubu Helaga ai hesiai gaukara do ia karaia. Unai kekeni matamata be dahaka ia gwau? Iena haere amo ia hahedinaraia, ia be Iehova ena hesiai gaukara ia atoa guna, ia gwau: “Egu tamana e, bema Lohiabada dekenai gwauhamata oi karaia, oiemu hereva gauna lau dekenai do oi karaia.” (Gun. 11:36) Ia ese headava bona natudia havaraia urana ia dadaraia, tomadiho momokani ia durua totona. Edena dala ai iena kara ita tohotohoa diba?
17. (a) Iepeta bona ena natuna edia abidadama be edena bamona do ita tohotohoa? (b) Heberu 6:10-12 ese edena dala ai oi ia hagoadaia?
17 Hari, Keristani matamata taudia tausen momo be idia headava lasi o natudia idia havaraia lasi, unai amo Iehova idia hesiai henia diba. Danu, ena be buruka taudia haida be edia natudia o tubudia idia bamoa diba, to unai nega idia gaukaralaia tiokratik konstraksen gaukara idia karaia, eiava Basileia Evanelia Sikuli dekenai idia lao bona pablisa momo lasi gabudia dekenai idia lao. Memorial negadia ai, haida be sibodia edia gaukara ma haida idia rakatania bona pepapepa hariharilaia gaukarana idia durua. Mai kudouna ibounai ida unai idia karaia dainai, Iehova ia moale, bona ia ese idia karaia gaukarana bona ia dainai idia hahedinaraia lalokauna do ia laloaboio lasi. (Heberu 6:10-12 duahia.) Oi danu be emu hesiai gaukara Iehova dekenai do oi habadaia, a?
DAHAKA ITA DIBAIA?
18, 19. Iepeta bona ena natuna edia sivarai amo dahaka ita dibaia, bona edena dala ai idia ita tohotohoa diba?
18 Ena be Iepeta ena mauri lalonai hekwakwanai momo ia davaria, to iena mauri dekenai ia karaia abia hidi ibounai lalonai Iehova dekenai ia tabekau. Danu, ena be ma haida ese ena lalona idia hahisia bada, to ena lalona ia hadaia Dirava ia badinaia noho totona. Ia bona ena natuna kekeni edia kara namona dainai, Iehova ese ia hanamodia. Oibe, Iehova ese idia ia gaukaralaia tomadiho momokani idia durua totona. Ena be unai nega ai ma haida be Dirava ena kara maoromaoro taravatudia idia badinaia lasi, to Iepeta bona ena natuna ese idia badinaia noho.
19 Baibel ese ita ia hagoadaia, “abidadama bona haheauka karana amo Dirava ese ia gwauhamatalaia gaudia idia abia taudia” ita tohotohodia totona. (Heb. 6:12) Oibe, namona be Iepeta bona ena natuna kekeni ita tohotohoa, badina ita diba momokani Iehova ita abidadama henia dainai, ena lalonamo do ita abia.