Dahaka Dainai Tomadiho Totona Ita Hebou be Namo?
“Dina ibounai . . . dubu helaga dekenai idia hebou.”—KARA 2:46.
ANE: 20, 119
1-3. (a) Edena dala ai Keristani taudia idia hahedinaraia idia ese hebou idia laloa bada? (Laulau ginigunana herevalaia.) (b) Inai stadi ai, dahaka do ita herevalaia?
CORINNA ena mauri lagani be 17 neganai, ena sinana idia dogoatao bona Soviet gavamani ena dibura kamepa ta dekenai idia siaia lao. Gabeai, Corinna danu be Siberia dekenai idia siaia. Iena hanua amo unai be daudau herea. Unuseniai ia be igui hesiai tauna bamona idia kara henia. Bona nega haida ia idia doria murimuri ai ia gaukara totona, herevana gabu ia paraka bona ia be keru dabua lasi. Ena be unai ia vara, Corinna bona taihu ma ta be edia lalona idia hadaia kongrigeisen hebouna do idia lao.
2 Corinna ia gwau: “Adorahi momokani ai, emai gaukara gabuna ai rakatania, bona trein steiseni dekenai ai raka lao, unai be kilomita 25 bamona. Daba 2 oklok ai, trein be gabu ia rakatania, bona hora 6 ai heau ela bona gabu ta dekenai ai diho bona kilomita 10 ai raka, hebou gabuna dekenai ai lao totona.” Corinna be unai ia karaia dainai, ia moale. Ia gwau: “Hebou ai, Gima Kohorona ai stadilaia bona Basileia anedia ai
abia. Unai ese emai abidadama ia hagoadaia bada.” Ena be dina toi murinai edia gaukara dekenai idia giroa, to edia biaguna be unai ia diba lasi.3 Iehova ena taunimanima be hebou karana idia laloa bada. Keristani kongrigeisen ia matamaia neganai, Iesu ena murinai idia raka taudia be “dina ibounai . . . dubu helaga dekenai idia hebou.” (Kara 2:46) Reana oi danu be hebou lao henia karana oi moalelaia. To, Keristani taudia ibounai be koua gaudia haida idia davaria. Hegeregere, moni gaukara, ita bisi bada, eiava dina ta ta ita karaia gaukaradia dainai ita hesiku hebou ita lao henia lasi. To, dahaka ese ita do ia durua, unai koua gaudia ita hanaia bona hebou ibounai dekenai ita lao totona? [1] Edena dala ai iseda stadi taudia bona ma haida ita hagoadaia diba, hebou idia lao henia hanaihanai totona? Inai stadi ai, hebou ita lao henia ena badina 8 do ita herevalaia. Unai badina 8 be orea toi ai ita atoa diba: (1) Oi ia durua dalana, (2) ma haida ia durua dalana, bona (3) Iehova ia hamoalea. [2]
OI IA DURUA DALANA
4. Iseda hebou ese edena dala ai ita ia durua?
4 Diba ita abia. Hebou ibounai lalonai iseda Dirava, Iehova, ita dibaia. Hegeregere, lagani rua bamona lalonai, kongrigeisen momo ese edia Kongrigeisen Baibel Stadi ai, Iehova Kahirakahira Oi Lao bukana idia stadilaia. Iehova ena kara idauidau oi stadilaia bona emu tadikaka taihu edia haere ese emu lalokau emu guba Tamana dekenai ia hagoadaia, a? Danu, hebou ai tok, haheitalai, bona Baibel duahiduahi ita kamonai namonamo neganai, iseda diba Baibel dekenai ita habadaia. (Neh. 8:8) Hegeregere, wiki ta ta ai sibona emu Baibel duahiduahi bona Baibel ena hereva badadia amo oi dibaia gaudia mani oi laloa!
5. Keristani heboudia ese edena dala ma haida ai oi ia durua?
5 Hebou ese ita ia durua, iseda mauri lalonai Baibel ena hakaua herevadia ita badinaia totona. (1 Tes. 4:9, 10) Hegeregere, Gima Kohorona Stadi amo heduru bada ita abia. Gima Kohorona Stadi ta ese oi ia hagoadaia, tahua gaudia oi atoa, emu guriguri oi hanamoa, o tadikaka taihu oi gwauatao totona, a? Wiki huanai ita karaia hebou amo haroro daladia ita dibaia, unai amo ma haida dekenai Baibel ena hakaua herevadia ita hadibaia namonamo diba.—Mat. 28:19, 20.
6. Edena dala ai Keristani heboudia ese ita idia hagoadaia?
6 Ita ia hagoadaia. Inai nega oromana ese iseda lalona, hemami, bona abidadama ia hadikaia diba. To, kongrigeisen heboudia ese ita ia hagoadaia. (Kara 15:30-32 duahia.) Iseda hebou momo ai, Baibel ena peroveta herevadia idia guguru dalana ita herevalaia. Unai amo ita abia dae momokani Iehova ena gwauhamata vaira nega totona be do idia guguru. To, platfom amo tok idia henia taudia sibona amo goada ita abia lasi. Tadikaka taihu edia haere bona mai kudouna ibounai ida idia ane neganai, unai ese ita ia hagoadaia danu. (1 Kor. 14:26) Ma danu, hebou murinai iseda tadikaka taihu ida ita herevahereva neganai, goada matamata ita abia.—1 Kor. 16:17, 18.
7. Dahaka dainai iseda kongrigeisen heboudia ai ita noho be namo?
7 Lauma helaga ena heduru ita abia. Iesu Keriso ia gwau: “Mai ena taiana tauna ese lauma helaga ena hereva kongrigeisen dekediai ia kamonai be namo.” (Apok. 2:7) Oibe, Iesu ese lauma helaga amo Keristani kongrigeisen ia hakaua. Lauma helaga ena heduru amo hahetoho ita dadaraia, ita haroro, bona abia hidi maorodia ita karaia diba. Unai dainai namona be hebou ibounai dekenai ita lao, unai amo lauma helaga ena heduru do ita abia.
MA HAIDA IA DURUA DALANA
8. Edena dala ai hebou ai ita noho, iseda haere, bona ane amo iseda tadikaka ita durua? (Maua ladana “Hebou Murinai Nega Ibounai Ia Moale” itaia.)
8 Ita hahedinaraia iseda tadikaka taihu ita lalokau henia. Emu kongrigeisen tadikaka taihu ese idia davaria hahetoho mani oi laloa. Aposetolo Paulo ia gwau: “Namona be ta ta ibounai do ita laloa”! Bena ia gwau, “iseda hebou karana ita rakatania lasi,” unai amo ita hahedinaraia idia ita laloa. (Heb. 10:24, 25) Hebou dekenai ita lao neganai, ita hahedinaraia ita ura iseda tadikaka taihu ida ita noho bona herevahereva. Danu, emu haere bona ane abia karana ese idia do ia hagoadaia.—Kol. 3:16.
9, 10. (a) Iesu ena hereva Ioane 10:16 ai ese edena dala ai ita ia hagoadaia? (b) Edena dala ai iseda hebou lao henia karana ese ma haida ia durua diba?
9 Ita ia hatamonaia. (Ioane 10:16 duahia.) Iesu ese ia sibona be mamoe naria tauna ida ia hahegeregerea, bona ena murinai idia raka taudia be mamoe ida ia hahegeregerea. Mani oi laloa: Bema mamoe rua be ororo ta latanai, mamoe ma rua be koura ai, bona mamoe ma ta be gabu ma ta ai, oi gwau diba unai mamoe 5 be seri ta, a? Lasi, badina mamoe serina be idia noho hebou bona mamoe naria tauna idia badinaia. Unai hegeregerena, bema sibona ita noho, iseda Mamoe Naria Tauna do ita badinaia diba lasi. Unai dainai namona be Keristani taudia ma haida ita bamoa, unai amo ita be “mamoe serina tamona” ai do ita lao, bona “mamoe naria tauna” tamona do ita badinaia.
10 Hebou ita lao henia neganai, unai ese iseda lalotamona karana ia hagoadaia. (Sal. 133:1) Iseda tadikaka taihu haida be edia famili ese idia dadaraia. To Iesu ia gwauhamata idia ia lalokau henia bona idia ia naria ruma bese ta do ia henia. (Mar. 10:29, 30) Hebou oi lao henia hanaihanai neganai, ma ta dekenai oi be tamana, sinana, tadikaka, o taihuna ai do oi lao! Unai ese oi ia hagoadaia hebou ibounai dekenai oi lao totona, a?
IEHOVA ITA HAMOALEA
11. Edena dala ai hebou lao henia karana amo Iehova ita hamoalea?
11 Iehova ita hamoalea. Ia be iseda Havaraia Tauna dainai, namona be ia dekenai tanikiu, hemataurai, bona hanamoa ita henia. (Apokalupo 7:12 duahia.) Hebou ai ita guriguri, ane, bona Iehova ita herevalaia neganai, ita be ia ita tomadiho henia noho.
12. Iehova ena hahegani ita badinaia dainai, Iehova be edena bamona ia laloa?
12 Iehova ita kamonai henia danu be namo. Ita ia hagania hebou do ita reaia lasi, badina ita be dokona negana ai ita noho. Unai hahegani ita badinaia neganai, Iehova ia moale. (1 Ioa. 3:22) Ia diba ita ibounai ita hekwarahi hebou dekenai ita lao totona, bona unai ia laloa bada.—Heb. 6:10.
13, 14. Hebou ai, edena dala ai Iehova bona Iesu kahirakahira ita lao?
13 Iehova dekenai ita hahedinaraia ita ura ia bona ena Natuna kahirakahira ita lao. Hebou ai, iseda Hadibaia Tauna Badana ese Baibel amo ita ia hadibaia. (Isa. 30:20, 21) Unai dainai Witnes lasi taudia be hebou dekenai idia mai neganai, idia gwau: “Momokani, Dirava be umui huanai ia noho.” (1 Kor. 14:23-25) Iehova ese ena lauma helaga amo iseda hebou ia hakaua. Unai dainai hebou ai ita be Iehova ena gadona ita kamonai bona ena lalokau ita mamia. Bena ia kahirakahira ita lao.
14 Iesu ia gwau: “Egu ladanai taunimanima rua eiava toi idia hebou neganai, lau be idia huanai lau noho.” (Mat. 18:20) Inai hakaua herevana be mai anina bada iseda kongrigeisen heboudia dekenai danu. Iesu be kongrigeisen ena kwarana dainai, ia be Dirava ena taunimanima “huanai ia raka.” (Apok. 1:20–2:1) Mani oi laloa! Keristani hebou ai, Iehova bona Iesu be ita idia hagoadaia. Bema Iehova ia itaia oi be oi hekwarahi ia bona ena Natuna kahirakahira oi lao totona, oi laloa ia be edena bamona do ia mamia?
15. Edena dala ai ita ese Dirava ena lohia siahuna ita abia dae diba?
15 Ita hahedinaraia Dirava ena lohia siahuna ita abia dae. Ena be Iehova ese ita ia hagania hebou do ita lao, to ita ia doria lasi unai hahegani ita badinaia totona. (Isa. 43:23) Unai dainai, ita sibona ese do ita hahedinaraia ita be ia ita lalokau henia, bona iena lohia siahuna ita abia dae. (Roma 6:17) Hegeregere, reana bosi ia ura hebou negana ai do ita gaukara. Eiava gavamani ese ita ia hagaria, ia gwau, bema Iehova tomadiho henia totona ita hebou, davana do ita henia, dibura do ita lao, o panisi dikana ta do ita abia. Eiava reana ita ura moale karana ta lalonai ita vareai bona hebou ita reaia. Unai nega ta ta ai, ita sibona ese do ita abia hidi: Daika do ita hesiai henia? (Kara 5:29) Bema Iehova ena lohia siahuna ita abia dae, ia do ita hamoalea.—Aon. 27:11.
EMU TADIKAKA TAIHU OI BAMOA NOHO
16, 17. (a) Edena dala ai Keristani taudia ginigunadia ese edia hebou idia laloa? (b) Tadikaka George Gangas ese Keristani heboudia be edena bamona ia laloa?
16 Pentekoste 33 C.E. murinai, Keristani taudia be hanaihanai idia hebou Iehova tomadiho henia totona. Idia ese “aposetolo taudia edia hadibaia herevadia idia kamonai namonamo” bona “dubu helaga dekenai idia hebou.” (Kara 2:42, 46) Danu, unai Keristani taudia be Roma gavamani henunai idia noho bona Iuda ena dubu gunalaia taudia ese idia dagedage henia dainai, ia auka idia hebou totona. To, hebou idia karaia.
17 Hari danu, Iehova ena hesiai taudia be Keristani heboudia idia moale bada. George Gangas, guna lagani 22 mai kahana lalonai Hakaua Oreana tauna ta, ia gwau: “Tadikaka taihu ida hebou karana lau moalelaia bada bona unai ese lau ia hagoadaia. Lau ura bada Kingdom Hall dekenai lau lao guna, bona bema hegeregere, lau be dokona Kingdom Hall lau rakatania. Dirava ena taunimanima ida lau herevahereva neganai, egu lalona ia moale. Idia ida lau noho neganai, lau mamia lau be egu bese korikori ida lau noho bamona.” Ma ia gwau: “Lau ura bada hebou ibounai dekenai lau lao.”
18. Iseda hebou be edena bamona oi lalodia, emu lalona oi hadaia dahaka do oi karaia?
18 Oi danu ese Iehova tomadiho henia karana oi laloa bada, a? Bema oibe, namona be oi hekwarahi emu tadikaka ida oi hebou totona, ena be ia auka. Unai amo oi hahedinaraia oi be King Davida ida oi lalotamona, ia gwau: “Lohiabada e, oi noho Ruma, be lau ura henia noho.”—Sal. 26:8.
^ [1] (paragraf 3) Iseda tadikaka taihu haida be hebou idia lao henia hanaihanai lasi, badina idia gorere bada. Oibe, Iehova be edia hekwakwanai ia lalopararalaia bona mai kudouna ibounai ida Ia idia tomadiho henia karana ia laloa bada. Elda taudia ese unai tadikaka taihu idia durua diba. Hegeregere, reana telefon amo hebou idia kamonai diba o idia totona hebou idia rekodia.
^ [2] (paragraf 3) Maua ladana “Hebou Ita Lao Ena Badina” itaia.